អន្តរជាតិ ៖ សម្ពាធប្រឆាំងនឹងសហរដ្ឋអាមេរិកនៅអ៊ីរ៉ាក់បានផ្ទុះឡើងកាលពីថ្ងៃអាទិត្យ ដោយសភាអ៊ីរ៉ាក់ទាមទារឱ្យបណ្តេញកងទ័ពអាមេរិករាប់ពាន់នាក់ចេញពីទឹកដីខ្លួនជាបន្ទាន់ ក្រោយទីក្រុងវ៉ាស៊ីនតោនបានធ្វើឃាតមេទ័ពកំពូលម្នាក់របស់អ៊ីរ៉ង់ នៅទីក្រុងបាកដាដ។ នេះបើតាមការដកស្រង់ការផ្សាយចេញពីសារព័ត៌មាន CNA នៅព្រឹកនេះ។
ភាពប្រែប្រួលខាងលើនៃទំនាក់ទំនងរវាងអ៊ីរ៉ាក់និងអាមេរិកបានកើតមានឡើង បន្ទាប់ពីយោធាអាមេរិកធ្វើសកម្មភាពវាយប្រហារដោយយន្តហោះដ្រូន កាលពីថ្ងៃសុក្រសប្តាហ៍មុន នៅក្បែរអាកាសយានដ្ឋានអន្តរជាតិនៃទីក្រុងបាកដាដ ដើម្បីសម្លាប់មេទ័ពកំពូលម្នាក់របស់អ៊ីរ៉ង់គឺលោក Qasem Soleimani ហើយវាក៏បានបណ្តាលឲ្យមេទ័ពធំម្នាក់របស់អ៊ីរ៉ាក់ផ្ទាល់ Abu Mahdi al-Muhandis) បាត់បង់ជីវិតថែមទៀតផង។
យោងតាមសេចក្តីប្រកាសរបស់ប្រធានសភាអ៊ីរ៉ាក់ Mohammed Halbusi) សភាអ៊ីរ៉ាក់ក្នុងសំឡេងភាគច្រើនបានបោះឆ្នោតជំរុញឲ្យរដ្ឋាភិបាលអ៊ីរ៉ាក់លុបចោលនូវសំណើរបស់ខ្លួន ស្តីពីការសុំជំនួយរបស់ក្រុមយោធាចម្រុះអន្តរជាតិ ពោលគឺឲ្យកងកម្លាំងនេះចាកចេញពីប្រទេសអ៊ីរ៉ាក់វិញ។
គួរបញ្ជាក់ថា បច្ចុប្បន្នកងទ័ពអាមេរិកប្រមាណ ៥,២០០នាក់ កំពុងមានវត្តមាននៅតាមមូលដ្ឋានយោធាទូទាំងប្រទេសអ៊ីរ៉ាក់ ដើម្បីជួយជ្រោមជ្រែងកងទ័ពអ៊ីរ៉ាក់ ទប់ស្កាត់ការងើបឡើងមកវិញនៃក្រុមភេរវករ ISIS៕ (ដកស្រង់)
បន្ទាប់ពីអាមេរិក សម្លាប់មេទព័កំពូលអ៊ីរ៉ង Soleimani សភាអ៊ីរ៉ាក់ ផ្ទុះការទាមទារ ឲ្យបណ្តេញ កងទ័ពអាមេរិក ចេញពីអ៊ីរ៉ាក់
Filed in: អន្តរជាតិ
