រាជធានីភ្នំពេញ ៖ នាយករដ្ឋមន្ត្រីកម្ពុជា សម្តេច ហ៊ុន សែន បានចាត់ទុកក្រុមដែលព្យាយាមប្រឌិតព័ត៌មានបំពុលសង្គម អំពីជំងឺកូរ៉ូណាថ្មី ឬ COVID-19 ថាជាក្រុមទុច្ចរិត និងជាក្រុមភេរវករ បើសិនជាក្រុមនេះនៅតែបន្តបំពុល ឬប្រឌិតព័ត៌មាន ដើម្បីជំរុញឲ្យពលរដ្ឋខ្មែរមានការភ័យខ្លាច។
សម្តេច ហ៊ុន សែន ក៏បានចោទសួរទៅវិញថា តើក្រុមបំពុលសង្គមបង្ហោះព័ត៌មានក្លែងក្លាយ ពាក់ព័ន្ធ Covid-19 នោះពួកគេចង់បានអ្វីឲ្យពិតប្រាកដព្រោះថា ការបំពុលព័ត៌មានទាំងអស់ នោះបានត្រឹមតែបង្កឲ្យប្រជាពលរដ្ឋមានការភ័យខ្លាចប៉ុណ្ណោះ ។ ទន្ទឹមនោះសម្តេចអំពាវនាវឲ្យពលរដ្ឋគ្រប់រូបរួមគ្នាប្រឆាំងព័ត៌មានក្លែងក្លាយទាំងអស់នោះ។
សម្តេចនាយករដ្ឋមន្ត្រី ហ៊ុន សែន បានអំពាវនាវដល់ពលរដ្ឋខ្មែរត្រូវនាំគ្នាប្រយុទ្ធប្រឆាំងនឹងព័ត៌មានក្លែងក្លាយដោយសម្តេចបញ្ជាក់បន្ថែមថា « ពលរដ្ឋម្នាក់ៗ ត្រូវ នាំគ្នាប្រឆាំងព័ត៌មានក្លែងក្លាយ » ព្រោះថា បច្ចុប្បន្ននេះព័ត៌មានក្លែងក្លាយច្រើនណាស់ ទាក់ទងព័ត៌មាននៃការឆ្លងជំងឺ Covid-19 ។
សម្តេចបញ្ជាក់ថា អ្វីដែលសំខាន់នៅពេលនេះគឺការការពារដោយខ្លួនឯង ហើយនាំគ្នាប្រឆាំងនឹងព័ត៌មានក្លែងក្លាយដែលបាននិងកំពុងបំពុលនាំឲ្យមានការភ័យខ្លាច ។ សម្តេចបញ្ជាក់បន្ថែម ថាមកដល់ពេលនេះនៅកម្ពុជាពុំទាន់រកឃើញករណីឆ្លង Covid-19 នៅឡើយទេ បន្ទាប់ពីរក ឃើញជនជាតិចិនម្នាក់បានឆ្លង ហើយត្រូវបានព្យាបាលឲ្យជាសះស្បើយហើយឲ្យវិលត្រឡប់ទៅវិញនាពេលកន្លងទៅ ៕
