អគារមតេ្តយ្យសិក្សាមួយខ្នងមាន៥បន្ទប់ធ្វើអំពីថ្មប្រក់ក្បឿងដែលជាអំណោយរបស់អង្គការដៃល្អនៃសាធារណរដ្ឋកូរ៉េ ផ្តល់តាមរយៈអង្គការដៃល្អ កម្ពុជា ក្នុងការសាងសង់ ស្ថិតនៅភូមិជ្រាវ សង្កាត់ជ្រាវ ក្រុង ខេត្ត សៀមរាប ត្រូវបានបើកសម្ពោធដាក់ឲ្យប្រើប្រាស់ជាផ្លូវការ កាលពីព្រឹកថ្ងៃទី ២២ ខែ មករា ឆ្នាំ២០១៥ ក្រោមព្រះអធិបតីភាពដ៏ខ្ពង់ខ្ពស់របស់សម្តេចព្រះអគ្គមហាសង្ឃរាជរាជាធិបតី ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា និង សម្តេចព្រះសង្ឃរាជ សុង វ៉ុនជូ ប្រធានអង្គការដៃល្អ នៃសាធារណរដ្ឋកូរ៉េ រួមជាមួយប្រតិភូរ សម្ខាន់ៗជាច្រើនរូប ព្រមទាំងគ្រូអ្នកគ្រូ សិស្សានុសិស្ស និង ប្រជាពលរដ្ឋ ផងដែរ ។
ឯកឧត្តម គឹម ឆៃហៀង អភិបាលរងខេត្ត បានបញ្ជាក់ថា នេះជាទឹកចិត្តសប្បុរសធម៌ដ៏ជ្រាលជ្រៅ ក្នុងការប្រឹងប្រែងរបស់អង្គការដៃល្អកម្ពុជាក្នុង ការរួមចំណែកអភិវឌ្ឍន៍លើវិស័យអប់រំនៅខេត្តសៀមរាប ។ ជាក់ស្តែងនូវសាលាមត្តេយ្យសិក្សានេះជាសមទ្ធិផល ដែលបង្កលក្ខណៈងាយស្រួលដល់កុមារតូចៗ ជាកូនចៅប្រជាជននៅសង្កាត់ជ្រាវ បានចូលសិក្សា ។ ម្យ៉ាងទៀត ក៏ ជាការចូលរួមបណ្តុះបណ្តាលនូវធនធានមនុស្សនៅក្នុងមូលដ្ឋាន ដែលជាសសរស្តម្ភ នៃគ្រឹះរឹងមាំក្នុងកិច្ចអភិវឌ្ឍន៍ប្រទេស កម្ពុជា ។
មានសង្ឃដិកាសំណេះសំណាល សម្តេចសង្ឃរាជ សុង វ៉ុនជូ ប្រធានអង្គការដៃល្អ នៃសាធារណៈរដ្ឋកូរ៉េ បានបញ្ជាក់ថា ដើម្បីសាងសង់ អគារ មត្តេយ្យសិក្សាហ្គូដហេនជ្រាវបាន គឺមកពីរួមកិច្ចសហប្រតិបត្តិការជាមួយ ដ្រីមមាញនើសហ្វោនដេសិន មូលនិធិ ផ្សព្វផ្សាយព្រះពុទ្ធសាសនាកូរ៉េ ។ ម្យ៉ាងទៀតព្រះអង្គបានសហប្រតិបតិ្តការជាមួយមហាសង្ឃជុំវិញពិភពលោក ជា ពិសេសជាមួយសម្តេចព្រះសង្ឃរាជ ទេព វង្ស ដើម្បីបង្កើតឲ្យមានសន្តិភាព និង ភាពរុងរឿងនៅកម្ពុជា ផងដែរ ។ ព្រះអង្គ បានបន្តទៀតថា អង្គការដៃល្អ បានចូលរួមអភិវឌ្ឍន៍រាជរដ្ឋាភិបាលកម្ពុជា ក្នុងរយៈពេល១១ឆ្នាំ បានជួយសាងសង់ សាលារៀនបាន ៧ខ្នង ផ្តល់អណ្តូងទឹកស្អាត ចំនួន២ពាន់១៦៨ ព្រមទាំងផ្លូវ ថ្មល់ ស្ពាន បង្គន់អនាម័យ និង ជួយ ជួសជុលផ្ទះប្រជាជននៅតាមបណ្តាខេត្តមួយចំនួនទៀតផង ។ ព្រះអង្គក៏មានព្រះទ័យសង្ឃឹមជឿជាក់ នៅពេលអគារ សាលាមត្តេយ្យដំណើរការហើយ យើងនឹងទទួលបាននូវធនធានដ៏មានតម្លៃ នៃគ្រឹះរឹងមាំសម្រាប់ការអភិវឌ្ឍន៍នៅក្នុង តំបន់នេះ ព្រមទាំងធានានូវគុណភាពនៃការអប់រំទៀតផង ។
