រាជធានីភ្នំពេញ ៖ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានថ្លែងចំពោះមុខអ្នកសារព័ត៌មានថា ការផ្សព្វផ្សាយព័ត៌មានប្រកបដោយវិជ្ជាជីវៈ ក្រមសីលធម៌និងមានប្រភពច្បាស់លាស់គឺជាអាវក្រោះការពារខ្លួននាំឲ្យអ្នកសារព័ត៌មានរួចផុតពីទោសទណ្ឌ ។
រដ្ឋមន្ត្រីក្រសួងព័ត៌មានបានថ្លែងដូច្នេះនៅក្នុងពិធីបិទសិក្ខាសាលាស្ដីពី «ការផ្សាយព័ត៌មានប្រកបដោយវិជ្ជាជីវៈ និងក្រមសីលធម៌» នៅក្រសួងព័ត៌មានកាលពីព្រឹក ថ្ងៃទី១២ ខែកុម្ភៈ ឆ្នាំ២០២០ ដោយមានការចូលរួមពីអ្នកសារព័ត៌មានជិត២០០នាក់ដែលរៀបចំដោយនាយកដ្ឋានមណ្ឌលពត័មាន និងសោតទស្សន៏ ។
ឯកឧត្តម ខៀវ កាញារីទ្ធ បានបញ្ជាក់បន្ថែមថា ការប្រើប្រាស់ភាសាថ្លៃថ្នូរ និងការរក្សាភាពថ្លៃថ្នូរ របស់អ្នកសារព័ត៌មាន និងមន្ត្រីព័ត៌មាន គឺជាការរក្សាបាននូវតម្លៃថ្លៃថ្នូរ ជាពិសេសបាន បង្ហាញឱ្យដឹងពីកម្រិតសិក្សាអប់រំ ការយល់ដឹងរបស់អ្នកសារព័ត៌មានព្រមទាំងអ្នក ពាក់ព័ន្ធជាដើម។
ឯកឧត្តមថា ក្នុងនាមជាអ្នកសារព័ត៌មាន មិនត្រូវវាយតម្លៃអ្វីថាល្អ ឬអាក្រក់នោះទេ ក៏ប៉ុន្តែអ្នកសារព័ត៌មាន ត្រូវឈរនៅផ្លូវកណ្តាល ហើយអ្នកសារព័ត៌មាន ត្រូវនិយាយតែព្រឹត្តិការណ៍ណាដែលបានកើតមានឡើងនៅក្នុងសង្គម។ ក៏ប៉ុន្តេ សម្រាប់ការងារមួយចំនួនធំ វាអាចនឹងក្លាយជារនាំងសម្រាប់ការងារផ្សព្វផ្សាយព័ត៌មាន របស់អ្នកសារព័ត៌មានផងដែរ ៕
