រាជធានីភ្នំពេញ ៖ សម្តេច ហ៊ុន សែន នាយករដ្ឋមន្ត្រីកម្ពុជា នៅថ្ងៃនេះ បានបញ្ជូនសារលើកទឹកចិត្តដល់កីឡាករបាល់ទាត់ កែវ សុខផេង ឲ្យខិតខំបន្តទៀតកុំបាក់ទឹកចិត្តឲ្យសោះ ព្រោះកីឡាគឺបើមិនចាញ់គឺឈ្នះ ។ ទន្ទឹមនោះ សម្តេចក៏លើកឡើងថា គ្រាប់បាល់ហ្វីឃីតមួយគ្រាប់របស់កីឡាករ កែវ សុខផេង កាលពីម្សិលមិញគឺគ្រាប់បាល់ដ៏អស្ចារ្យ ។
សូមជម្រាបថា ការថ្លែងលើកទឹកចិត្តកីឡាករ កែវ សុខផេង នោះធ្វើឡើងក្នុងឱកាស សម្តេចនាយករដ្ឋមន្ត្រី ហ៊ុន សែន ចូលរួមជាអធិបតីភាពក្នុងពិធីចែកសញ្ញាប័ត្រដល់សិស្ស និស្សិតនៃសាកលវិទ្យាល័យឯកទេសនៃកម្ពុជា (CUS)នាព្រឹកថ្ងៃទី១១ ខែធ្នូ ឆ្នាំ២០១៩នេះ។
សម្តេច ហ៊ុន សែន បានថ្លែងការលើកទឹកចិត្តដល់កីឡាករ កែវ សុខផេង នោះបន្ទាប់ពី កែវ សុខផេង បានសរសេរបង្ហោះនៅលើបណ្តាញហ្វេសប៊ុកផ្ទាល់ខ្លួនថា « កំហុសទាំងអស់គឺ មកពីរូបខ្ញុំ » ខណដែលខ្លួនគាត់ទាត់បាល់ប៉េណាំងទីមិនចូលនៅពេលប្រកួតចុងក្រោយរវាង ក្រុមជម្រើសជាតិកម្ពុជានិងក្រុមជម្រើសជាតិមីយ៉ាន់ម៉ាកាលពីរសៀលថ្ងៃទី១០ ខែធ្នូ ឆ្នាំ២០១៩ នៅប្រទេសហ្វីលីពីន ។
សម្តេច ហ៊ុន សែន បានលើកឡើងថា ការទាត់បាល់ប៉េណាំងទី មិនចូលនេះគឺមិនមែន មានតែ កែវ សុខផេង នោះទេ សូម្បីតែកីឡាករលំដាប់ពិភពលោកនិងល្បីល្បាញលោក ដេវីត ប៊ែកខាំ ក៏ទាត់មិនចូលដែរ រួមទាំងកីឡាល្បីៗជាច្រើនទៀត ។
សម្តេចនាយករដ្ឋមន្ត្រីក៏បានរម្លឹកដែរចំពោះការរិះគន់របស់អ្នកគាំទ្រមួយចំនួនទៅលើ កីឡាករ កែវ សុខផេង នៅពេលទាត់បាល់ប៉េណាំងទីមិនចូលពេលប្រកួតវគ្គពាក់កណ្តាល ផ្តាច់ព្រ័ត្រជាមួយប្រទេសវៀតណាម ។ សម្តេចលើកឡើងថា ការរិះគន់មួយចំនួនមិនអាច ទទួលយកបាននោះឡើយ ព្រោះគេរិះគន់រហូតចោទថា កីឡាករ កែវ សុខផេង ជាកូនវៀតណាមទៅវិញ ។
សម្តេចបានហៅការរិះគន់បែបនេះថា ជាក្រុមប្រឆាំងផ្កាប់មុខដែលពួកគេតែងតែយក មកប្រើលាបពណ៌លើអ្នកផ្សេង ដើម្បីតែបំរើមហិច្ឆិតានយោបាយរបស់ខ្លួន, ជាក់ស្តែងពេលគេ ធ្វើរដ្ឋប្រហារទម្លាក់សម្តេចព្រះន.សីហនុក៏គេប្រើនយោបាយលាបពណ៌ដូច្នេះនេះដែរ។ ទន្ទឹមនោះនយោបាយរបស់ក្រុមប្រឆាំងនៅកម្ពុជាគឺជា នយោបាយហិង្សាគំនុំគំគួនដូចជាកន្លងទៅគេប្រើនយោបាយ « មានស៊ីអត់សែន, មានសែនអត់ស៊ី » ជាដើម ។
ពាក់ព័ន្ធករណីកីឡាករ កែវ សុខផេង សម្តេចបានបន្ថែមថា កែវ សុខផេង ជាកីឡាករ ឆ្នើមរបស់កម្ពុជា ហើយកីឡាករម្នាក់នេះបានត្រូវគ្រូបង្វិករួមទាំងអ្នកគាំទ្រកីឡាបាល់ទាត់ វៀតណាមប្រាប់ឲ្យមានការប្រុងប្រយ័ត្នចំពោះកីឡាករម្នាក់នេះឲ្យមែនទែននៅពេលវៀតណាមជួបកម្ពុជានៅវគ្គពាក់កណ្តាលផ្តាច់ព្រ័ត។
សម្តេចបានសង្កត់ធ្ងន់ថា ដូច្នេះកីឡា កែវ សុខផែង មិនមែនជាកីឡាករធម្មតានោះឡើយ នៅពេលដែលកីឡាកររូបនោះធ្វើឲ្យមានការភ្ញាក់ផ្អើលនិងប្រុងប្រយ័ត្នពីគូរប្រកួត ។ផ្តើមពីនោះសម្តេចលើកទឹកចិត្តឲ្យកីឡាករ កែវ សុខផេង បន្តការខិតខំទៀតកុំបាក់ទឹកចិត្តឲ្យសោះ ៕
