ខេត្តកំពង់ធំ ៖ រសៀលថ្ងៃទី ១៤ ខែធ្នូ ឆ្នាំ២០១៩ សភាពសហព័ន្ធកីឡាបាល់ទាត់កម្ពុជាបានរៀបចំការប្រកួតបាល់ទាត់ជ្រើសរើសជើងឯកយុវជនអាយុក្រោម ១៦ឆ្នាំនិង ១៨ឆ្នាំ ឆ្នាំ២០១៩ ក្រោមអធិបតីភាពឯកឧត្តម ប៊ូជុំ សេរី អនុរដ្ឋលេខាធិការក្រសួងអប់រំយុវជននិងកីឡា ឯកឧត្តមនាយឧត្តមសេនីយ៍ សៅ សុខា ប្រធានសហព័ន្ធបាល់ទាត់កម្ពុជា ឯកឧត្តម ឈុន ឈន់ ប្រធានក្រុមប្រឹក្សាខេត្ត ឯកឧត្តម ចាន់ តារា អភិបាលរងខេត្ត ដោយមានការអញ្ជើញចូលរួមពីឯកឧត្តម លោកជំទាវ លោក លោកស្រី មន្ត្រីរាជការខេត្តកំពង់ធំ រួមទាំងកីឡាករជាច្រើនរូប នៅវិទ្យាល័យកំពង់ធំ ។
ឯកឧត្តមនាយឧត្តមសេនីយ៍ សៅ សុខា ប្រធានសហព័ន្ធបាល់ទាត់កម្ពុជា បានលើកឡើងថា ដោយអនុលោមទៅតាមផែនការយុទ្ធសាស្ត្ររយៈពេលវែងក្នុងការអភិវឌ្ឍវិស័យបាល់ទាត់នៅព្រះរាជាណាចក្រកម្ពុជា សហព័ន្ធកំពុងអនុវត្តជាជំនាញយ៉ាងសកម្មនូវទិសដៅអាទិភាព មាន ១ .ការអភិវឌ្ឍបាល់ទាត់ថ្នាលនិងយុវជន ២. ការអភិវឌ្ឍន៍ក្លិបនិងសមាគមជាសមាជិក ៣. ការអភិវឌ្ឍការប្រកួត ៤. ការអភិវឌ្ឍន៍ការគ្រប់គ្រងនិងច្បាប់ ៥.ការអភិវឌ្ឍន៍ជម្រើសជាតិ ៦.ការអភិវឌ្ឍន៍ហេដ្ឋារចនាសម្ព័ន្ធ ៧.ការអភិវឌ្ឍគ្រូបង្វឹក ៨.ការអភិវឌ្ឍអាជ្ញាកណ្ដាល ៩.ការអភិវឌ្ឍបាល់ទាត់ស្ត្រីបាល់ទាត់ក្នុងសាល និងបាល់ទាត់ឆ្នេរខ្សាច់ ១០.ការអភិវឌ្ឍការរៀបចំការប្រកួតលក្ខណៈអន្តរជាតិ១១.ការអភិវឌ្ឍវិទ្យាសាស្ត្រ វេជ្ជសាស្ត្រកីឡា១២.ការអភិវឌ្ឍផ្សព្វផ្សាយនិងទីផ្សារនិង១៣.ការអភិវឌ្ឍន៍អ្នកគាំទ្រ ។
ឯកឧត្តមបន្តថា ការប្រកួតកីឡាមានគោលបំណងបំផុសចលនាបាល់ទាត់នៅក្នុងស្រទាប់កុមារនិងយុវជនដើម្បីឱ្យគេចូលរួមវិស័យកីឡាលេងកីឡាដើម្បីសុខភាពដើម្បីមានថាមពលគ្រប់គ្រាន់ក្នុងការរៀនសូត្រនិងកាត់បន្ថយភាពអសកម្មក្នុងសង្គមនិងគ្រួសារជ្រើសរើសកីឡាករមានទេពកោសល្យល្អៗដើម្បីចូលរួមក្រុមជម្រើសជាតិក្នុងការប្រកួតលក្ខណៈអន្តរជាតិផ្លូវការ ពិសេសត្រៀមខ្លួនឲ្យបានរួចរាល់សម្រាប់ការប្រកួតកីឡាករស៊ីហ្គេមឆ្នាំ ២០២៣ ដែលកម្ពុជានឹងធ្វើជាម្ចាស់ផ្ទះផ្ដល់ឱកាសឲ្យកីឡាករមកពីទីកន្លែងផ្សេងៗបានជួបគ្នាលេងបាល់ទាត់ជាមួយគ្នានឹងបានឃើញអំពីការប្រកួតបាល់ទាត់តាមក្បួនខ្នាតត្រឹមត្រូវនឹងយល់ដឹងគោរពគ្នាទៅវិញទៅមកគោរពអាជ្ញាកណ្ដាលដឹកនាំប្រកួតគោរពច្បាប់ជាដើម។សម្រាប់ទីកន្លែងនិងកម្មវិធីប្រកួតប្រព្រឹត្តទៅនៅទីលានទូទាំង ២៥ រាជធានីខេត្ត ចាប់ពីថ្ងៃទី ១៤ ខែធ្នូ ឆ្នាំ២០១៩ រហូតដល់ថ្ងៃទី២១ ខែមិថុនា ឆ្នាំ២០២០ ក្រុមចូលលេងក្រុមយុវជននៃសាលាតម្រង់ទិសសហព័ន្ធកីឡាបាល់ទាត់កម្ពុជាទូទាំង២៥ រាជធានីខេត្ត និងក្រុមយុវជនប្រកួតក្នុងលីកសរុប ៣៩ ក្រុម សម្រាប់យុវជនអាយុក្រោម ១៨ឆ្នាំនិង ៣២ ក្រុមសម្រាប់យុវជនក្រោម ១៦ ឆ្នាំ។ ប្រព័ន្ធប្រកួតបែងចែកជា ៤ ដំណាក់កាល ដំណាក់កាលទី ១ បែងចែកជា ៨ ពូលប្រកួតជម្រុះសន្សំពិន្ទុ ក្រុមចំណាត់ថ្នាក់លេខ ១ និងលេខ ២ នៃពូលនីមួយៗនឹងត្រូវបានទៅប្រកួតដំណាក់កាលទី ២ មាន ១៦ ក្រុម ដំណាក់កាលទី ២ បែងចែកជា ៤ ពូល ប្រកួតជម្រុះសន្សំពិន្ទុ ក្រុមចំណាត់ថ្នាក់លេខ ១ និងលេខ ២ នៃពូលនីមួយៗនឹងត្រូវបានទៅចូលរួមប្រកួតដំណាក់កាលទី ៣ មាន ៨ ក្រុម ដំណាក់កាលទី ៣ បែងចែកជា ២ ពូលប្រកួតជម្រុះសន្សំពិន្ទុ ក្រុមចំណាត់ថ្នាក់លេខ ១ និងលេខ ២ នៃពូលនីមួយៗត្រូវបានចូលរួមប្រកួតដំណាក់កាលទី ៤ គឺវគ្គពាក់កណ្ដាលផ្ដាច់ព្រ័ត្រនិងផ្ដាច់ព្រ័ត្រ ។
ឯកឧត្តម ប៊ូជុំ សេរី បានលើកឡើងថា ការរៀបចំប្រកួតបាល់ទាត់យុវជននាពេលនេះ គឺជាការកសាងនូវមូលដ្ឋានគ្រឹះសម្រាប់គាំទ្រដល់ទិសដៅអភិវឌ្ឍន៍បាល់ទាត់ដើម្បីឆ្ពោះទៅកាន់កីឡាករកីឡាស៊ីហ្គេមឆ្នាំ ២០២៣ដែលកម្ពុជាធ្វើជាម្ចាស់ផ្ទះហេតុនេះហើយសហព័ន្ធបានរៀបចំការប្រកួតជាប្រចាំដើម្បីជ្រើសរើសរកកីឡាករមានទេពកោសល្យដើម្បីហ្វឹកហាត់ត្រៀមចូលរួមប្រកួតកម្រិតអន្តរជាតិនានា សហព័ន្ធបានធ្វើការកែទម្រង់ទាំងផ្នែកបច្ចេកទេសនិងរដ្ឋបាលក្នុងទិសដៅធ្វើឲ្យការប្រកួតកាន់តែប្រកបដោយគុណភាពនិងលទ្ធផលដើម្បីបម្រើគោលដៅអភិវឌ្ឍន៍បាល់ទាត់យុវជនដែលជាចំណុចអាទិភាពក្នុងផែនការយុទ្ធសាស្ត្ររបស់ខ្លួន។ សហព័ន្ធកីឡាបាល់ទាត់កម្ពុជាបើកការប្រកួតវិលជុំជម្រុះក្រុមកីឡាករអាយុក្រោម១៦ និង១៨ ស្របពេលដែលកម្ពុជានឹងធ្វើការជាម្ចាស់ផ្ទះក្នុងព្រឹត្តិការប្រកួតកីឡាស៊ីហ្គេមលើទី៣២ នៅឆ្នាំ២០២៣ខាងមុខ។
គួរបញ្ជាក់ផងដែរថាក្នុងពិធីបើកការប្រកួតមុនដំបូងក្រុមយុវជនខេត្តកំពង់ធំ ម្ចាស់ផ្ទជួបជាមួយក្រុមយុវជនខេត្តកំពង់ចាម លទ្ធផលនៃការប្រកួត ក្រុមយុវជនខេត្តកំពង់ធំ ៣ ក្រុមយុវជនខេត្តកំពង់ចាម១ ៕ ដោយ តេច ឆេង
