រាជធានីភ្នំពេញ ៖ កាលពីវេលាម៉ោង៦និង៤០នាទីល្ងាចថ្ងៃទី១១ ខែធ្នូ ឆ្នាំ២០១៩ តាមបណ្តោយផ្លូវជាតិលេខ៦ នៅចំណុចមុខហុងដា ស្ថិតនៅក្នុងសង្កាត់ជ្រោយចង្វា ខណ្ឌជ្រោយចង្វា សមត្ថកិច្ចបានឃាត់ខ្លួនបុរសជាជនជាតិចិន៤នាក់ ដែលបានធ្វើសកម្មភាពចាប់ចងដៃចងជើងជនជាតិចិនម្នាក់ទៀត និងរឹតកបណ្តាលឲ្យរងរបួសស្នាមពេញដៃ ពេញខ្នង។
សមត្ថកិច្ចបានបញ្ជាក់ថា មុនពេលកើតហេតុ គេបានឃើញជនជាតិចិនមួយក្រុមមានគ្នា៣ទៅ៤នាក់ ជិះរថយន្តមួយគ្រឿងម៉ាកកាមរីហាយប្រ៊ីត ពណ៌ស្ករពាក់ផ្លាកលេខ ភ្នំពេញ 2P 5587 ដែលបើកបរចេញមកពីម្តុំសាលាបឋមសិក្សាជ្រោយចង្វា តាមបណ្តោយផ្លូវជាតិលេខ៦A ក្នុងទិសដៅពីត្បូងទៅជើងបើកក្នុងល្បឿនយ៉ាងលឿន ។
ប៉ុន្តែខណនោះក្រុមសមត្ថកិច្ចដែលប្រចាំការនៅគោលដៅ បានប្រទះឃើញហើយក៏សង្ស័យក៏ដេញតាមដែលបណ្តាលឲ្យអ្នកបើកបរបើករថយន្តរបស់ជនជាតិចិននោះភ័យក៏បើករត់តែម្តង ។ ភ្លាមៗនោះដែរ សមត្ថកិច្ចខាងផ្នែកអន្តរាគមន៍ ក៏បានធ្វើការកាក់រថយន្តខាងលើនេះឲ្យឈប់ រួចបើកទ្វារថយន្តទៅទើបឃើញជនសង្ស័យជាជនរងគ្រោះម្នាក់ បានត្រូវក្រុមជនសង្ស័យជាជនជាតិចិន៣នាក់ទៀត ចាប់ចងដៃនិងរឹតកបណ្តាលឲ្យមានស្នាមរបួសធ្ងន់ធ្ងរ ទើបកម្លាំងអន្តរាគមន៍បានធ្វើការឃាត់ខ្លួនទាំងជនរងគ្រោះ និងជនសង្ស័យយកទៅសួរនាំនៅអធិការដ្ឋាននគរបាលខណ្ឌជ្រោយចង្វា។
ជនរងគ្រោះបានឆ្លើយប្រាប់សមត្ថកិច្ចថា ខ្លួនបានធ្វើការជាមួយក្រុមជនសង្ស័យនៅហាងមួយកន្លែង ប៉ុន្តែគាត់មិនចង់ធ្វើទៀត ដោយសារតែចង់ត្រឡប់ទៅប្រទេសចិនវិញ ក៏ប៉ុន្តែថៅកែគាត់ដែលជាជនសង្ស័យមិនព្រមក៏ខឹងយកខ្សែចាប់ចងដៃចងជើង និងរឹតកតែម្តង ហើយនិយាយថា ចង់សម្លាប់ថែមទៀត ចំណែកឯតៃកុងរថយន្តដែលជាជនជាតិខ្មែរនោះ ត្រូវបានសមត្ថកិច្ចធ្វើការសួរនាំនឹងឃាត់ខ្លួនជាបណ្តោះអាសន្ន នៅអធិការខណ្ឌជ្រោយចង្វា។
ក្រោយពេលកើតហេតុខាងលើនេះ ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនខ្លួនទៅកាន់តុលាការ ដើម្បីចាត់ការទៅតាមនីតិវិធី៕
