រាជធានីភ្នំពេញ ៖ ឯកឧត្តម ខៀវ កាញរីទ្ធ រដ្ឋមន្ត្រីក្រសួងព័ត៌មាន អញ្ជើញជួបប្រជុំជាមួយក្រុមមេធាវីស្ម័គ្រចិត្តសម្តេចតេជោ ហ៊ុន សែន ដែលដឹកនាំដោយលោក គី តិច កាលពីព្រឹកថ្ងៃទី២០ ខែមករា ឆ្នាំ២០២០ ដើម្បីរៀបចំផែនការដំណើការ ក្នុងការការពារក្តីជូនអ្នកសារព័ត៌មាន ដែលធ្វើការតាមក្រមសីលធម៌និងវិជ្ជាជីវៈ។
ឯកឧត្តមបញ្ជាក់ថា អ្នកសារព័ត៌មានដែលធ្វើការតាមក្រមសីលធម៌វិជ្ជាជីវៈ ពេលផ្សព្វផ្សាយទៅត្រូវគេប្តឹងនឹងត្រូវបានទទួលសិទ្ធិការពារក្តីពីមេធាវីសម្តេចតេជោ។ ចំណែកអ្នកលេង Facebook បើសិនជាធ្វើអត្ថាធិប្បាយប៉ះពាល់អ្នកដទៃ ហើយត្រូវគេប្តឹងនោះ នឹងមិនត្រូវទទួលបានសិទ្ធិនេះឡើយ ដោយសារពួកគេមិនមែនជាអ្នកសារព័ត៌មាននោះទេ។
អ្នកលេង Facebook មិនមែនជាអ្នកសារព័ត៌មាននោះទេ ហើយក្រុមមេធាវីស្ម័គ្រចិត្តសម្តេចតេជោ ហ៊ុន សែន ការពារតែអ្នកសារព័ត៌មានពិតប្រាកដ ពោលគឺជាអ្នកសារព័ត៌មាន ដែលធ្វើការក្រោមអង្គភាពព័ត៌មាន ដែលបានចុះបញ្ជីនៅក្រសួងព័ត៌មាន និងទទួលស្គាល់ដោយច្បាប់ត្រឹមត្រូវ។
ដោយឡែកលោក គី តិច បានឲ្យដឹងថា ក្រុមមេធាវីស្ម័គ្រចិត្តសម្តេចតេជោ ចាប់ផ្តើមបើកទទួលការពារសិទ្ធិអ្នកព័ត៌មានវិជ្ជាជីវៈចាប់ពីថ្ងៃនេះតទៅ ហើយសម្រាប់អ្នកព័ត៌មានដែលធ្វើការតាមក្រមសីលធម៌វីជ្ជាជីវៈ ប៉ុន្តែត្រូវគេប្តឹង បើត្រូវការមេធាវីស្ម័គ្រចិត្ត សម្តេចតេជោឲ្យជួយការពារក្តី ត្រូវស្នើតាមរយៈទៅក្រសួងព័ត៌មានជាមុនសិន។
សូមបញ្ជាក់ដែរថា ការជួបប្រជុំរវាងថ្នាក់ដឹកនាំក្រសួងព័ត៌មាន និងក្រុមមេធាវីស្ម័គ្រចិត្តសម្តេចតេជោ បានធ្វើឡើងបន្ទាប់ពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសពីល្ងាចថ្ងៃទី១៤ ខែមករា ឆ្នាំ២០២០ នៅមជ្ឈមណ្ឌលសន្និបាត និងពិព័រណ៍កោះពេជ្រ ក្នុងឱកាសសម្តេចអញ្ជើញសំណេះសំណាល និងពិសាអាហារសាមគ្តី ជាមួយអ្នកសារព័ត៌មានជិត៦ពាន់នាក់៕
