ក្រសួងបរិស្ថាន បានប្តេជ្ញាអនុវត្តយុទ្ធសាស្ត្រជាតិលុបបំបាត់ជំងឺគ្រុនចាញ់ និងជំងឺឆ្លងផ្សេងៗទៀត ចេញពីក្នុងសហគមន៍ នៃដែនជម្រកសត្វព្រៃ ព្រៃឡង់ នៅក្នុងខេត្តកំពង់ធំ និងខេត្ត៣ទៀត ជាប់ព្រំប្រទល់គ្នា។
ការប្តេជ្ញាចិត្តបានធ្វើដោយ រដ្ឋមន្ត្រីក្រសួងបរិស្ថាន លោក សាយ សំអាល់ ក្នុងដំណើរចុះពិនិត្យស្ថានភាពការងារគ្រប់គ្រង និងអភិរក្សដែនជម្រកសត្វព្រៃ ព្រៃឡង់ និងសាកសួរសុខទុក្ខ សំណេះសំណាល ជាមួយមន្ត្រីឧទ្យានុរក្ស និងប្រជាសហគមន៍ តំបន់ការពារធម្មជាតិ នៅក្នុងភូមិសាស្ត្រខេត្តកំពង់ធំ កាលពីថ្ងៃទី២៦វិច្ឆិកា ។
ក្នុងដំណើរនោះ មានការចូលរួមពី អ្នកតំណាងរាស្ត្រមណ្ឌលកំពង់ធំ គណៈអភិបាលខេត្តកំពង់ធំ ប្រតិភូក្រសួងសុខាភិបាល ទីភ្នាក់ងារសហរដ្ឋអាមេរិក សម្រាប់អភិវឌ្ឍន៍អន្តរជាតិ ហៅកាត់ « USAID » និងដៃគូអភិវឌ្ឍន៍ និងស្ថាប័នពាក់ព័ន្ធនានាជាច្រើនទៀត។
លោក សាយ សំអាល់ បានមានប្រសាសន៍ថា ក្រៅពីកិច្ចខិតខំប្រឹងប្រែងក្នុងការគ្រប់គ្រង និងអភិរក្សធនធានធម្មជាតិ និងជីវៈចម្រុះ ក្រសួងបរិស្ថាន ប្តេជ្ញាចូលរួមលុបបំបាត់ជំងឺគ្រុនចាញ់ ចេញពីសហគមន៍តំបន់ការពារធម្មជាតិនានា ក្នុងដែនជម្រកសត្វព្រៃ «ព្រៃឡង់» ឲ្យអស់នៅត្រឹមឆ្នាំ២០២៥ ស្របតាមផែនការ យុទ្ធសាស្ត្រជាតិ លុបបំបាត់ជំងឺគ្រុនចាញ់ ក្នុងព្រះរាជាណាចក្រកម្ពុជា ឆ្នាំ២០១១-២០២៥ និងការកាត់ផ្តាច់ទាំងស្រុងជំងឺឆ្លងផ្សេងៗទៀត ដូចជាជំងឺអេដស៍ និងជំងឺគ្រុនឈាម ជាដើម ចេញពីសហគមន៍ តំបន់ការពារធម្មជាតិ៕
