រាជធានីភ្នំពេញ ៖ ក្នុងសេចក្ដីថ្លែងការណ៍ចុះថ្ងៃទី១២ ខែធ្នូ ក្រសួងការបរទេសកម្ពុជា បានប្រកាសថា រដ្ឋាភិបាលបានដាក់របាយការណ៍ «គ្រប់ជ្រុងជ្រោយ» ទៅតាមការទាមទាររបស់សហភាពអឺរ៉ុបរួចរាល់ហើយ។
ក្រសួងការបរទេស បញ្ជាក់ថា របាយការណ៍នោះ ឆ្លើយតបនឹងក្ដីបារម្ភរបស់អឺរ៉ុបអំពីសិទ្ធិនយោបាយ សិទ្ធិដីធ្លី សេរីភាពបញ្ចេញមតិ និងសេរីភាពបង្កើតសមាគម។«រាជរដ្ឋាភិបាលសង្ឃឹមថា គណៈកម្មការអឺរ៉ុប នឹងធ្វើការពិចារណាលើកិច្ចខិតខំប្រឹងប្រែងប្រកបដោយសុឆន្ទៈរបស់រាជរដ្ឋាភិបាល ក្នុងការអនុវត្តរាល់អនុសញ្ញាអន្តរជាតិទាំងអស់»។សេចក្តីថ្លែងការណ៍បានព្រមានថា ការកាត់ផ្តាច់ EBA អាចនឹងប៉ះពាល់សង្គមដល់កម្មការិនីប្រមាណជិត ១លាននាក់ និងផលប៉ះពាល់ដោយប្រយោលដល់ក្រុមគ្រួសារសាច់ញាតិ ដែលរស់នៅពឹងផ្អែកលើប្រាក់ឈ្នួលរបស់ពួកគេ រួមទាំងការគោរពនូវគោលការណ៍អធិបតេយ្យភាព និងការមិនជ្រៀតជ្រែកចូលកិច្ចការផ្ទៃក្នុងកម្ពុជា។
សូមបញ្ចាក់ថាក្នុងរបាយការណ៍របស់ខ្លួនដែលត្រូវបានដាក់ជូនរដ្ឋាភិបាលកម្ពុជាកាលពីថ្ងៃទី១១ ខែវិច្ឆិកាកន្លងមក សហភាពអឺរ៉ុបបង្ហាញការព្រួយបារម្ភទៅលើបញ្ហាសិទ្ធិដីធ្លី និងលំនៅដ្ឋាន សិទ្ធិសហជីព និងការងារ សិទ្ធិបង្កើតសមាគម និងជួបជុំ សិទ្ធិពលរដ្ឋ និងសិទ្ធិនយោបាយ និងសិទ្ធិសេរីភាពសារព័ត៌មាន និងបញ្ចេញមតិ។
របាយការណ៍នោះ សហភាពអឺរ៉ុបរកឃើញថា សិទ្ធិពលរដ្ឋ និងសិទ្ធិនយោបាយ ត្រូវបានរំលោភយ៉ាងធ្ងន់ធ្ងរ និងជាប្រព័ន្ធ ពាក់ព័ន្ធទៅនឹងការយារយីទៅលើអ្នកនយោបាយប្រឆាំង ការឃុំខ្លួនអតីតមេដឹកនាំបក្សប្រឆាំងលោក កឹម សុខា និងការរំលាយគណបក្សសង្គ្រោះជាតិ ជាដើម។ ករណីនេះ សហភាពអឺរ៉ុបទាមទារឱ្យរដ្ឋាភិបាលកម្ពុជាស្ដារឡើងវិញនូវស្ថានភាពសិទ្ធិមនុស្ស និងងាកទៅរកគន្លងប្រជាធិបតេយ្យ ដោះលែងលោក កឹម សុខា និងផ្តល់កាយសម្បទាឱ្យគណបក្សសង្គ្រោះជាតិឡើងវិញជាដើម។
ថ្ងៃទី១២ ខែធ្នូ ឆ្នាំ២០១៩ ជាថ្ងៃចុងក្រោយដែលរដ្ឋាភិបាលកម្ពុជាត្រូវឆ្លើយតបទៅនឹងរបាយការណ៍របស់គណៈកម្មការអឺរ៉ុបអំពីការរកឃើញ និងសន្និដ្ឋានពាក់ព័ន្ធនឹងនីតិវិធីដកប្រព័ន្ធអនុគ្រោះពន្ធជាបណ្ដោះអាសន្ន ដែលបានផ្តល់ឱ្យកម្ពុជា ក្រោមកម្មវិធី EBA។
រដ្ឋាភិបាលកម្ពុជា បង្ហាញក្ដីសង្ឃឹមថា សហភាពអឺរ៉ុបនឹងមិនដកប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» (EBA) ពីកម្ពុជាទេ បន្ទាប់ពីរបាយការណ៍មួយដែលកម្ពុជាហៅថា«គ្រប់ជ្រុងជ្រោយ»នោះ ត្រូវបានដាក់ឆ្លើយតបទៅអឺរ៉ុបរួចរាល់ហើយនោះ ៕
