ខេត្តតាកែវ ៖ តាមព័ត៌មានទទួលបាន កាលពីវេលាម៉ោង ៦ និង ៣០នាទី ថ្ងៃទី៩ ខែធ្នូ ឆ្នាំ២០១៩ មានកម្មករ កម្មការិនី ជាច្រើននាក់បានរងរបួសធ្ងន់ស្រាល នៅក្នុងករណីគ្រោះថ្នាក់ចរាចរណ៍ នៅលើផ្លូវជាតិលេខ២ ចន្លោះបង្គោលគីឡូម៉ែត្រលេខ ៣៧-៣៨ ស្ថិតភូមិព្រះម្លប់ ឃុំកណ្ដឹង ស្រុកបាទី ខេត្តតាកែវ។
តាមរបាយការណ៍មន្ត្រីនគរបាលមូលដ្ឋានបានបញ្ជាក់ថា មានជនរងគ្រោះចំនួន១០នាក់។
តាមរបាយការណ៍ដដែលបានឲ្យដឹងថា នៅមុនពេលកើតហេតុ មានរថយន្ត១គ្រឿងម៉ាកនីសាន់ ពណ៌ស ពាក់ស្លាកលេខ ភ្នំពេញ PP-1827 ទិសដៅពីត្បូងទៅជើង បើកបរដោយឈ្មោះ លី ឆុន ភេទប្រុស អាយុ ២៧ឆ្នាំ រស់នៅភូមិអាជាំ ឃុំត្រពាំងសាប ស្រុកបាទី ខេត្តតាកែវ ។ លុះបើកមកដល់ចំណុចខាងលើបានឈប់នៅលើផ្លូវ ស្រាប់តែមានរថយន្តម៉ាកគា ពណ៌ស ពាក់ស្លាកលេខ តាកែវ 2A-2517 បើកបរដោយឈ្មោះ ច្រឹក កុយ ភេទប្រុស អាយុ៤៥ ឆ្នាំ មុខរបរដឹកកម្មកររោងចក្រ មានទីលំនៅភូមិសីហា ឃុំចំបក់ ស្រុកបាទី ខេត្តតាកែវ បើកបុកពេញទំហឹង បណ្ដាលឲ្យកម្មករចំនួន១០នាក់របួសស្រាលតែម្តង ។
ប៉ុន្តែភ្លាមៗនោះ ក៏ស្រាប់តែមានម៉ូតូម៉ាក ហុងដា C១២៥ ពណ៌ខ្មៅ ពាក់ស្លាកលេខ ភ្នំពេញ 1CW-7883 បើកបរដោយឈ្មោះ លឹម ណូរ៉ា ភេទប្រុស អាយុ២៣ឆ្នាំ រស់នៅភូមិត្រពាំងចំបក់ ឃុំសំរោងពេន ស្រុកសំរោង ខេត្តតាកែវ មកពីក្រោយបុករថយន្តម៉ាកគា បណ្ដាលឲ្យរបួសធ្ងន់៕