មានសង្ឃដិកាសំណេះសំណាលនាឱកាសនោះដែរ សម្តេចព្រះអគ្គមហាសង្ឃរាជរាជាធិបតី ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា បានលើកឡើងថា បើចង់កសាង និង អភិវឌ្ឍន៍ប្រទេសជាតិ គឺចាំបាច់ តម្រូវការនោះ គឺធនធានមនុស្ស និង ផែនការផលិតកម្មមួយដែលទំនើប ឲ្យតាមទាន់កាលៈទេសៈ នៃការរីកចម្រើននៃ ពិភពលោក ។ ដូច្នេះការងារអប់រំ វាជាគន្លឹះមួយយ៉ាងសំខាន់បំផុត សម្រាប់ការកសាងធនធានមនុស្ស ដែលសង្គមទាំងមូលត្រូវតែចូលរួមវិនិយោគ ឲ្យបានខ្លាំងក្លា ដោយប្រើប្រាស់ពេលវេលាដ៏យូរអង្វែង ។ សម្តេចព្រះអគ្គមហាសង្ឃ រាជ មានបន្ទូលលើកឡើង អំពីគោលបំណង នៃព្រះពុទ្ធសាសនានៅតាមបណ្តាប្រទេសនានា សម្រាប់អនាគត ដ៏ភ្លឺស្វាងរបស់កុលបុត្រកុលធីតាគ្រប់រូប ។ ដោយកត្តានេះហើយ ទើបព្រះអង្គបានធ្វើការចុះហត្ថលេខាជាមួយអង្គការ ដៃល្អ ដើម្បីស្វែងរកជំនួយ ក្នុងការចូលរួមកសាងអគារមត្តេយ្យសិក្សា ឲ្យមាននៅក្នុងភូមិស្រុកកំណើតរបស់ព្រះអង្គ ក្នុងការបម្រើដល់តម្រូវការរបស់កុមារតូចៗ ដែលជាកូនចៅបងប្អូនប្រជាពលរដ្ឋ ហើយក៏ជាគោលបំណងមួយរបស់ សម្តេចព្រះអគ្គមហាសង្ឃរាជ ក្នុងការបណ្តុះបណ្តាលធនធានមនុស្ស ដែលផ្តើមចេញពីការកសាងសមត្ថភាព និង ការ អប់រំសីលធម៌ និង ការរស់នៅរបស់កុមារ និង យុវជនយើង ទាំងបញ្ញាស្មារតី កាយសម្បទា សញ្ចេតនា និង បំណិន ជីវិតគ្រប់បែបយ៉ាង ដែលជាកត្តា ចម្បងសម្រាប់កិច្ចអភិវឌ្ឍន៍ប្រទេស ដោយចៅៗកុមារទាំងនេះហើយ ដែលជាទំពាំង ស្នងប្ញស្សី និង ក្លាយខ្លួនជាអ្នក បន្តវេន កសាង និង អភិវឌ្ឍន៍ប្រទេសទៅពេលអនាគត ។ ព្រះអង្គក៏បានមានបន្ទូល គូសបញ្ជាក់ថា វិស័យពុទ្ធចក្រ និង អាណាចក្រ ត្រូវដើរទន្ទឹមគ្នា និង សហការគ្នាល្អ ដែលបានបង្កប់ទៅដោយអត្ថន័យ ដ៏ជ្រាវជ្រៅ សម្រាប់ពុទ្ធសាសនិកដែលបានព្យាយាម ដើម្បីសម្រេចនូវការត្រាស់ដឹងដ៏យូរអង្វែងទៅអនាគត ។
បន្ទាប់ពីការប្រទាននូវវត្ថុអនុស្សាវរីយ៍រួចមក សម្តេចសង្ឃរាជ និង គណៈអធិបតី ក៏បានយាងនិមន្ត អញ្ជើញ កាត់ខ្សែបូរជានិមត្តរូប បើកសម្ពោធដាក់ឲ្យប្រើប្រាស់ជាផ្លូវការ ៕
ប៊ុនធឿន ( សៀមរាប )
