រាជធានីភ្នំពេញ ៖ អតីតសកម្មជនបក្សប្រឆាំងឈ្មោះ តោ និមល និងភរិយារបស់គាត់ដែលគេបានស្គាល់ថាជាសកម្មជនដែលធ្លាប់បានបង្ហោះសារនៅលើហ្វេសប៊ុកវាយប្រហាររដ្ឋាភិបាលដឹកនាំដោយសម្តេចតេជោ ហ៊ុន សែន និងគាំទ្រដំណើរវិលត្រឡប់មកកម្ពុជារបស់ប្រធានស្ដីទីអតីតគណបក្សសង្គ្រោះជាតិ លោក សម រង្ស៊ី បានត្រឡប់ពីប្រទេសថៃចូលមកតាមច្រកទ្វារព្រំដែនបឹងត្រកួន ស្រុកថ្មពួក ខេត្តបន្ទាយមានជ័យ ហើយបានចូលមកសារភាពដើម្បីទទួលបានការអធ្យាស្រ័យពីរាជរដ្ឋាភិបាលកម្ពុជា ។
លោក តោ និមល រួមទាំងភរិយាបានផ្តល់បទសម្ភាសន៍ជាមួយសារព័ត៌មានក្នុងស្រុកដោយលោកបានរៀបរាប់ថា លោកទទួលបានការណែនាំពីលោក អេង ឆៃអ៊ាង អនុប្រធានបក្សសង្គ្រោះជាតិ ដើម្បីដើរកៀរគរប្រមូលពលករតាមរោងចក្រនៅប្រទេសថៃមកអមដំណើរលោក សម រង្ស៊ី នៅថ្ងៃទី ៩ វិច្ឆិកា កន្លងទៅ ។ ប៉ុន្តែដោយសារការបរាជ័យ នៃផែនការរដ្ឋប្រហាររបស់ សម រង្ស៊ី ទើបពលរដ្ឋដែលគ្រោងអមដំណើរបានបែកខ្ញែកគ្នាទៅវិញរៀងៗខ្លួន ។
អតីតសកម្មជននៃអតីតបក្សសង្គ្រោះជាតិពីរនាក់ប្ដីប្រពន្ធបានថ្លែងថា លោក សម រង្ស៊ី កំពុងដើរទៅរកភាពទាល់ច្រក ហើយនឹងបាត់បង់ប្រជាប្រិយភាព បើសិនជាលោក សម រង្ស៊ី នៅតែ បន្តញុះញង់និងបោកប្រាស់ប្រជាពលរដ្ឋបន្តទៀត ។
អតីតសកម្មជនរូបនោះបានបន្តថា ក្នុងអំឡុងពេលរស់នៅប្រទេសថៃ លោកទទួលបានប្រាក់ឧបត្ថម្ភក្នុងមួយខែ ១០០ ដុល្លារ សម្រាប់ការរស់នៅ។ លោកបញ្ជាក់បន្ថែមថា នៅប្រទេសថៃលោកតែងតែជួបជុំគ្នាពេលទំនេរ ដូចជា ការញ៉ាំកាហ្វេ ហូបនំបញ្ចុក កៀរគរមនុស្សឲ្យមកចូលរួមហែហមលោក សម រង្ស៊ី ចូលស្រុកខ្មែរ។ ទោះយ៉ាងណាលោកថា មិនមានមនុស្សរាប់លាននាក់គ្រោងអមដំណើរលោក សម រង្ស៊ី ដូចអ្វីដែលលោក សម រង្ស៊ី បានអះអាងនោះទេ។
លោក តោ និមល បានសារភាពបន្តថា កត្តាដែលប្រជាពលករមិនអាចចូលមកច្រើនដោយសារម្នាក់ៗគាត់ខំប្រឹងធ្វើការចិញ្ចឹមជីវិតគ្រួសារបើគាត់មកចូលរួមជាមួយ សម រង្ស៊ី ពួកគាត់ខាតធ្វើការងារ ។ តើអ្នកណាទៅចិញ្ចឹមគ្រួសារគាត់ ។ ដូច្នេះការដែលគេថាមករាប់សែនរាប់លាននោះជាការបំប៉ោងតួលេខទេ ការឃោសនាអកុសល និងជាការបោកប្រាស់ទេ ។
យ៉ាងណាក៏ដោយលោក តោ និមល និងភរិយាបានសម្តែងការស្ដាយក្រោយដែលបានធ្វើនូវទង្វើខុសឆ្គងកន្លងមក ដូចជា ការបង្ហោះសារមានខ្លឹមសារប៉ះពាល់ការដឹកនាំរបស់សម្តេច ហ៊ុន សែន នាយករដ្ឋមន្ត្រីកម្ពុជាជាដើម ។ ទន្ទឹមនោះលោកបានអះអាងថា ជីវិតនយោបាយរបស់លោក សម រង្ស៊ី កំពុងដើរដល់ទីទាល់ច្រកហើយ។ លោក សម រង្ស៊ី នឹងបាត់បង់ប្រជាប្រិយភាព បើសិនជាលោកបន្តញុះញង់ និងបោកប្រាស់បន្តទៀត៕
