ភ្នំពេញ ៖ ក្នុងលិខិតផ្ញើទៅស្ថាប័នចំនួន៥ ដែលមានដូចជា ក្រសួងមហាផ្ទៃ, ក្រសួងសេដ្ឋកិច្ច និងហិរញ្ញវត្ថុ, ក្រសួងបរិស្ថាន, សាលារាជធានីភ្នំពេញ និងអគ្គិសនីកម្ពុជា គណៈរដ្ឋមន្ត្រីបានលើកឡើងថា ក្រុមហ៊ុនស៊ីនទ្រី មិនមានលទ្ធភាពគ្រប់គ្រាន់ក្នុងការពង្រឹង និងពង្រីកប្រតិបត្តិការរបស់ខ្លួនក្នុងការប្រមូល និងដឹកជញ្ជូនសំរាម សំណល់រឹង នៅក្នុងរាជធានីភ្នំពេញឲ្យស្របនឹងស្ថានភាពរីកចម្រើនជាក់ស្តែងនាពេលបច្ចុប្បន្ននេះទេ ទោះបីជាក្រសួង និងសាលារាជធានីភ្នំពេញ បានទុកពេលវេលាឲ្យធ្វើការកែលម្អការគ្រប់គ្រងក្នុងរយៈពេល១ឆ្នាំកន្លងទៅក្តី។
ទន្ទឹមនឹងនោះ គណៈរដ្ឋមន្ត្រីក៏បានស្នើឲ្យមេធាវីរាជរដ្ឋាភិបាល ក្រសួងបរិស្ថាន និងសាលារាជធានីភ្នំពេញ ពិនិត្យឡើងវិញកិច្ចសន្យារ ដែលបានចុះហត្ថលេខាកន្លងទៅ រវាងសាលារាជធានីភ្នំពេញ ជាមួយនឹងក្រុមហ៊ុនស៊ីនទ្រី ដើម្បីពិនិត្យលទ្ធភាពក្នុងការកែសម្រួលការទទួលខុសត្រូវលើការផ្តល់សេវាប្រមូល និងដឹកជញ្ជូនសំរាម ក៏ដូចជាពិនិត្យលទ្ធភាពឲ្យមានក្រុមហ៊ុនផ្សេងទៀតអាចចូលរួមផ្តល់សេវានេះនៅតាមបណ្តាខណ្ឌនានា ជំនួសឲ្យការធ្វើសេវាផ្តាច់មុខតែក្រុមហ៊ុនមួយ ។
ស្របពេលនោះដែរ ក្រុមហ៊ុនស៊ិនទ្រីក៏ត្អូញត្អែរ ពីរឿងវិបត្តិបង់ប្រាក់ពីអតិថិជនផងដែរ ៕
