ខេត្តកំពង់ធំ ៖ លោកជំទាវ ឃួន ឃុនឌី សមាជិកព្រឹទ្ធសភានៃព្រះរាជាណាចក្រកម្ពុជាបានលើកឡើងថា ប្រទេសជាតិមានការរីកចម្រើនទៅបានលុះត្រាតែប្រជាពលរដ្ឋខិតខំចាប់ផ្ដើមចេញពីខ្លួនយើង ។ លោកជំទាវបានថ្លែងយ៉ាងដូច្នេះនៅក្នុងពិធីសម្ពោធដាក់ឱ្យប្រើប្រាស់ជាផ្លូវការនូវការិយាល័យធម្មការនិងសាសនាស្រុកកំពង់ស្វាយ ខេត្តកំពង់ធំ ព្រឹកថ្ងៃទី ១៤ ខែធ្នូ ឆ្នាំ ២០១៩ ដោយមានការអញ្ជើញចូលរួមពីព្រះសង្ឃ មន្ត្រីរាជការ ប្រជាពលរដ្ឋយ៉ាងច្រើនកុះករនៅសាលាស្រុកកំពង់ស្វាយ ។
មានប្រសាសន៍សំណេះសំណាល លោកជំទាវ បានថ្លែងអំណរគុណដល់សប្បុរសជនដែលបានចូលរួមអភិវឌ្ឍន៍ប្រទេសជាតិជាមួយរាជរដ្ឋាភិបាល។ លោកជំទាវបានបន្តទៀតថា វិស័យព្រះពុទ្ធសាសនា ជាវិស័យមួយដ៏សំខាន់ក្នុងចំណោមវិស័យផ្សេងទៀត ដែលបានអប់រំមនុស្សឲ្យដើរផ្លូវល្អ ប្រព្រឹត្តអំពើល្អ។ លោកជំទាវបានបន្ថែមទៀតថា “ចាប់ផ្តើមចេញពីខ្លួនយើង ទើបប្រទេសជាតិមានការរីកចម្រើន” និងសុំអោយឪពុក ម្តាយ ត្រូវធ្វើជាគម្រូល្អដល់កូនៗរបស់ខ្លួន ក៏ដូចជាក្មេងៗដទៃទៀតដែរ អប់រំកូនចៅជៀសអោយឆ្ងាយពីគ្រឿងញៀន ចេះគោរពចាស់ទុំ មានសីលធម៌វិជ្ជាជីវៈ សូមបងប្អូនប្រជាជនយើងទាំងអស់គ្នាត្រូវចូលរួមថែរក្សាសន្តិភាពរកបានដោយលំបាកនេះឲ្យបានស្ថិតស្ថេរគង់វង្សជាយូរអង្វែង ដោយមិនត្រូវចូលរួមសកម្មភាពជាមួយក្រុមជនក្បត់ជាតិឯង ក្រោមលេសស្តារប្រជាធិបតេយ្យ ក្នុងដំណាក់កាលដែលប្រទេសជាតិកំពុងតែមានសន្តិភាព ប្រជាធិបតេយ្យ និងនីតិរដ្ឋ ដែលបាននាំប្រទេសសជាតិឲ្យមានការអភិវឌ្ឍរីកចម្រើនលើគ្រប់វិស័យ ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែនជានាយករដ្ឋមន្ត្រី។
លោក អ៊ុន បុត្ត អភិបាលស្រុកកំពង់ស្វាយ បានឲ្យដឹងថា ដោយមានការជ្រោមជ្រែងពីព្រះគ្រូបញ្ញាទីពោ សំរិត ណាំាង អនុគណស្រុកកំពង់ស្វាយនិងមានការចូលរួមគាំទ្រពីព្រះសង្ឃ គណៈកម្មការតាមបណ្ដាវត្តទាំង ៣៨ វត្ត មន្ត្រីរាជការជុំស្រុក សប្បុរសជននានាគ្រប់ទិសទីដែលបានឧបត្ថម្ភជាថវិកានិងសម្ភារៈដើម្បីចូលរួមកសាងអាគារនិងបន្ទប់អនាម័យនៃការិយាល័យធម្មការនិងសាសនាស្រុកក្នុងបរិវេណសាលាស្រុកកំពង់ស្វាយបានសម្រេចក្នុងនោះអគារមួយខ្នងទំហំ ១៧ ម៉ែត្រ នឹង ៧,៥០ម៉ែត្រ ហើយចាប់ផ្ដើមសាងសង់នៅថ្ងៃទី២៥ ខែវិច្ឆិកា ឆ្នាំ២០១៨ រហូតចប់សព្វគ្រប់នៅថ្ងៃទី១៥ ខែមេសា ២០១៩ ដែលអស់ទឹកប្រាក់ ១៤៤ លានរៀល ។
ជាមួយគ្នានោះដែរ លោកជំទាវបាននាំយកសម្ភារៈនិងថវិកាមួយចំនួនសម្រាប់ចូលរួមក្នុងការកសាងនៅការិយាល័យធម្មការនិងសាសនាស្រុកមួយចំនួនផងដែរ៕ ដោយ តេច ឆេង
