ខេត្តកំពត ៖ នៅម៉ោងប្រមាណជិត៥ទៀបភ្លឺ ថ្ងៃទី២០ ខែវិច្ឆិកា ឆ្នាំ២០១៩ មានករណីឆេះបន្ទប់ស្នាក់នៅក្នុងបរិវេណកាស៊ីណូ ហាទៀងវេហ្គាស នៅខេត្តកំពត បណ្តាលឱ្យមនុស្សស្លាប់បាត់បង់ជីវិតក្នុងបន្ទប់ជាន់ទី១នៃអគារស្នាក់នៅរបស់បុគ្គលិកកាស៊ីណូ ហាទៀងវេហ្គាស។
បុគ្គលិកផ្នែកចែកបៀរដែលស្នាក់នៅក្នុងបន្ទប់កាស៊ីណូ ហាទៀងវេហ្គាស ម្នាក់បានស្លាប់យ៉ាងអណោចអធ័មក្នុងបន្ទប់ ខណៈមានអគ្គិសភ័យឆាបឆេះបន្ទប់ស្នាក់អាស្រ័យ នាវេលាទៀបភ្លឺ ស្ថិតក្រោយកាស៊ីណូ ហាទៀងវេហ្គាស ដែលមានទីតាំងក្នុងច្រកទ្វារព្រំដែនអន្តរជាតិព្រែកចាក ឃុំឫស្សីស្រុកខាងលិច ស្រុកកំពង់ត្រាច ខេត្តកំពត។
យោងតាមប្រភពដាច់ដោយឡែកបាននិយាយថា នៅក្នុងបន្ទប់កើតហេតុខាងលើមានបុគ្គលិកកាស៊ីណូស្នាក់នៅចំនួន៣នាក់ ពេលកើតមានអគ្គីភ័យឆាបឆេះគឺបុគ្គលិក២នាក់ បានរត់ចេញពីបន្ទប់ទាន់ ចំណែកជនរងគ្រោះម្នាក់ដេកលង់លក់មិនដឹងខ្លួនទើបភ្លើងឆេះបណ្តាលឱ្យស្លាប់យ៉ាងអណោចអធ័មតែម្តង។
ទាក់ទិននឹងករណីឆេះបន្ទប់ស្នាក់នៅរបស់បុគ្គលិកកាស៊ីណូ ហាទៀងវេហ្គាស នេះ សមត្ថកិច្ចមូលដ្ឋានបានបញ្ជាក់ថា គឺបណ្តាលមកពីទុស្សេរខ្សែចរន្តអគ្គិសនី ដោយខណៈនោះក៏មានការអន្តរាគមន៍ពីអាជ្ញាធរ និងសមត្ថកិច្ចជួយពន្លត់យ៉ាងសស្រាក់សស្រាំផងដែរ ទើបអណ្តាតភ្លើងមិនឆេះរាលដាលទៅបន្ទប់ផ្សេងទៀត។
សពបុគ្គលិករងគ្រោះ ត្រូវបានគេដឹកបញ្ជូនទៅចាត់ចែងធ្វើបុណ្យតាមប្រពៃណីនៅឯស្រុកកំណើត ក្នុងខេត្តតាកែវ៕
