ខេត្តរតនគិរី ៖ កាលពីថ្ងៃទី១១ ខែធ្នូ ឆ្នាំ២០១៩ តាមបណ្ដោយផ្លូវជាតិលេខ៧៨ ស្ថិតក្នុងភូមិគ្លិ ឃុំស៊ើង ស្រុកបរកែវ ខេត្តរតនគិរី ឈើប្រណិតចំនួន១១១ដុំ ស្មើនឹង០.៥៧៧ម៉ែត្រគូប ដែលឈ្មួញលួចបង្កប់នៅក្នុងរថយន្តក្រុង របស់ជនជាតិវៀតណាម ត្រូវបានកម្លាំងកងរាជអាវុធហត្ថស្រុកបរកែវ សហការជាមួយជំនាញរដ្ឋបាលព្រៃឈើ ចុះបង្ក្រាបនិងរឹបអូសយករថយន្តក្រុង១គ្រឿង យកមករក្សាទុកនៅខណ្ឌរដ្ឋបាលព្រៃឈើរតនគិរី។
សមត្ថកិច្ចបានឲ្យដឹងថា បន្ទាប់ពីទទួលព័ត៌មានពីប្រជាពលរដ្ឋជុំវិញសកម្មភាពដឹកជញ្ជូនឈើតាមរថយន្តក្រុងវៀតណាម កម្លាំងសមត្ថកិច្ច សហការជាមួយកម្លាំងជំនាញរដ្ឋបាលព្រៃឈើ បានចុះត្រួតពិនិត្យ និងឆែកឆេរថយន្តក្រុងរបស់វៀតណាម ពណ៌ស លាយខៀវ ពាក់ស្លាកលេខ 81B 00113 នៅចំណុចខាងលើ ភ្លាមនោះតៃកុងរថយន្តដឹងខ្លួនក៏បើកទ្វាររថយន្តចុះរត់ចូលចំការស្វាយចន្ទីបាត់ស្រមោល បន្សល់ទុករថយន្តនិងឈើប្រណិតជាច្រើនកំណាត់នៅកន្លែងកើតហេតុ។
សមត្ថកិច្ចបន្តថា ឈើដែលសមត្ថកិច្ចរឹបអូសបានសុទ្ធតែឈើប្រណីត ប្រភេទធ្នង់មានចំនួន១១១ដុំ ស្មើនឹង០.៥៧៧ម៉ែត្រគូប។
បច្ចុប្បន្ន វត្ថុតាងរថយន្តរួមនិងឈើត្រូវបានយកទៅរក្សាទុកនៅខណ្ឌរដ្ឋបាលព្រៃឈើរតនគិរី ដើម្បីចាត់វិធានការបន្តតាមនិតិវិធី៕
