រាជធានីភ្នំពេញ ៖ សម្តេច ហ៊ុន សែន នាយករដ្ឋមន្ត្រីកម្ពុជា នៅថ្ងៃទី២៦ ខែវិច្ឆិកា ឆ្នាំ២០១៩ បានផ្ញើលិខិតឆ្លើយតបមួយច្បាប់ទៅលោក ដូណាល់ត្រាំ ប្រធានាធិបតីសហរដ្ឋអាមេរិក បន្ទាប់ពីប្រធានាធិបតីប្រទេសមហាអំណាចមួយនេះ បានផ្ញើលិខិតចំនួន២ច្បាប់ជូន សម្តេច ហ៊ុន សែន ដែលខ្លឹមសារក្នុងលិខិតនោះ ដោយសហរដ្ឋអាមេរិកបញ្ជាក់ជំហរចង់បង្កើតទំនាក់ទំនងចំណងមិត្តភាពទ្វេភាគីឲ្យកាន់តែប្រសើរថែមទៀត ។ ទន្ទឹមនោះសហរដ្ឋអាមេរិកសន្យា គោរពអធិបតេយ្យភាពរបស់កម្ពុជា ហើយមិនគាំទ្រចំពោះការផ្លាស់ប្តូររបបនោះឡើយ ។
ចំណែកលិខិតរបស់សម្តេច ហ៊ុន សែន ផ្ញើជូនលោក ដូណាល់ត្រាំ ក៏បង្ហាញផងដែរនូវ ការកោតសរសើរចំពោះសារដ៏ច្បាស់លាស់របស់លោក ត្រាំ ស្តីពីការប្តេជ្ញាចិត្តរបស់សហរដ្ឋ អាមេរិក ចំពោះភាពជាដៃគូយុទ្ធសាស្ត្រអាស៊ាន-អាមេរិកនិងតួនាទីស្នូលរបស់អាស៊ាន ។ សម្តេចបន្តថា ដោយហេតុផលនេះ ខ្ញុំមានបំណងដ៏ជ្រាលជ្រៅក្នុងការជំរុញទំនាក់ទំនងនេះ បន្ថែមទៀតនិងសូមទទួលយកការអញ្ជើញរបស់ឯកឧត្តម ដើម្បីចូលរួមកិច្ចប្រជុំកំពូលពិសេស អាស៊ាន-អាមេរិកដែលនឹងប្រព្រឹត្តិទៅនៅត្រីមាសទីមួយនៃឆ្នាំ២០២០ នៅសហរដ្ឋអាមេរិក។
សម្តេចលើកឡើងថា អំពីទំនាក់ទំនងរវាងប្រទេសយើងទាំងពីរ ខ្ញុំសូមឯកភាពជាមួយ ឯកឧត្តមដែលថា ទំនាក់ទំនងរវាងប្រទេសទាំងពីរបានឆ្លងកាត់នូវដំណាក់កាលតឹងតែងនិង ធូស្រាលជាបន្តបន្ទាប់ ។ ទោះយ៉ាងណាក៏ដោយខ្ញុំយល់ថា យើងមិនត្រូវឲ្យខ្លួនយើងក្លាយជា ចំណាប់ខ្មាំងនៃទំព័រខ្មៅងងឹតខ្លះនៃប្រវត្តិសាស្ត្ររបស់យើងនោះទេ ។ មានដំណាក់កាលដ៏ ស្រស់បំព្រងជាច្រើនផ្សេងទៀត ដែលមានសារៈប្រយោជន៍ក្នុងការបំពាក់បំប៉នពូនជ្រុំសំរាប់ធ្វើ ឲ្យទំនាក់ទំនងរវាងប្រទេសនិងប្រជាជនយើងទាំងពីរកាន់តែមានការរីកលូតលាស់ថែមទៀត។
សម្តេចបញ្ជាក់បន្ថែមថា នៅពេលបច្ចុប្បន្ននេះមួយផ្នែកនៃវិបុលភាពរបស់ប្រជាជន កម្ពុជាគឺពិតជាបានមកពីលទ្ធផលនៃការចូលរួមវិភាគទានរបស់ប្រជាជន និងរដ្ឋាភិបាលសហ រដ្ឋអាមេរិក ដោយចាប់ផ្តើមពីការធ្វើប្រជាធិបតេយ្យនូបនីយកម្មដោយសន្តិវិធីដល់ការកសាង ប្រទេសជាតិ អភិបាលកិច្ចសង្គមនិងការទទួលបានការចូលទីផ្សារដ៏ទូលំទូលាយរបស់សហរដ្ឋ អាមេរិក ។ ខ្ញុំសូមថ្លែងអំណរនិងវាយតម្លៃខ្ពស់ចំពោះកាយវិការដ៏សប្បុរសធម៌នេះ ។ សំខាន់បំផុតខ្ញុំទទួលបាននូវការធានាតាមរយៈការអះអាងដ៏ជាក់លាក់របស់ឯកឧត្តមក្នុងការ ស្វែងរកការចូលរួមដ៏ពិតប្រាកដមួយក្នុងការអនុវត្តលទ្ធិប្រជាធិបតេយ្យ សេរីភាពបុគ្គលនិង នីតិរដ្ឋជាជាងការផ្លាស់ប្តូររបប ។
សម្តេចលើកឡើងថា ជាប្រទេសមួយដែលមានលទ្ធិប្រជាធិបតេយ្យដ៏ក្មេងខ្ចី ឯកឧត្តមប្រហែលជាអាចទទួលស្គាល់ការតស៊ូរបស់យើងខ្ញុំក្នុងការស្វែងរក សន្តិភាពពេញលេញមួយដែលជាលក្ខខណ្ឌមិនអាចខ្វះបាន មុនពេលដែលយើងខ្ញុំអាច កសាងប្រទេសឡើងវិញ ដោយប្រកាន់ខ្ជាប់នូវប្រព័ន្ធប្រជាធិបតេយ្យពហុបក្ស ។ ខ្ញុំសូមថ្លែង អំណរគុណចំពោះការយោគយល់និងការអត់ធ្មត់របស់ឯកឧត្តមចំពោះបញ្ហាអស់ទាំងនេះ ហើយខ្ញុំមានសេចក្តីរីករាយឲ្យក្រុមការងារកិច្ចការបរទេសរបស់យើងខ្ញុំធ្វើការជាមួយក្រុមការ ងារកិច្ចការបរទេសរបស់ឯកឧត្តម ដើម្បីស្តារទំនុកចិត្តនិងភាពជឿជាក់ឡើងវិញនឹងកសាង ឡើងវិញនូវចំណងមិត្តភាពរវាងប្រទេសនិងប្រជាជនយើងទាំងពីរដូចដែលឯកឧត្តមបាន បញ្ជាក់នៅក្នុងលិខិតរបស់ឯកឧត្តម ៕
សូមអានខ្លឹមសារទាំងស្រុងនៃសារលិខិតរបស់សម្តេច ហ៊ុន សែន ធ្វើជូនលោក ដូណាល់ត្រាំ ប្រធានាធិបតីសហរដ្ឋអាមេរិក ៖
