ខេត្តព្រះសីហនុ ៖ លោកជំទាវ ពិន នង និង ឯកឧត្តម នាយឧត្តមសេនីយ៍ កែវ តាំ នៅអង្គភាពនាយកដ្ឋានអធិការកិច្ចទូទៅ ក្រសួងការពារជាតិ មានចិត្តជ្រះថ្លា មនុស្សធម៌ដ៍អស្ចារ្យ ចំពោះប្រជាពលរដ្ឋក្រីក្រ ដែលអត់មានដីធ្លីរស់នៅ ហើយប្រជាពលរដ្ឋនោះបានរស់នៅលើដី ចិញ្ជើមផ្លូវជាតិលេខ៤ ត្រង់ចំណុចគីឡូម៉ែត្រលេខ១១៣,១១៤ ហៅថា កន្លែងជញ្ជីងថ្លឹងរថយន្តស្ទឹងច្រាល។
ប្រជាពលរដ្ឋក្រីក្រដែលមកតាំងទីលំនៅលើដីចំណីផ្លូវជាតិនេះ ហើយក៏មានប្រជាពលរដ្ឋមួយចំនួនតូច ក៏មកតាំងទីលំនៅលើដីកម្មសិទ្ធិ ស្របច្បាប់ របស់ឯកឧត្តម កែវ តាំ ដែលមានថ្លង់រឹងមាំរួចហើយ។
ប្រជាពលរដ្ឋក្រីក្រចំនួន២៨គ្រួសារនេះ រស់នៅក្នុងភូមិស្ទឹងច្រាល ឃុំអូរបាក់រទេះ ស្រុកកំពង់សីលា ខេត្តព្រះសីហនុ
ត្រូវបានលោកជំទាវ ពិន នង និងឯកឧត្តម នាយឧត្តមសេនីយ៍ កែវ តាំ បាន បរិច្ចាគដីរបស់គាត់ផ្ទាល់ខ្លួនដែលមានប្លង់កម្មសិទ្ធិ ស្របច្បាប់របស់កាត់ បែងចែកជូនប្រជាពលរដ្ឋចំនួន២៨គ្រួសារ នៅក្នុងនោះក្នុងមួយគ្រួសារបានក្បាលដី ៨ ម៉ែត្រ បណ្តោយ៣០ម៉ែត្រ។
ហើយក៍មានផ្លូវ៨ម៉ែត្រទៀត ។ មិនតែប៉ុណ្ណោះ លោកជំទាវ ពិន នង និងឯកឧត្តម កែវ តាំ បានបរិច្ចាគដីបន្ថែមទៀតដើម្បីទុកធ្វើ សាលារៀន១ខ្នងថែមទៀត សម្រាប់កូនៗ ប្រជាពលរដ្ឋបានមករៀនសូត្រ។
នៅក្នុងការបែងចែកដីធ្លីជូនប្រជាពលរដ្ឋនេះ មានលោកជំទាវ ពិន នង និងឯកឧត្តម នាយឧត្តមសេនីយ៍ កែវ តាំលោក សៅរ៍ ប៊ូរី វឌ្ឍនៈ អភិបាលស្រុកកំពង់សីលា និងលោក ដឹក ហ៊ូរ ប្រធានបក្សស្រុកកំពង់សីលា រួមទាំងលោកមេឃុំ ឆាយ ជាងហេង និងមន្ត្រី ភូមិបាលស្រុកកំពង់សីលា ដោយមានការបែងចែកក្បាលដីជូនប្រជាពលរដ្ឋតាមរយៈការចាប់ឆ្នោតយកលេខរៀងដីដោយស្មើភាពគ្នា។
កន្លងមក លោកអភិបាលស្រុកកំពង់សិលា តែងតែយកចិត្តទុកដាក់ចំពោះ ប្រជាពលរដ្ឋ នៅក្នុងការងារសហការជាមួយ ពលរដ្ឋដែលជួបការលំបាក ជាពិសេសនោះ លោកអភិបាលស្រុក បានយកចិត្តទុកដាក់ល្អចំពោះកិច្ចការងាជូនពលរដ្ឋ និងសហការជាមួយ លោកជំទាវ ពិន នង និងឯកឧត្តម កែវ តាំ ។ លោកអភិបាលស្រុកបានស្នើសុំដល់លោកជំទាវ សុំដីធ្លីរបស់ជំទាវដែលមានប្លង់ កម្មសិទ្ធិស្របច្បាប់របស់គាត់ សុំកាត់ឆ្វៀលដីជូនប្រជាពលរដ្ឋក្រីក្រ ដែលមកតាំងទីលំនៅលើដីចំណីផ្លូវជាតិលេខ៤ ដើម្បីការពារ សុវត្ថិភាពប្រជាពលរដ្ឋ ស្របពេលដែលរាជរដ្ឋាភិបាលកំពុងអភិវឌ្ឍវិស័យទេសចរណ៍ ផ្លូវជាតិលេខ៤និងពង្រីកបន្ថែមទៀត ងាយស្រួលភ្ញៀវទេសចរណ៍ជាតិ អន្តរជាតិ ដើម្បីការរីកចំរើនរបស់ប្រទេសជាតិយើង។
លោកជំទាវ ពិន នង និងឯកឧត្តម នាយឧត្តមសេនីយ៍ កែវ តាំ ពិតជាមនុស្សសច្ចធម៌ពិតប្រាកដមែន ចេះដឹង ចេះចែករំលែកទុក្ខរបស់ ប្រជាពលរដ្ឋ និងចេះជួយសង្គមតាមរយៈការចែករំលែកនេះ មិនមែនតែប៉ុណ្ណោះ លោកជំទាវ និងឯកឧត្តម កែវ តាំ តែងតែយកចិត្តទុកដាក់ចំពោះប្រជាពលរដ្ឋ មិនថានៅទីណានោះទេ លោកជំទាវ តែងតែជួយ ប្រជាពលរដ្ឋនិងសង្គមជានិច្ច។ កន្លងមក លោកជំទាវ និងឯកឧត្តម កែវ តាំ តែងតែចំណាយថវិកាផ្ទាល់ខ្លួនរបស់គាត់ ដែលបានខិតខំប្រឹងប្រែងរកថវិកាមកជួយកសាង សមិទ្ធផលនានាគ្រប់ទីកន្លែង។
ប្រជាពលរដ្ឋ និង មន្ត្រីរាជការ នៅក្នុងស្រុកកំពង់សីលា អរគុណចំពោះលោកជំទាវ ពិន នង និងឯកឧត្តម នាយឧត្តមសេនីយ៍ កែវ តាំ អស់ពីដួងចិត្តមិនអាចបំភ្លេចបាន៕
