រាជធានីភ្នំពេញ ៖ នៅមុខសវនាការនាថ្ងៃទី១៥ ខែមករា ឆ្នាំ២០២០ លោក កឹម សុខា អតីតប្រធានគណបក្សសង្គ្រោះជាតិថា លោកទទួលស្គាល់នូវវីដេអូដែលនិយាយអំពីដំណើររឿងបរទេសបានបណ្ដុះបណ្ដាល និងបង្រៀនលោកអំពីរបៀបនៃការផ្លាស់ប្ដូររបបគឺជាវីដេអូរបស់លោកយ៉ាងពិតប្រាកដ ។ ទន្ទឹមនោះលោកសុំឲ្យចាក់វីដេអូនោះទាំងស្រុងព្រោះវីដេអូដែលតុលាការ យកមកចាក់នៅចំពោះមុខសវនាការនោះមានការកាត់ត ។
លោក កឹម សុខា ក៏បានបដិសេធនូវចំណុចមួយនៅត្រង់ថា វីដេអូដែលចាក់នេះមិនគ្រប់ទេ ពោលបានកាត់ជាកំណាត់ៗ ខណៈដែលចំណុចសំខាន់មួយចំនួន ជាផលប្រយោជន៍ សម្រាប់គាត់ គឺត្រូវបានកាត់ចេញ។ លោក កឹម សុខា នាពេលនោះក៏បានប្រគល់ USB ថ្មីមួយទៅក្រុមប្រឹក្សាជំនុំជម្រះ ដោយអះអាងថា ជាវីដេអូឃ្លឹបទាំងស្រុងរបស់លោក។ យ៉ាងណាក៏ដោយតំណាងអយ្យការបានយក USB ទៅពិនិត្យជាមុនសិន ។
តាមលោក គី តិច មេធាវីរាជរដ្ឋាភិបាលបានបន្ថែមថា ពេញមួយព្រឹកថ្ងៃពុធ ទី១៥ ខែមករា ឆ្នាំ ២០២០ អង្គសវនាការ មានការជជែកដេញដោលលើភស្តុតាង ជាវីដេអូ ពាក់ព័ន្ធនឹងបទសន្និដ្ឋិភាពជាមួយបរទេស របស់លោកកឹម សុខា តែប៉ុណ្ណោះ មិនទាន់ជជែកដល់អង្គហេតុ នៅឡើយទេ ។
ពាក់ព័ន្ធនឹងសំណួរអ្នកសារព័ត៌មានដែលសួរថា លោក កឹម សុខា បានបង្ហោះសារតាមរយៈ ហ្វេសប៊ុកដោយបដិសេធនូវរាល់ភស្តុតាងនិងការចោទប្រកាន់លោកទាក់ទងទោសក្បត់ជាតិ នោះ, លោក គី តិច បានឆ្លើយតបថា ជាធម្មតាទេជនជាប់ចោទតែងតែបដិសេធនូវភស្តុតាង និងការចោទប្រកាន់ ។ ប៉ុន្តែយើងមានភស្តុតាងដាក់បន្ទុកច្រើនសន្ធឹកសន្ធាប់ ពាក់ព័ន្ធសំណុំរឿង កឹម សុខា នេះ ។
ដោយឡែកលោក គី តិច បានច្រានចោលនូវអ្វីដែលអ្នកកាសែតបានចោទសួរថា តើករណីលោក កឹម សុខា ជារឿងនយោបាយ ឬយ៉ាងណា? ខណដែលលោក គី តិច ប្រតិកម្មថា វាមិនមែនជារឿងនយោបាយនោះទេ តែវាជារឿងពាក់ព័ន្ធនឹងផ្លូវច្បាប់ដែលច្បាប់បានចែងច្បាស់លាស់ ។ ដូច្នេះកុំយល់ច្រឡំថា រឿង កឹម សុខា ជារឿងនយោបាយឲ្យសោះ ៕
