ខេត្តកំពង់ធំ ៖ រដ្ឋបាលខេត្តកំពង់ធំចាប់ផ្តើមកសាង សមិទ្ធផលថ្មីមួយទៀតហើយ ដែលមានឈ្មោះ សួនច្បារនិងរូបសំណាក ដាវដែកកំពង់ស្វាយ ស្ថិតនៅចំនុចច្រមុះជ្រូក ផ្លូវបំបែក ពីខេត្តកំពង់ធំចេញទៅខេត្តព្រះវិហារនិងទៅខេត្តសៀមរាបក្នុងភូមិសាស្ត្រឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ។
ឯកឧត្តម សុខ លូ អភិបាលខេត្តកំពង់ធំបានបង្ហាញពីជីវប្រវត្តិខ្លះ របស់ដាវដែកកំពង់ស្វាយ ដែលកាលពីដើមឡើយ ដាវដែកកំពង់ស្វាយនេះ ស្ថិតនៅក្នុងទឹកដីស្រុកកំពង់ស្វាយ ដោយមានទាំងជនជាតិខ្មែរនិងជនជាតិគួយរស់នៅផង ហើយជនជាតិគួយ គឺជាពូជពង្សអ្នកស្លដែកដ៏ពូកែ ដែលគេដឹងថា ជាអ្នកផលិតដែក ទាំងអម្បាលម៉ានសម្រាប់យកទៅប្រើប្រាស់ នៅសម័យបុរាណ គឺសុទ្ធសឹងស្លឬផលិតជាឧបករណ៏ ដោយជនជាតិគួយ ដោយយកថ្មដែលមានរ៉ែដែក យកស្លនៅក្នុង គុកចង្ក្រាន ដោយប្រើសីតុណ្ហភាព ៣០០០អង្សា ទើបរលាយក្លាយជាផ្នែក ហើយភ្នំដែលគេស្គាលថា ថ្មមានជាតិរ៉ែដែកច្រើននោះគឺភ្នំដែក ដែលស្ថិតនៅក្នុងស្រុករវៀង ខេត្តព្រះវិហារ សព្វថ្ងៃ និងជាអតីតដែនដី នៃខេត្តកំពង់ស្វាយ។ ក្នុងនោះអ្វីដែលពិសេសរបស់ផលិតដែកនោះ គឺដាវ ដែលជាអាវុធមួយប្រភេទ មានសារៈសំខាន់ ក្នុងសឹកសង្គ្រាមនាំសម៏យបុរាណ កាលផលិតដាវដែក ដោយជនជាតិគួយនៅក្នុងកំពុងស្វាយមានភាពខ្លាំងណាស់ ត្បិតដែកដែលយកមកធ្វើជាដាវ មានគុណភាពល្អប្រសើណាស់ ហេតុដូច្នេះហើយ បានជាមានបទចម្រៀង តាមមង្គលការ ច្រៀងថាដាវអើយ ដាវដែក ដាវល្អចំឡែ ដាវដែកកំពង់ស្វាយ ដូច្នេះហើយទើបអ្នកនិពន្ធ តែងជាបទចម្រៀងរហូតមកដល់សព្វថ្ងៃនេះ។
ឯកឧត្តម បានបន្តថា រូបសំណាកដាវដែកកំពង់ស្វាយ មានប្រវែង ៦ម៉ែត្រ ៤តឹក មានទទឹងដាវ០;៤៥ម កម្រាស់គល់ដាវ ០:៧១ម ផ្លែគឡដាវ០:៣០ម ចុងដាវ០:២៨ម មុខដាវ០:១០ម ។
ឯកឧត្តម បានបញ្ជាក់ថា ពិធីសិតដាវដែកកំពង់ស្វាយនេះ និងចាប់ផ្តើមនៅថ្ងៃទី២៨ ខែធ្នូ ២០១៩ ស្ថិតនៅវត្ត ឥន្ទ្រី សំវរៈ (ហៅវត្តកំពង់ធំ) នឹងអោយធ្វើរួចរាល់នៅមុនថ្ងៃចូលឆ្នាំខ្មែរ ២០២០ ព្រោះថា ដាវនេះ មានទម្ងន់ដល់០២តោន ឯណោះ ដើម្បីទុកអោយមហាជននិងភ្ញៀវទេសចរណ៏ បានមកទស្សនាកម្សាន្ត ទឹកដីស្រុកកំពង់ស្វាយ ខេត្តកំពង់ធំ ជាប្រវត្តិសាស្ត្រ ៕
