ខេត្តបន្ទាយមានជ័យ ៖ នៅវេលាម៉ោង៣ល្ងាច ថ្ងៃទី២៥ ខែវិច្ឆិកា ឆ្នាំ២០១៩ នៅចំណុចវាលស្រែ ស្ថិតក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្ដបន្ទាយមានជ័យ បុរសម្នាក់បើកម៉ាស៊ីនច្រូតស្រូវ នៅក្នុងស្រែប៉ះចំមីនតោនបណ្តាលឲ្យផ្ទុះខ្ទេចអស់កង់ច្រវ៉ាក់និងអ្នកបើកម៉ាស៊ីនច្រូតរងរបួសយ៉ាងធ្ងន់ដាច់ដៃម្ខាង ។
មេបញ្ជាការមូលដ្ឋានកងរាជអាវុធហត្ថ ស្រុកអូរជ្រៅ បានប្រាប់ឲ្យដឹងថា ៖ ជនរងគ្រោះ មានឈ្មោះ ជ្រុន ធឿន ភេទប្រុស អាយុ៣៨ឆ្នាំ រស់នៅភូមិកុំក្រោម ឃុំឬស្សីក្រាំង ស្រុកមោងឬស្សី ខេត្ដបាត់ដំបង។ នៅមុនពេលកើតហេតុនោះ ជនរងគ្រោះបានបើកម៉ាស៊ីនច្រូតស្រូវ ទៅច្រូតក្នុងស្រែ នៅចំងាយពីភូមិ ប្រហែល៨០០ម៉ែត្រ កំពង់តែច្រូតស្រូវសុខៗស្រាប់តែបើកកិនពីលើមីនតោនបណ្តាលឲ្យផ្ទុះតែម្តង ធ្វើឲ្យជនរងគ្រោះរងរបួសដាច់ដៃស្តាំត្រឹមដើមដៃ ចំណែកម៉ាស៊ីនច្រូតដាច់ច្រវ៉ាក់ខ្ទេចអស់។
ក្រោយពីកើតហេតុរួចមក ជនរងគ្រោះត្រូវបានគេជួយដឹកជញ្ជូនយកទៅមន្ទីរពេទ្យ ស្រុកគោកធ្យូង ខេត្តស្រះកែវ ប្រទេសថៃ ដើម្បីជួយសង្គ្រោះជាបន្ទាន់ភ្លាមៗផងដែរ។ចំណែកឯម៉ាស៊ីនច្រូតស្រូវម៉ាកគូបូតា ពណ៌ស សមត្ថកិច្ចឲ្យម្ចាស់ រក្សាទុកនៅកន្លែងកើតហេតុដដែលមិនបានយកទៅរក្សាទុកនៅអធិការបាននោះទេ៕
