ខេត្តសៀមរាប ៖ កាលពីវេលាម៉ោង១៥និង១៥នាទីយប់ ថ្ងៃទី០៩ ខែកុម្ភៈ ឆ្នាំ២០២០ ត្រង់ចំណុចភូមិបឹងមាលា ឃុំបឹងមាលា ស្រុកស្វាយលើ ខេត្តសៀមរាប កម្លាំងសង្កាត់រដ្ឋបាលព្រៃឈើស្វាយលើ សហការជាមួយផ្នែករដ្ឋបាលព្រៃឈើជីក្រែង ធ្វើការបង្ក្រាបគោយន្តកន្ត្រៃ៣គ្រឿងលួចដឹកឈើអារប្រភេទលេខ៣ ។ ឈើទាំងនេះដឹកចេញពីព្រំប្រទល់ខេត្តព្រះវិហារនិងខេត្តសៀមរាប ដោយឆ្លងកាត់ស្រុកស្វាយលើ ហើយក៏ត្រូវកម្លាំងជំនាញឆ្មក់បង្ក្រាបជាក់ស្តែងតែម្តង។
លោកម៉ុង ប៊ុនលីម នាយខណ្ឌរដ្ឋបាលព្រៃឈើខេត្តសៀមរាបបានឲ្យដឹងថា កម្លាំងសង្កាត់រដ្ឋបាលព្រៃឈើស្វាយលើ សហការជាមួយផ្នែករដ្ឋបាលព្រៃឈើជីក្រែងឆ្មក់ធ្វើការបង្ក្រាបគោយន្តកន្ត្រៃដឹកឈើល្មើសច្បាប់ ជាប្រភេទឈើអារប្រភេទលេខ៣ ចំនួន៣គ្រឿង។ ឈើចំនួន១២៩សន្លឹក ស្មើនឹង៦,១៣៥ម៉ែត្រគូប ដឹកជញ្ជូនផល អនុផលព្រៃឈើដោយគ្មានលិខិតអនុញ្ញាតពីរដ្ឋបាលព្រៃឈើត្រូវបានបង្ក្រាបត្រង់ចំណុចភូមិបឹងមាលា ឃុំបឹងមាលា ស្រុកស្វាយលើ ខេត្តសៀមរាប ។លោកបន្តថា ចាប់បានតែឈើនិងគោយន្តប៉ុណ្ណោះ ម្ចាស់រត់គេចខ្លួនបាត់អស់។
បច្ចុប្បន្ន វត្ថុតាងរក្សាទុកនៅទីស្នាក់ការសង្កាត់រដ្ឋបាលព្រៃឈើស្វាយលើ ដើម្បីចាត់ការតាមផ្លូវច្បាប់៕
មេព្រៃ ឆ្មក់ចាប់ គោយន្តកន្ត្រៃ ដឹកឈើល្មើសច្បាប់ បីគ្រឿង ម្ចាស់រត់គេចខ្លួនបាត់អស់
Filed in: សន្តិសុខ សង្គម
