ខេត្តព្រះវិហារ ៖ កាលពីថ្ងៃទី០៤ ខែកុម្ភៈ ឆ្នាំ២០២០ មន្ត្រីនៃមន្ទីរវប្បធម៌ និងវិចិត្រសិល្បៈខេត្ត សហការជាមួយកម្លាំងកងរាជអាវុធហត្ថខេត្តព្រះវិហារ បានចុះឃាត់ខ្លួនជនសង្ស័យជាមេខ្លោង និងបក្ខពួកចំនួន៥នាក់ ព្រមទាំងដកហូតវត្ថុតាងបទល្មើសមួយចំនួន នៅពេលកំពុងធ្វើសកម្មភាពរាវរកនិងគាស់យកវត្ថុបុរាណ ដើម្បីជួញដូរល្មើសច្បាប់ បញ្ជូនមកអនុវត្តតាមផ្លូវច្បាប់ ។
ប្រតិបត្តិការនោះត្រង់ចំណុចប្រាសាទខ្នារ ស្ថិតនៅក្នុងភូមិក្រឡាពាស ឃុំព្រីងធំ ស្រុកជាំក្សាន្ត នៃដែនដីខេត្តព្រះវិហារ ក្រោមការដឹកនាំបញ្ជាការបញ្ជាផ្ទាល់ដោយលោក ឆេង ហៀត មេបញ្ជាការរងកងរាជអាវុធហត្ថខេត្ត និងមន្ត្រីអាវុធហត្ថខេត្តចំនួន ១៥នាក់ ។
ជាលទ្ធផលសមត្ថកិច្ចបានធ្វើការឃាត់ខ្លួនជនសង្ស័យជាមេខ្លោងនិងបក្ខពួកជួញដូរវត្ថុបុរាណបានចំនួន៥នាក់មានឈ្មោះដូចខាងក្រោម៖
ទី១, ឈ្មោះហេងប៊ុន សុខុន ភេទប្រុស អាយុ៣៧ឆ្នាំ រស់នៅភូមិតាវៀន ឃុំសាលាកំរើក ក្រុងសៀមរាប ជាថៅកែដកហូតបានវត្ថុតាងរូបលោហៈ ។ ទី២, ឈ្មោះ ប៊ុន សាន ភេទប្រុស អាយុ៤៥ឆ្នាំ ជាមេប៉ុស្តិ៍នគរបាលរដ្ឋបាលឃុំព្រីងធំ ។ ទី៣, ឈ្មោះសៀក សុភ័ក្រ ភេទប្រុស អាយុ៥៤ឆ្នាំ ។ ទី៤, ឈ្មោះង៉ែត តៃ ភេទប្រុស អាយុ៥៤ឆ្នាំ និងទី៥, ឈ្មោះព្រលាន ព្លឿង ភេទប្រុស អាយុ៥៤ឆ្នាំ ជនសង្ស័យទាំង៣នាក់ ជាកសិករ រស់នៅភូមិគោកព្រិច ឃុំគោករមៀត ស្រុកពួក ខេត្តបន្ទាយមានជ័យ ។
ក្រោយធ្វើការឃាត់ខ្លួនជនសង្ស័យទាំង៥នាក់រួចហើយ សមត្ថកិច្ចដកហូតបានឧបករណ៍រាវរកវត្ថុបុរាណចំនួន២គ្រឿង នៅខាងត្បូងប្រាសាទខ្នារប្រមាណ១០០ម៉ែត្រ ដកហូតរថយន្តដែលជាមធ្យោបាយបម្រើឱ្យការធ្វើសកម្មភាពប្រព្រឹត្តបទល្មើសចំនួន ២គ្រឿង ។
ប្រធានមន្ទីរវប្បធម៌ និងវិចិត្រសិល្បៈខេត្តព្រះវិហារ បានធ្វើកំណត់ហេតុផ្ទេរប្រគល់ជនសង្ស័យ និងវត្ថុតាងទៅឱ្យកម្លាំងកងរាជអាវុធហត្ថខេត្តដើម្បីកសាងសំណុំរឿងបញ្ជូនទៅកាន់តុលាការខេត្តចាត់ការទៅតាមនីតិវិធីច្បាប់ ៕
