រាជធានីភ្នំពេញ ៖ លោក ឆាយ សុផល សាស្ត្រាចារ្យសារព័ត៌មាន ទើបបានសម្ពោធសៀវភៅចេញថ្មីមួយដែលមានកម្រាស់ ៣០៥ ទំព័រ ដោយបានរៀបរាប់អំពីជីវប្រវត្តិរបស់សម្តេចកត្តិព្រឹទ្ធបណ្ឌិត ប៊ុន រ៉ានី ភរិយាសម្តេច ហ៊ុន សែន នាយករដ្ឋមន្ត្រីកម្ពុជា ។
លោក ឆាយ សុផល បានដាក់ចំណងជើងសៀវភៅនេះថា «ប៊ុន រ៉ានី ភរិយាបុរសខ្លាំងនៃកម្ពុជា» ដោយលោកបានអះអាងថា សៀវភៅនេះ គឺបានរៀបរាប់ពីជីវិតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី តាំងពីនៅជាកុមារភាព រួមទាំងប្រវត្តិការសិក្សា ការក្លាយជាកងទ័ពព្រៃ ការបែកបាក់ពីស្វាមី ការបាត់បង់កូន និងការស្ថិតក្រោមការតាមសម្លាប់ផ្ដាច់ពូជជាដើម។
អ្នកនិពន្ធបានបញ្ជាក់ថា មូលហេតុដែលលោកចងក្រងសៀវភៅនេះឡើង គឺដោយសារតែសម្តេចកិត្តិព្រឹទ្ធបណ្ឌិតគឺជាភរិយាថ្នាក់ដឹកនាំកំពូលរបស់ប្រទេសដែលធ្លាប់ឆ្លងកាត់ការលំបាកច្រើន ដែលភរិយាថ្នាក់ដឹកនាំកំពូលប្រទេសផ្សេងទៀតមិនធ្លាប់ឆ្លងកាត់នោះឡើយ ។
លោកថា សៀវភៅនេះក៏បង្ហាញអំពីជីវិតរស់នៅប្រចាំថ្ងៃរបស់សម្តេចកិត្តិព្រឹទ្ធបណ្ឌិត ដែលត្រូវបំពេញតួនាទីជាម្ដាយ ជាភរិយារបស់នាយករដ្ឋមន្ត្រី និងជាប្រធានកាកបាទក្រហមកម្ពុជា ហើយពិសេសគឺអារម្មណ៍ក្នុងនាមជាភរិយាថ្នាក់ដឹកនាំកំពូលដែលត្រូវបានគេប្រមាថកន្លងមកផងដែរ ។
លោក ឆាយ សុផល បានបញ្ជាក់បន្ថែមថា សៀវភៅខាងលើនេះត្រូវបានបោះពុម្ពចំនួន ៣ ម៉ឺនក្បាល ហើយក៏ត្រៀមនឹងបកប្រែជាភាសាអង់គ្លេសនាពេលខាងមុខ។ លោកបន្តថានេះគឺជាសៀវភៅលើកទី ៣ ដែលលោកបានស្រាវជ្រាវ និងចងក្រងជាសៀវភៅនិយាយពាក់ព័ន្ធនឹងក្រុមគ្រួសាររបស់សម្តេចនាយករដ្ឋមន្ត្រីដែលរួមមាន សៀវភៅទី ១ គឺលោកបានរៀបរាប់ពីជីវិតនយោបាយ និងអំណាចរបស់សម្តេច ហ៊ុន សែន ក្នុងប្រវត្តិសាស្ដ្រខ្មែរ៕