ប៉ុន្តែតាមរយៈហ្វេសប៊ុកផ្ទាល់ខ្លួន អតីតប្រធានគណបក្សប្រឆាំងលោក កឹម សុខា បានប្រកាសច្រានចោលនូវរាល់ការចោទប្រកាន់ទាំងឡាយ ពាក់ព័ន្ធទោសក្បត់ជាតិ ដោយលោកអះអាងថា លោកមិនបាននាំបរទេស ឬភ្នាក់ងារបរទេសណាមកប្រទូស្តរ៉ាយ ឬឈ្លានពានព្រះរាជាណាចក្រកម្ពុជានោះឡើយ ។
លោក កឹម សុខា បានសរសេរនៅលើ Facebook ថា “ខ្ញុំបដិសេធទាំងស្រុង នូវការចោទប្រកាន់មកលើរូបខ្ញុំ ពីបទសន្ទិដ្ឋិភាពជាមួយ បរទេស។ ខ្ញុំមិនបាននាំរដ្ឋបរទេស ឬភ្នាក់ងារបរទេសណា មកប្រទូសរ៉ាយ ឬឈ្លានពាន ព្រះរាជាណាចក្រកម្ពុជាឡើយ។ ខ្ញុំមិនបានប្រព្រឹត្តដូចការចោទនេះទេ ជាពិសេស ខ្ញុំមិនបានប្រព្រឹត្តនូវអំពើទាំងឡាយណាដែលនាំឲ្យប៉ះពាល់ ដល់ផលប្រយោជន៍ប្រទេសជាតិឡើយ”។
លោកបន្តថា សកម្មភាពទាំងអស់របស់លោក គឺផ្តោតលើសិទ្ធិមនុស្ស និងលទ្ធិប្រជាធិបតេយ្យ ដោយអហិង្សា និងសន្តិវិធី ស្របតាមរដ្ឋធម្មនុញ្ញកម្ពុជា។ គ្រប់សកម្មភាពនយោបាយ គឺផ្តោតលើការបោះឆ្នោត ដោយសេរី ត្រឹមត្រូវ យុត្តិធម៌ ដែលឆ្លុះបញ្ចាំងពីឆន្ទៈ របស់ប្រជាពលរដ្ឋខ្មែរ។ លោកនៅតែទាមទារ ឲ្យតុលាការទម្លាក់ចោល ជាស្ថាពរចំពោះបទចោទ ដើម្បីអាចអនុវត្តបាននូវសិទ្ធិ សេរីភាពនយោបាយពេញលេញ ក្នុងការចូលរួមបម្រើជាតិមាតុភូមិ និងការពារផលប្រយោជន៍របស់ប្រជាពលរដ្ឋខ្មែរ។
សូមជម្រាបថា នៅព្រឹកថ្ងៃទី១៥ ខែមករា ឆ្នាំ២០២០នេះ សាលាដំបូងរាជធានីភ្នំពេញ ចាប់ផ្តើមសវនាការសំណុំរឿងលោក កឹម សុខា អតីតប្រធាននៃអតីតគណបក្សសង្គ្រោះជាតិ ក្រោមបទចោទប្រកាន់ សន្និដ្ឋិភាពជាមួយបរទេស ឬ ក្បត់ជាតិ តាមមាត្រា៤៤៣នៃ ក្រមព្រហ្មទណ្ឌ។ សវនាការនេះ នឹងធ្វើឡើងនៅសាលសវនាការទី១ នៃសាលាដំបូងរាជធានី ភ្នំពេញ ដែលមានវត្តមានលោក កឹម សុខា និងអ្នកពាក់ព័ន្ធជាច្រើននាក់ផងដែរ។
នៅខាងមុខតុលាការក៏មានកងកម្លាំងជាច្រើននាក់បានដាក់ពង្រាយ ជុំវិញ ដើម្បីរៀបចំសណ្តាប់ធ្នាប់សាធារណៈ រួមទាំងការពារសន្តិសុខផង ៕
