ខេត្តពោធិ៍សាត់ ៖ នារីម្នាក់មានឈ្មោះ អា មុំ បានបង្ហោះសារនៅក្នុងបណ្តាញសង្គម Facebook ផ្ទាល់ខ្លួនដែលមានឈ្មោះថា អាមុំ អាមុំ អ៊ុតសក់ ស្អាតពិត ដែលបានសរសេររៀបរាប់យ៉ាងដូច្នេះថា «អ្នកពោធិ៍សាត់យើងប្រយ័ត្នប្រយែង ជំងឺកូរ៉ូណា បានឆ្លង១នាក់ហើយ»។ ក្រោយមកសាលាខេត្តពោធិ៍សាត់ បានចេញសេចក្ដីបំភ្លឺមួយដោយបានបញ្ជាក់ថា (គ្មានករណីឆ្លងជំងឺផ្លូវដង្ហើម បង្កឡើងដោយវីរុស កូរ៉ូណា«Coronavirus» កើតឡើងនៅក្នុងខេត្តពោធិ៍សាត់នោះទេ។ ការផ្សាយនេះ អាចជាចេតនាអាក្រក់របស់ជនបំពុលសង្គម ដើម្បីបំភ័យភ្ញៀវទេសចរណ៍ជាតិ-អន្តរជាតិ និងបង្កចលាចលសង្គមតែប៉ុណ្ណោះ។
កម្លាំងនគរបាលប៉ុស្តិ៍ផ្ទះព្រៃ បានសហការជាមួយកម្លាំងអធិការដ្ឋាននគរបាល ក្រុងពោធិ៍សាត់ បានចុះឃាត់ខ្លួនស្ត្រីឈ្មោះ អាមុំ ដែលសព្វថ្ងៃប្រកបអាជីវកម្មលក់គ្រឿងសម្អាង និងអ៊ុតសក់ ដែលមានយីហោ«អាមុំ អ៊ុតសក់» ស្ថិតក្នុងភូមិពាលញែក២ សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ នៅព្រឹកថ្ងៃទី២៩ ខែមករា ឆ្នាំ២០២០នេះ ដើម្បីធ្វើការសាកសួរពាក់ព័ន្ធទៅនឹងការបង្ហោះព័ត៌មានមិនពិត ទាក់ទងនឹងការឆ្លងជំងឺផ្លូវដង្ហើម បង្កឡើងដោយវីរុស កូរ៉ូណា «Corona Virus» នៅខេត្តពោធិ៍សាត់។ បច្ចុប្បន្នស្ត្រីម្នាក់ខាងលើ សមត្ថកិច្ចធ្វើកិច្ចសន្យាបញ្ឈប់ និងអប់រំ រួចឱ្យត្រឡប់ទៅលំនៅដ្ឋានវិញ ៕
