អន្តរជាតិ ៖ អង្គការសហប្រជាជាតិបាននិយាយថា កុមារជាង១០ម៉ឺននាក់ បច្ចុប្បន្នកំពុងត្រូវបានឃុំខ្លួនទាក់ទងនឹងការធ្វើចំណាកស្រុកនៅក្នុងសហរដ្ឋអាមេរិក ដែលជារឿយៗ មានការរំលោភលើច្បាប់អន្តរជាតិ។
អ្នកនិពន្ធឈានមុខនៃការសិក្សាជាសកលរបស់អង្គការសហប្រជាជាតិស្តីពីកុមារដែលត្រូវបានដកហូតសិទ្ធិសេរីភាព លោក Manfred Nowak បាននិយាយថា តួលេខនេះគឺសំដៅទៅលើកុមារចំណាកស្រុកដែលកំពុងជាប់ឃុំឃាំង បន្ទាប់ពីចូលព្រំដែនសហរដ្ឋអាមេរិកដោយគ្មានអាណាព្យាបាល ព្រមទាំងអ្នកដែលត្រូវបានឃុំឃាំងជាមួយសាច់ញាតនិងអនីតិជនដែលត្រូវបានបំបែកចេញពីឪពុកម្តាយរបស់ពួកគេមុនពេលឃុំខ្លួន។
លោក Nowak បានប្រាប់ AFP ដោយផ្អែកលើទិន្នន័យផ្លូវការចុងក្រោយបង្អស់ថា “ចំនួនសរុបដែលត្រូវបានឃុំខ្លួននាពេលបច្ចុប្បន្នគឺ១០៣,០០០នាក់”។ យោងតាមការសិក្សាជាសកលដែលចាប់ផ្តើមកាលពីថ្ងៃចន្ទបានបង្ហាញថា នៅទូទាំងពិភពលោក កុមារយ៉ាងតិច៣៣០,០០០នាក់នៅទូទាំង៨០ប្រទេសកំពុងត្រូវបានឃុំឃាំងដោយសារហេតុផលទាក់ទងនឹងការធ្វើចំណាកស្រុកដែលនេះមានន័យថា សហរដ្ឋអាមេរិកទទួលខុសត្រូវជិតមួយភាគបីនៃការឃុំខ្លួនបែបនេះ។
ស្របពេលជាមួយគ្នានោះដែរ ការសិក្សានេះមួយផ្នែកបានមើលទៅលើការរំលោភលើអនុសញ្ញារបស់អង្គការសហប្រជាជាតិស្តីពីសិទ្ធិកុមារដែលចែងថា ការឃុំខ្លួនកុមារគឺត្រូវបានប្រើប្រាស់តែជាវិធានការមួយនៃមធ្យោបាយចុងក្រោយនិងក្នុងរយៈពេលខ្លីបំផុតប៉ុណ្ណោះ។ គួរបញ្ជាក់ថា សហរដ្ឋអាមេរិកគឺជារដ្ឋសមាជិកអង្គការសហប្រជាជាតិតែមួយគត់ដែលមិនបានផ្តល់សច្ចាប័នលើអនុសញ្ញានេះដែលបានចូលជាធរមានក្នុងឆ្នាំ១៩៩០៕
