ខេត្តពោធិ៍សាត់ ៖ កាលពីម្សិលមិញ សមត្ថកិច្ចចម្រុះខេត្តបានចុះប្រតិបត្តិការបង្ក្រាបបទល្មើសព្រៃឈើទ្រង់ទ្រាយធំ ក្នុងភូមិស្ទឹងថ្មី ឃុំប្រមោយ ស្រុកវាលវែង ខេត្តពោធិ៍សាត់ ដោយរឹបអូសបានឈើប្រណិតជាច្រើនម៉ែត្រគូប ។ ប្រតិបត្តិការនេះ ត្រូវបានធ្វើឡើងចំនួន៤ទីតាំងផ្សេងគ្នា ដោយទីតាំងទី១ នៅផ្ទះឈ្មោះ បូរា ទីតាំងទី២ នៅផ្ទះឈ្មោះ ធី ទីតាំងទី៣ នៅផ្ទះឈ្មោះ រតនា និងទីតាំងទី៤ នៅផ្ទះឈ្មោះ ក្លិន ។
តាមមន្ត្រីជំនាញបញ្ជាក់ថា ឈើប្រណិតដែលសមត្ថកិច្ចរឹបអូសបាននាពេលនេះ ត្រូវយកទៅរក្សាទុកនៅស្នាក់ការបរិស្ថាន ហើយក្រៅពីនេះក៏នៅមានទីតាំងស្តុកឈើមួយចំនួនទៀតដែលសមត្ថកិច្ចបាននិងកំពុងធ្វើការឡោមព័ទ្ធរងចាំអនុវត្តនិតិវិធី ។
គួរំលឹកថា កន្លងមកបទល្មើសព្រៃឈើ បានស្ងប់ស្ងាត់អស់មួយរយៈពេលមកហើយ តែពេលថ្មីនេះ បទល្មើសនេះហាក់កក្រើកឡើងវិញ បើទោះបីជាមានបទបញ្ជាពីប្រមុខរាជរដ្ឋាភិបាលក៏ដោយចុះ ៕
