ខេត្តកំពង់ធំ ៖ នៅថ្ងៃទី១១ ខែកុម្ភះ ឆ្នាំ២០២០ មន្ត្រីជំនាញកាំកុងត្រូលខេត្តកំពង់ធំ សហការជាមួយមន្ទីរពាណិជ្ជកម្មខេត្ត ប៉ុស្តិ៍នគបាលរដ្ឋបាលមូលដ្ឋាន ចុះត្រួតពិនិត្យមុខទំនិញ និងចំណីរអាហារតាំងលក់នៅផ្សារកំពង់ថ្ម។ នៅក្នុងប្រតិបត្តិការនេះ មន្ត្រីជំនាញដឹកនាំដោយលោក លៀង សុភា ប្រធានកាំកុងត្រូលសាខាខេត្តកំពង់ធំ បានធ្វើការដកហូតទឹកសុទ្ធគ្មានកាលបរិច្ឆេទ ចំនួនប្រាំប្រភេទផ្សេងគ្នា រួមមាន ទឹកសុទ្ធម៉ាក ជ័យឧត្តម ជិនិតរីវើរ វីសិននិច អ៊ីទិច និងម៉ាកម៉េងហ៊ុយជាផលិតរបស់សហគ្រាសធុនតូច និងមធ្យម ផលិតនៅក្នុងស្រុក ព្រមទាំងដកហូតទំនិញខូចគុណភាពហួសកាលបរិច្ឆេទប្រើប្រាស់ ដែលមានទឹកក្រូចដបតូច និងធំ ចំនួន ៣៣ដប និងនំស្រួយ ម៉ាកសាគូរ៉ា និងម៉ាកគូលែន ចំនួន៥.៣០គីឡូក្រាម។
ក្នុងប្រតិបត្តិការនេះដែរ លោក លៀង សុភា លើកឡើងថា ទឹកសុទ្ធប្រាំពីរម៉ាកខាងលើត្រូវបានមន្រ្តីជំនាញកាំកុងត្រូលជូនដំណឹងតាមរយៈលេខ ទូរស័ព្ទឲ្យធ្វើការចុះកាលបរិច្ឆេទប្រើប្រាស់លើសំបកដបមុននឹងធ្វើការចែកចាយទៅកាន់អតិថិជនរបស់ខ្លួនរួចមកហើយ និងបានទុករយៈពេលឲ្យធ្វើការកែប្រែស្របតាមស្តង់ស្តា ប៉ុន្តែមិនព្រមអនុវត្តតាម ទើបឈានដល់ការដកហូតពីអាជីវករ។ ជំហ៊ានបន្ទាប់ នឹងធ្វើការបិទទីតាំសិប្បកម្មប្រសិនបើនៅតែមិនរាងចាល។ ការអនុវត្តនូវយុទ្ធសាស្រ្តនិងផែនការ ដូច្នេះដើម្បីការពារសិទ្ធិអ្នកប្រើប្រាស់ ឲ្យទទួលបានទំនិញប្រកបដោយគុណភាព និងជួយថែរក្សាសុខភាព ដើម្បីរួមចំណែកអភិវឌ្ឍន៍ ប្រទេសជាតិឲ្យមានភាពរីកចម្រើន ជាពិសេសលើកស្ទួយគុណភាពទំនិញ របស់សិប្បកម្មខ្នាតតូច និងមធ្យម ក្នុងស្រុកឲ្យមានស្តង់ដា ឈានទៅរកការប្រកួតប្រជែងទីផ្សារក្នុងស្រុក និងក្រៅស្រុក។
ជាមួយគ្នានេះមន្រ្តីជំនាញ បានណែនាំ និងហាមឃាត់អាជីវករទាំងអស់ ឈប់ទទួលការទិញ ទឹកសុទ្ធគ្រប់ប្រភេទដែលគ្មានកាលបរិច្ឆេទប្រើប្រាស់។ ហើយមន្ត្រីជំនាញកាំកុងត្រូល នៅតែបន្តធ្វើការដកហូតទំនិញ ឬទឹកសុទ្ធដែលខ្វះស្តង់ដារបន្តទៀត។ ជាពិសេសនឹងឈានទៅធ្វើ សេចក្តីជូនដំណឹងបិទទីតាំងសហគ្រាសផលិតទាំងអស់នេះផងដែ។ លោកក៏បានអំពាវនាវដល់អាជីវករចូលរួមសហការគ្នាជាមួយមន្ត្រីជំនាញដើម្បីទប់ស្កាត់រាល់ទំនិញខូចគុណភាព ក្លែងក្លាយ និងហាមឃាត់សំដៅដល់ការការរពារសុខភាពរបស់យើងទាំងអស់។
