ខេត្តបន្ទាយមានជ័យ ៖ នៅព្រឹកថ្ងៃទី២៨ ខែមករា ឆ្នាំ២០២០ អាជ្ញាធរខេត្តបន្ទាយមានជ័យ ច្រកទ្វារព្រំដែនអន្តរជាតិប៉ោយប៉ែតខេត្តបន្ទាយមានជ័យ បន្តចែកម៉ាស់ (mask) ជូនដល់ភ្ញៀវជាតិ អន្តរជាតិ ប្រជាពលរដ្ឋ ដើម្បីការពារការចម្លងដោយសារជំងឺរលាកសួត បង្កដោយវីរុស កូរ៉ូណាប្រភេទថ្មី (nCoV2019) ដែលបានកំពុងរាតត្បាតនៅប្រទេសចិន និងបណ្តាប្រទេសមួយចំនួនទៀត។
ពិធីចែកម៉ាស់នេះ ធ្វើឡើងក្រោមវត្តមាន លោក អ៊ុំ រាត្រី អភិបាលខេត្តបន្ទាយមានជ័យ លោក ង៉ោ ម៉េងជ្រួន អភិបាលរងខេត្ត លោក គាត ហ៊ុល អភិបាលក្រុងប៉ោយប៉ែត លោកឧត្តមសេនីយ៍ត្រី អ៊ី ចំរើន នាយប៉ុស្តិ៍នគរបាលច្រកទ្វារអន្តរជាតិប៉ោយប៉ែត និងមន្ត្រីក្រោមឱវាទទាំងអស់ រួមនិងមន្ត្រីជំនាញសុខាភិបាលពាក់ព័ន្ធផងដែរ។
ក្នុងឱកាសនោះ លោក អ៊ុំ រាត្រី អភិបាលខេត្ត និងក្រុមការងារ ក៍បានអញ្ជើញរៀបចំឡានសាលាខេត្ត២គ្រឿងទទួលនិស្សិតអាហារូបករណ៍លោក ស សុខា ទៅសិក្សានៅប្រទេសចិនត្រឡប់មកវិញ (ថ្ងៃសម្រាកវិស្សមកាល) នៅច្រកទ្វារព្រំដែនអន្តរជាតិផងដែរ ហើយសម្រាប់និស្សិតខេត្តឆ្ងាយព្រៃវែង បាត់ដំបង ក៏បានរៀបចំឡានដឹកជញ្ជូនទៅបន្តទៀត៕
គិតត្រឹមវេលាល្ងាចថ្ងៃទី២៧ ខែមករា ឆ្នាំ២០២០ម្សិលមិញនេះ កម្ពុជា បានរកឃើញករណីជំងឺផ្លូវដង្ហើមថ្មី ដែលបង្កឡើងដោយវីរុសកូរ៉ូណា នៅលើជនជាតិចិនម្នាក់ ខណដែលជនជាតិចិនម្នាក់នេះបានចាកចេញពីទីក្រុង វូហាន ប្រទេសចិន ចូលមកកាន់ប្រទេសកម្ពុជា កាលពីថ្ងៃទី២៣ ខែមករា ឆ្នាំ២០២០ តាមអាកាសយានដ្ឋានអន្តរជាតិ ព្រះសីហនុ។ នេះបើយោងតាមសេចក្តីប្រកាសព័ត៌មានផ្លូវការរបស់ក្រសួងសុខាភិបាល ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលក៏បានថ្លែងនៅក្នុងសន្និសីទកាសែតនាព្រលប់ ថ្ងៃទី២៧ ខែមករា ឆ្នាំ២០២០ ដែរថា អ្នកជំងឺដែលឆ្លងវីរុសកូរ៉ូណាថ្មីនេះ បាននឹងកំពុងដាក់នៅដាច់ដោយឡែកពីគេនៅក្នុងមន្ទីរពេទ្យខេត្តព្រះសីហនុ។
បុរសជនជាតិចិន ដែលឆ្លងវីរុសនេះមានឈ្មោះ ចា ជិនហួរ (Jia Jianhua) ភេទប្រុស អាយុ៦០ ឆ្នាំ ធ្វើដំណើរមកពីទីក្រុង វូហាន ជាមួយក្រុមគ្រួសារ៤នាក់ ដែលសំណាកបានយកមកធ្វើវិភាគទាំងបួននាក់នេះមានវិជ្ជមានវីរុស កូរ៉ូណា តែម្នាក់គត់គឺលោក ចា ជិនហួរ។
តាមសេចក្តីជូនដំណឹងរបស់ក្រសួងសុខាភិបាលបានបញ្ជាក់បន្ថែមថា ក្រុមគ្រួសារជនជាតិចិនទាំង៤នាក់រួមមាន ៖
១. លោក ចា ជិនហួរ (Jia Jianhua) ភេទប្រុស អាយុ ៦០ឆ្នាំ កាន់ប៉ាស្ព័រលេខ E54319891 ( វិជ្ជមាន )
២. លោកស្រី វ៉ាង លីងជេន (Wang Lingzhen) ភេទស្រី អាយុ ៥៧ឆ្នាំ កាន់ប៉ាស្ព័រលេខ E06137433 ( អវិជ្ជមាន )
៣. លោក សៅ យ៉ាន់ (Xiao Yan) ភេទប្រុស អាយុ ៣៨ឆ្នាំ កាន់ប៉ាស្ព័រលេខ ED0134348 ( អវិជ្ជមាន )
៤. លោកស្រី ចា រ៉ុយស៊ន់ (Jia Ruixuan) ភេទស្រី អាយុ ៣៣ឆ្នាំ កាន់ប៉ាស្ព័រលេខ E24490509 ( អវិជ្ជមាន ) ៕
