ខេត្តស្ទឹងត្រែង ៖នៅភូមិកែងញៃឃុំសេកុងស្រុកសៀមប៉ាងខេត្តស្ទឹងត្រែង ប្រជាពលរដ្ឋប្រមាណ២០០គ្រួសារ ដែលកាលពីម្សិលមិញបានលើកគ្នាទៅរុះរើដុតផ្ទះពលរដ្ឋមួយគ្រួសារចោល ដោយសារតែសង្ស័យថា ម្ចាស់ផ្ទះដែលមានវ័យចំណាស់នោះចេះមន្តអាគមអាបធ្មប់ ហើយម្ចាស់ផ្ទះដែលត្រូវគេដុតចោលឈ្មោះ លៀម ប៉ក អាយុ៦៧ឆ្នាំ ។
អធិការនគរបាលស្រុកសៀមប៉ាងបានឱ្យដឹងថាអ្នកភូមិ១៧៦គ្រួសារប្រដាប់ដោយកាំបិតដែកគាស់បានផ្ទុះការតវ៉ារុះរើផ្ទះឈ្មោះ លៀម ប៉ក និងដុតចោលតែម្តង ខណដែលផ្ទះនោះសង់ពីឈើបាំងក្តារដំបូលប្រក់ដែកស័ង្កសីទំហំ៦មx៧ម ។លោកបន្តថា ករណីនេះបើយោងតាមកំណត់ហេតុសម្របសម្រួលកាលពីថ្ងៃទី២២ ខែមករា ២០២០ របស់អាជ្ញាធរឃុំស្រុក ដោយមានការចូលរួមពីលោកស្រី ផាត់ រ៉ាណា អភិបាលរងស្រុកជាតំណាង ជាមួយឈ្មោះ លៀមប៉ក និងប្រជាពលរដ្ឋពាក់ព័ន្ធចេះអំពើអាបធ្មប់។
លោកបន្ថែមថា នៅក្នុងការសម្របសម្រួលនោះ ឈ្មោះ លៀម ប៉ក សន្យានឹងរុះរើផ្ទះដោយខ្លួនឯងតែរហូតដល់ថ្ងៃកំណត់បែរជាគេចខ្លួនបាត់ជាមួយភរិយាមិនធ្វើតាមសន្យា ទើបប្រជាពលរដ្ឋក្នុងភូមិលើកគ្នារុះរើនិងដុតចោលតែម្តង។នៅលើផ្ទះនោះប្រជាពលរដ្ឋបានប្រទះឃើញចានឆ្នាំងក្បាលឆក់ត្រី៕
