ខេត្តបន្ទាយមានជ័យ ៖ តាំងពីចុងឆ្នាំ២០១៩-មកទល់ខែកុម្ភៈឆ្នាំ២០២០នេះ សត្វស្លាបចម្រុះបានបន្តកើនចំនួន ហើយបង្ហាញវត្តមានដោយគ្មានបារម្ភភាពភ័យខ្លាចនៅតាមវាលស្រែ បឹងបួរត្រពាំង អូរ ប្រឡាយ និងវាលនៅជាយភូមិអ្នកស្រុក ឬជិតៗអ្នកស្រុក នៅភូមិសាស្ត្រស្រុកភ្នំស្រុក ស្រុកព្រះនេត្រព្រះ ក្រុងសិរីសោភ័ណ ស្រុកអូរជ្រៅ មង្គលបូរី ជាដើម។
គេបានឃើញសត្វស្លាបបង្ហាញវត្តមានដោយចុះរកស៊ីចំណីនិងហិចហើរប្រឡែងគ្នាទាំងហ្វុងៗ ទាំងនោះមានដូចជា ចង្កៀលខ្យង ក្រសារ ប្ររឹក ប្រវែក ក្អែកទឹក ក្អែកគោក ទុង ត្រយ៉ង ខ្វែក កុក ស្មោញ ចចាត ។ល។ កសិករនិងមន្ត្រីក្សេត្រសាស្ត្រអះអាងថា ៖ វត្តមានសត្វស្លាបច្រើន គួរសប្បាយចិត្ត ល្អមើល ហើយបង្ហាញថា មនុស្សនិងសត្វលែងចងគ្នាជាសត្រូវ លែងសូវមានការបរបាញ់ព្រានប្រម៉ង់។ ហើយតាមវាលស្រែស្រូវមានលក្ខណៈធម្មជាតិច្រើន មិនសូវមានសារជាតិគីមីឬថ្នាំពុលហួសប្រមាណដូចមុន ។
