ខេត្តសៀមរាប៖ លោក ប៊ុន ណារិទ្ធ អគ្គនាយកអាជ្ញាធរជាតិអប្សរា បានមានប្រសាសន៍ឲ្យដឹងថា ចំពោះករណីភ្ញៀវបរទេសដែលចូលមកលួចថតរូបអាសអាភាសនៅក្នុងប្រាសាទបុរាណកាលពីពេលកន្លងទៅអាជ្ញាធរនឹងបន្តរឹតបន្តឹងបន្ថែមទៀត។លោកបន្តថា ចំណែករូបភាពស្ត្រីដែលបង្ហោះនៅក្នុងទំព័រទំនាក់ទំនងសង្គមកាលពេលកន្លងទៅវាជារឿងរូបភាពកាត់តច្រើនជាង ហើយអាជ្ញាធរនិងមិនព្រងើយកន្តើយចំពោះករណីនេះបានទេ។
មន្ដ្រីអាជ្ញាធរជាតិអប្សរាឲ្យដឹងថា ខ្លួនបានពង្រឹងកងកម្លាំងសន្ដិសុខ(ឆ្មាំ)បន្ថែមទៀត សរុបចំនួនជិត១ពាន់នាក់ ដាក់នៅតាមប្រាសាទបុរាណខ្មែរ ដើម្បីការពារជនខិលខូច លួចចូលថតរូបអាសអាភាស ដែលធ្វើឲ្យប៉ះ ពាល់ដល់វប្បធម៌និងសេចក្តីថ្លៃថ្នូរ ព្រមទាំងអរិយធម៌ខ្មែរនៅតំបន់ប្រាង្គប្រាសាទបុរាណរបស់ខ្មែរ បន្ទាប់ពីមានជនបរទេសមួយចំនួនបានលួចថតរូបអាសអាភាសកាលពីពេលកន្លងទៅ។
លោកស្រី ចៅស៊ុន កិរិយា អ្នកនាំពាក្យអាជ្ញាធរជាតិអប្សរាបានប្រាប់នៅរសៀលថ្ងៃទី១០ខែកុម្ភៈនេះថា ឆ្មាំ១ពាន់នាក់នោះដាក់តាមប្រាសាទបុរាណគ្រប់ទីកន្លែងដោយគ្រាន់តែកន្លែងសំខាន់ខ្លះៗមានកម្លាំងច្រើន ជាងគេនិងកន្លែងខ្លះតិច ដើម្បីយាមកាមតាមឃ្លាំមើលពីសកម្មភាពមិនប្រក្រតីរបស់ភ្ញៀវទេសចរ មួយចំនួននិងការពារមិនឲ្យពួកគាត់ ប៉ះពាល់ដល់វត្ថុបុរាណនិងចូលតំបន់ហាមឃាត់ ដែលនាំឲ្យគ្រោះថ្នាក់ដល់ពួកគាត់។លោកស្រីបន្តថា នៅតាមប្រាសាទនិមួយៗមានកម្លាំងយាមកាមចាប់ពេលពីម៉ោង៥និង៣០នាទីព្រឹកដល់ម៉ោង៥និង៣០ល្ងាច ប៉ុន្ដែលោកស្រីថា មិនមានឆ្មាំដាក់នៅតាមប្រាសាទបុរាណក្នុងព្រៃនោះទេ ដោយមានកម្លាំងព្រៃឈើជាអ្នកការពារ។
លោក ព្រហ្ម សុវណ្ណ អនុប្រធានសមាគមទ្រទ្រង់ក្ដីសង្ឃឹម មគ្គុទេសក៍ទេសចរ ខេត្ដសៀមរាបបានមានប្រសាសន៍ប្រាប់អ្នកកាសែតក្នុងស្រុកនៅរសៀលនេះថា ពួកគាត់បាន សាទរទៅនឹងការបង្កើននូវសន្ដិសុខសុវត្ថិភាពជូនភ្ញៀវទេសចរបានល្អប្រសើរ។លោកបន្តថាបន្ទាប់ពីមានការលេចលឺនូវរូបភាពអាក្រាតកាយនៅប្រាសាទបុរាណមួយចំនួនរួចមក លោកសង្កេតឃើញមានកម្លាំងជាច្រើននៅតាមប្រាសាទនានា។ លោកបន្ដទៀតថា ការកើននៃកម្លាំងការពារនេះអាចជួយដល់ការថែរក្សាប្រាសាទបុរាណ និង ជួយដល់ពេលមានភ្ញៀវទេសចរជួបនូវគ្រោះថ្នាក់ផ្សេងៗផងដែរ។
កន្លងទៅ អាជ្ញាធរជាតិអប្សរា បានធ្វើការសហការជាមួយប៉ូលីសបេតិកភណ្ឌ និងនគរបាលទេសចរ ឃាត់ខ្លួនជនបរទេសចំនួន៥នាក់ក្នុងនោះជនជាតិបារាំង៣នាក់និងស្ត្រីជាជនជាតិអាមេរិក ចំនួន២នាក់បញ្ជូនទៅតុលាការ ខណៈដែលពួកគេ លួចថតរូបអាក្រាតកាយ នៅតំបន់ប្រាសាទបន្ទាយក្ដី និងប្រាសាទព្រះខ័នរបស់ខ្មែរ កាលពីពេលកន្លងទៅ។ជនបរទេសទាំង៥នាក់នោះ ត្រូវបានតុលាការខេត្តសៀមរាប ដាក់ព័ន្ធនាគារក្នុងម្នាក់ៗ៦ខែ និងពិន័យជាប្រាក់១លានរៀល និងហាមមិនឲ្យស្នាក់នៅប្រទេសកម្ពុជារយៈពេល៤ឆ្នាំផងដែរ ដោយចោទពីបទជួញដូររូបភាពអាសអាភាស នៃច្បាប់ស្ដីពីការជួញដូរផ្លូវភេទ និងធ្វើអាជីកម្មផ្លូវភេទ៕
