ខេត្តរតនគិរី ៖ នៅព្រឹកថ្ងៃទី៩ ខែធ្នូ ឆ្នាំ២០១៩ ត្រង់ចំណុចក្នុងព្រៃបុសចាស់ ស្ថិតនៅក្នុងភូមិតាណង ឃុំតាឡាវ ស្រុកអណ្តូងមាស ខេត្តរតនគិរី ទីតាំងសង្វៀនបញ្ជល់មាន់ខុសច្បាប់មួយកន្លែងត្រូវបានកម្លាំងអធិការដ្ឋាននគរបាលស្រុកអណ្តូងមាសធ្វើការចុះបង្ក្រាប ។
អធិការនគរបាលស្រុកអណ្តូងមាស លោក សោម ចាន់ណារ៉ា បានឲ្យអ្នកកាសែតដឹងថា ដោយមានបទបញ្ជាពីលោក ឃេន សានិត អភិបាលស្រុក និងជាប្រធានគណៈបញ្ជាការឯកភាពស្រុកបានដឹកនាំកម្លាំងអធិការនគរបាលស្រុកចុះបង្ក្រាបកន្លែងបញ្ជល់មាន់លួចលាក់ខុសច្បាប់១កន្លែង។
លោកថា អ្នកញៀនល្បែងជល់មាន់ទាំងនោះបានដឹងខ្លួនទាន់នាំគ្នារត់គេចខ្លួនបាត់អស់ ហើយកម្លាំងបានចុះរុះរើរោងសង្វៀនជល់មាន់ដោយដកហូតសម្ភារៈដូចជា តុ ១ ស៊ុំមាន់១៥ ធុងទឹកកចំនួន១។
ក្រោយពីរឹបអូសវត្ថុតាងខាងលើនេះ សមមត្ថកិច្ចបានយកមករក្សាទុកនៅអធិការដ្ឋាននគរបាលស្រុកអណ្តូងមាសផងដែរ៕
