កំពង់ឆ្នាំង ៖ នៅសាលាខេត្តកំពង់ឆ្នាំងនាព្រឹកថ្ងៃទី១៣ ខែកុម្ភៈ ឆ្នាំ២០១៥នេះ មានពិធីប្រកាស ស្តីពីការ តែងតាំងមន្ត្រីរាជការរបស់រដ្ឋបាលជលផល ដែលពិធីនេះត្រូវបានរៀបចំ ក្រោមអធិបតីភាព យុទ្ធ ភូថង រដ្ឋលេខាធិការក្រសួងកសិកម្មរុក្ខាប្រមាញ់ និងនេសាទ ឯកឧត្តម អេង ជាសាន ប្រតិភូ រាជរដ្ឋាភិបាលកម្ពុជា ទទួលបន្ទុក រដ្ឋបាលជលផល និងឯកឧត្តម ឈួរ ច័ន្ទឌឿន អភិបាលនៃគណៈអភិបាលខេត្តកំពង់ឆ្នាំង ។
ប្រធាននាយកដ្ឋាន កិច្ចការរដ្ឋបាលលោក សន ថាន់បានអានប្រកាសរបស់ក្រសួងកសិកម្មរុក្ខាប្រមាញ់ និងនេសាទ លេខ095 ប្រក.កសក ចុះថ្ងៃទី៣០ ខែមករា ឆ្នាំ២០១៥ ស្តីពីការតែងតាំងមន្ត្រីរាជការ គឺបានសម្រេចតែងតាំង និងប្រគល់ភារកិច្ចជូនមន្ត្រីរដ្ឋបាលជលផលខេត្តកំពង់ឆ្នាំងមាន ១-លោក សោម ភារុណ ជានាយខណ្ឌរដ្ឋបាលជលផល ដោយលោក សេង ប៊ុនឈឿន ត្រូវបានចូលនិវត្តន៍២-លោក អ៊ឹង ជឺប៉ោ ជានាយរងខណ្ឌរដ្ឋបាលជលផល ៣-លោក ម៉ប់ សាម៉ុន ជានាយរងខណ្ឌរដ្ឋបាលជលផល និង៤-លោក តាត សីហាក់ ជានាយផ្នែករដ្ឋបាលជលផលផ្សារឆ្នាំងក្នុងនោះ ប្រកាសទាំងឡាយ ណា ដែលមានខ្លឹមសារផ្ទុយពីប្រកាសនេះ ត្រូវចាត់ទុកជានិរាកណ៍ ។ បន្ទាប់ពីការប្តេជ្ញាចិត្ត របស់មន្ត្រី ទើបត្រូវបាន តែងតាំងថ្មីរួចមក ឯកឧត្តមយុទ្ធ ភូថង បានមានប្រសាសន៍ចាត់ទុក ការតែងតាំងតំឡើងឋានៈ មន្ត្រីរាជការ គឺជាការងារ ធម្មតា ក្នុងគោលបំណងកែទម្រង់រចនាសម្ព័ន្ធដឹកនាំ និងគ្រប់គ្រងឲ្យកាន់តែប្រសើរឡើងថែមទៀត ដោយផ្អែកលើ សហលក្ខន្តិកៈ មន្ត្រីរាជការស៊ីវិល។
ឯកឧត្តមយុទ្ធ ភូថង បានសំណូមពរ សូមឲ្យមន្ត្រីទើបត្រូវបានតែងតាំងថ្មី ១-ត្រូវខិតខំយកចិត្តទុកដាក់ ធ្វើខ្លួនឲ្យក្លាយជាមន្ត្រីល្អ អ្នកដឹកនាំល្អ ប្រកបដោយសីលធម៌ សមធម៌ និងការទទួលខុសត្រូវខ្ពស់ នៅក្នុងការបំពេញភារកិច្ចជូនជាតិ ២-យកចិត្តទុកដាក់ខ្ពស់ ក្នុងការគោរពបទបញ្ជា ការចាត់តាំងរបស់ថ្នាក់លើ ក្នុងការបំពេញភារកិច្ចដែលបានប្រគល់ជូន ៣-ប្រកាន់ខ្ជាប់សាមគ្គីភាពល្អ និងទំនាក់ទំនងល្អ ជាមួយថ្នាក់ដឹកនាំ ក៏ដូចជាសហការីនានាដោយគ្មានការរើសអើង ៤-ខិតខំព្យាយាមបង្កើតនូវចំណេះដឹងបន្ថែម ដល់ខ្លួនបន្តទៀត និងស្វែងយល់ជាប្រចាំ ដើម្បីដកស្រង់ជាបច្ចេកទេស និងបទពិសោធន៍ល្អៗ ព្រមទាំងប្រកាន់ខ្ជាប់ នូវយុទ្ធសាស្ត្រអ្នកចេះច្រើនបង្រៀនអ្នកចេះតិច ដើម្បីធ្វើឲ្យការងារនៅក្នុងវិស័យជលផល មានដំណើរការអភិវឌ្ឍន៍ឆ្ពោះទៅមុខ ។ នាក្នុងខណៈនោះដែរ ឯកឧត្តម យុទ្ធ ភូថង បានអញ្ជើញ ប្រគល់ ប្រកាស និងត្រា ជូនសាម៉ីខ្លួននៅតាមអង្គភាពរបស់ខ្លួន ៕
