រាជធានីភ្នំពេញ ៖ ប្រជាសហគមន៍តាតុកប្រហែល១០០នាក់ ក្នុងភូមិព្រែកថ្លឹង សង្កាត់ជើងឯក ខ័ណ្ឌដង្កោ បានប្រមូលផ្តុំតវ៉ាមុខសាលារាជធានីភ្នំពេញ ដើម្បីតាមដានញត្តិ និងស្នើពន្លឿនចេញបណ្ណកម្មសិទ្ធិដីធ្លីជូនពួកគេ។ ប៉ុន្តែកន្លងមកអាជ្ញាធរមូលដ្ឋានអះអាងថា ពួកគាត់បានរស់នៅប្រឡាយ០៣ ដែលគ្រោងអភិវឌ្ឍន៍ ។
តំណាងពលរដ្ឋបានបញ្ជាក់ថា ពួកគាត់រស់នៅលើដីតំបន់នោះតាំងពីឆ្នាំ២០០២ មកដោយពុំ មានការហាមឃាត់ពីអាជ្ញាធរនោះឡើយ ។ ពួកគាត់បន្ថែមថា កន្លងមក សាលារាជធានី ភ្នំពេញបានបង្កើតគណៈកម្មការចម្រុះ ដើម្បីដោះស្រាយផលប៉ះពាល់ជូនពលរដ្ឋ ប៉ុន្តែថា រហូតពេលនេះ ពុំមានអាជ្ញាធរណាចុះដោះស្រាយជូនពលរដ្ឋនោះទេ។
លោក អំ សំអាត នាយករងអង្គការលីកាដូទទួលបន្ទុកឃ្លាំមើលសិទ្ធិមនុស្ស មានប្រសាសន៍ ថា ការអភិវឌ្ឍវារឿងល្អមួយហើយក៏ប៉ុន្តែរដ្ឋាភិបាលត្រូវតែដោះស្រាយសំណងជូន ប្រជាពលរដ្ឋ ឱ្យបានសមរម្យ និងចៀសវាងដេញពលរដ្ឋចេញទាំងបង្ខំ ដែលធ្វើឱ្យប៉ះពាល់សិទ្ធិមនុស្ស។
កន្លងមកក្រុមអាជ្ញាធរមូលដ្ឋានតែងតែឃុបឃិតគ្នា ដើម្បីបិទបាំងការតាំងទីលំនៅដោយខុសច្បាប់លើដីរបស់រដ្ឋជាថ្នូរនឹងលុយកាក់ ហើយបាន ក្លាយជាទម្លាប់អាក្រក់នៅរាជធានីភ្នំពេញ ។ ករណីដូចៗគ្នានេះកើតមានស្ទើរគ្រប់កន្លែងក្នុង រាជធានីភ្នំពេញបង្កការលំបាកដល់ការដោះស្រាយពេលតំបន់នោះស្ថិតក្នុងគម្រោងអភិវឌ្ឍន៍៕
