ខេត្តកោះកុង ៖ អ្នកស្រី ស៊ិន ចាន់ថេត រស់នៅភូមិព្រែកស្វាយឃុំថ្មដូនពៅស្រុកថ្មបាំងខេត្តកោះកុង បានប្តឹងអង្គការសម្ពន្ធ័មិត្តសត្វព្រៃហៅវ៉ាយអេដស៍ទៅតុលារការ កាលពីថ្ងៃទី 03 ខែកុម្ភះ ឆ្នាំ2014 ដែលមានគ្នាប្រមាណ20នាក់ក្នុងនោះមានកងរាជអាវុធហត្ថកំលាំងមេព្រៃនិងជនបរទេស2នាក់បានមកលួចកាប់បំផ្លាញដំណាំម្រេចរបស់គាត់ ដែលទើបនិងអោយផលក្នុងទំហំជិត 1 ហិចតា ស្ថិតនៅភូមិ ឃុំខាងលើអោយសងការខូចខាតទាំងស្រុងជាង3ម៉ឺនដុល្លា ។
អ្នកស្រី ស៊ិន ចាន់ថេត ពេលថ្មីៗនេះបានមកស្វែងរកអន្តរាគមន៍ពីអង្គការលីកាដូ និងប្រពន្ធ័ផ្សព្វផ្សាយ ដើម្បីជួយជំរុញអោយស្ថាបន៏ពាក់ពន្ធ័ រកយុត្តិធម៏ជូនគាត់និងពន្លឿននិតីវិធីចាត់ការសំណុំរឿងរបស់គាត់អោយបានលឿនផងដែរ ។ អ្នកស្រីបានបន្តថា គ្រួសារគាត់រំពឹងទៅលើដំណាំម្រេចនេះតែប៉ុណ្ណោះដើម្បីដោះសងទៅធនាគារ តែពេលនេះដំណាំម្រេចត្រូវបានបំផ្លាញអស់ តើអោយគាត់រំពឹងអ្វីទៀត។យោងតាមពាក្យបណ្តឹង របស់អ្នកស្រីស៊ិនចាន់ថេត ចុះថ្ងៃទី03ខែកុម្ភះឆ្នាំ2014បានអោយដឹងថា ដំណាំម្រេចកំពុងទទួលផល 158ជ្រលង់ ។ ដំណាំម្រេចថ្មីទើបដាំរយះពេល ១ឆ្នាំចំនួន200ជ្រលង់ម៉ាស៊ីនបូមទឹក01គ្រឿន និងទុយោទឹក150ដើមនិងសំភារះជាច្រើនទៀតត្រូវបានក្រុមវ៉ាយអេដស៍កាប់បំផ្លាញទាំងស្រុង ហើយអ្នកស្រីបានអះអាងថាដីដាំម្រេចនេះក្រុមយុវជនស្មគ្រ័ចិត្តបានវាស់វែងរួចរាល់ហើយដែរ។
លោក អ៊ិន គង់ ជិតអ្នកសម្របសំរួលអង្គការលីកាដូប្រចាំខេត្តកោះកុង បានអោយដឹងថា អ្នកស្រី ស៊ិន ចាន់ថេត កាលពីថ្ងៃទី30 ខែមេសា ឆ្នាំ2014នេះ បានមកសុំការអន្តរាគមន៏ ដើម្បីអោយស្ថាបន៍តុលាការចាត់ការរឿងរបស់គាត់ អោយបានលឿន ។ លោកបន្តថា ខាងលោកក៏បានទូរសព្ទ័ទៅខាងសូរិយោដីផងដែរ ហើយលោកបានរួមចំណែកសោកស្តាយ ផលដំណាំម្រេចដែលបានទទួលផលហើយ បែរជាត្រូវបំផ្លាញដូចនេះ ។
ទាក់ទិននិងបណ្តឹងចោទប្រកាន់របស់អ្នកស្រី ស៊ិន ចាន់ថេត នៅថ្ងៃទី30ខែមេសាឆ្នាំ2014នេះ យើងមិនទាក់ទងសុំការពន្យល់បំភ្លឺពីអង្គការវ៉ាយអេដស៍បានទេ ដោយកន្លងមក អង្គការសត្វព្រៃមួយនេះមិនសូវទទួលការជួបទំនាក់ទំនងរបស់អ្នកការសែត និងសង្គមស៊ីវិលទេ ។
លោក កែ ពុទ្ធី ប្រធានសូរិយោដីខេត្តបានអោយដឹងថា ដីដំណាំម្រេចរបស់ឈ្មោះ ស៊ិន ចាន់ថេតគឺក្រុមយុវជនស្មគ្រ័ចិត្តបានវាស់វែងរួចមែន ក្នុងគំរោងវិនិច្ឆ័យ មិនទាន់ចេញប្លង់កម្មសិទ្ធ នៅឡើយទេ ម្យ៉ាងទៀត ដីនេះត្រូវបានអង្គការវ៉ាយអេដស៏ប្តឹងផងដែរ ។
លោកព្រះរាជអាជ្ញារង ស្រី ម៉ាកនី ដែលជាអ្នកកាន់សំនុំរឿងនេះបានអោយដឹងតាមទូរស័ព្ទ នៅព្រឹកថ្ងៃទី 01 ខែ 05 ឆ្នាំ 2014 នេះថារឿងនេះបានអង្កេតបឋមរួចហើយៗកោះហៅអ្នកពាក់ពន្ធ័មកសាកសួររួចរាល់អស់ហើយ ដែរចំណែកសំរេចយ៉ាងណានោះមិនទាន់ដឹងទេព្រោះត្រូវបញ្ចូនទៅអោយចៅក្រម ។
គួររំលឹកផងដែរថា បណ្តឹងរបស់អ្នកស្រីស៊ិនចាន់ថេតរហូតមកដល់ពេលនេះមានរយះពេលជាង3ខែហើយអ្វីដែលអ្នកស្រីចង់បាន គឺសងលុយទៅធនាគារ អេស៊ីលីដា ដែលអ្នកស្រីចងការ ។
លីម ហួរ
