ខេត្តពោធិ៍សាត់ ៖ ព្រឹកថ្ងៃអាទិត្យ ទី៨ ខែមីនា ឆ្នាំ២០២០ កម្លាំងចំរុះស្រុកក្រគរធ្វើការអង្កេត.ស្រាវជ្រាវយ៉ាងក្តៅគគុក រហូតឈានដល់កំណត់មុខសញ្ញាលួចអារច្រៀក និងដឹកជញ្ជូនឈើ ក្នុងដែនសហគមន៍ព្រៃឈើធម្មជាតិ(រមណីយដ្ឋានទឹកធ្លាក់ច្រកល្អៀង) ព្រមទាំងឈានដល់ធ្វើកំណត់ហេតុដកហូតមធ្យោបាយដឹកជញ្ជូន រថយន្តកែច្នៃ ១គ្រឿងផងដែរនោះ ។
ជនសង្ស័យប្រព្រិត្តបទល្មើសព្រៃឈើជាមុខសញ្ញាឈ្មោះ ស៊ូ នាង ភេទប្រុស អាយុ៤២ឆ្នាំ ជនជាតិខ្មែរ បច្ចុប្បន្នរស់នៅភូមិខ្លាក្រពើ ឃុំអន្លង់ត្នោត ស្រុកក្រគរ ខេត្តពោធិ៍សាត់ និងកូនប្រុសម្នាក់ថែមទៀត បច្ចុប្បន្នរត់គេចខ្លួន។ កម្លាំងចំរុះកំពុងមមាញឹកចំណាត់ការដោយ មិនបន្ធូដៃឡើយ ហើយវត្ថុតាងក៍ដកហូតយកមករក្សាទុក នៅអធិការដ្ឋាននគរបាលស្រុកក្រគរ ដើម្បីបន្តនីតិវិធី ។
គួររលឹកថា កម្លាំងចំរុះប្រមាណជាង៣០នាក់ បានចុះល្បាតព្រៃក្នុងដែនសហគមន៍ ព្រៃឈើរមណីយដ្ឋានទឹកធ្លាក់ច្រកល្អៀង ត្រង់ចំណុចកកុះ ស្ថិតក្នុងភូមិបំណក់ ឃុំឈើតុំ ស្រុកក្រគរ ខេត្តពោធិ៍សាត់ នាព្រឹកថ្ងៃទី៧ ខែមីនា ឆ្នាំ២០២០ កន្លងទៅ បានឃើញជាក់ស្ដែង ការអារច្រៀកដើមឈើដោយគ្មានញញើតដៃ បើទោះបីជាគេដឹងតំបន់នោះជាកន្លែងទេសចរណ៍ធម្មជាតិដ៍សម្បូរបែបដែលមិនអាចកាត់ថ្លៃបាននោះក៍ដោយ និងដោយមានការសម្របសម្រួលពីលោកព្រះរាជអាជ្ញាអមសាលាដំបូងខេត្តពោធិ៍សាត់ ទើបសមត្តកិច្ចអង្កេត ស្រាវជ្រាវយ៉ាងប្រគៀកប្រកិត រហូតឈានដល់កំណត់មុខសញ្ញា និងរកឃើញមធ្យោបាយដឹកជញ្ជូនដែលគេលាក់ទុក៕
