មានករណីមនុស្សដួលទៅលើភ្នក់ភ្លើង បណ្ដាលអោយស្លាប់ខ្លួនឯង ដោយសារជំងឺឡើងឈាម នៅថ្ងៃសុក្រ ទី១៥ ខែវិច្ឆិកា ឆ្នាំ២០១៩ វេលាម៉ោង ៦ នៅចំណុចផ្ទះឈ្មោះ ហោ ជា ភេទស្រី នៅភូមិគោកស្រុក ឃុំតាំងក្រសៅ ស្រុកប្រាសាទសំបូរ ខេត្តកំពង់ធំ។
សពឈ្មោះ ស៊ុន ពោ ភេទស្រី អាយុ៧៤ឆ្នាំ នៅភូមិគោកស្រុក ឃុំតាំងក្រសៅ ស្រុកប្រាសាទសំបូរ ខេត្តកំពង់ធំ។
តាមការបំភ្លឺរបស់ឈ្មោះ ហោ ជា ភេទស្រី អាយុ៣៥ឆ្នាំ ត្រូវជាកូនបង្កើតបានបំភ្លឺប្រាប់ថា៖ ជារៀងរាល់ថ្ងៃ ម្ដាយនាងខ្ញុំមានរោគឡើងឈាម ហើយលេបថ្នាំរាល់ថ្ងៃ។ លុះដល់ថ្ងៃទី១៤ / ១១ / ២០១៩ វេលាម៉ោងប្រហែល១៩ : ០០នាទី ម្ដាយនាងខ្ញុំបានចូលដេកហើយនិយាយថា៖ មិនស្រួលខ្លួន លុះដល់ថ្ងៃទី១៥ / ១១ / ២០១៩ វេលាម៉ោងប្រហែល ៥ និង ១០នាទី នាងខ្ញុំនិងប្ដីបានលឺសំលេងថ្ងូរ រកលើផ្ទះមិនឃើញ ភ្លាមនោះនាងខ្ញុំបានចុះមកដីបានឃើញម្ដាយនៅក្នុងភ្នក់ភ្លើងឆេះមួយកំណាត់ខ្លួននិងដៃរួញនិងជើង នៅដង្ហើម ភ្លាមនោះនាងខ្ញុំបានស្រែកហៅប្ដីនិងអ្នកជិតខាងមកជួយយកទៅលើផ្ទះបានប្រហែល ៥នាទី បានដាច់ដង្ហើមពេលនោះបានហៅបងប្អួនបង្កើតមកតែម្ដង។
ទទួលព័ត៌មានភ្លាម កម្លាំងជំនាញនគរបាលស្រុក និងនគរបាលប៉ុស្ដិ៍តាំងក្រសៅ លោកគ្រូពេទ្យមណ្ឌលសុខភាពឃុំ លោកមេឃុំ លោកមេភូមិ ព្រមទាំងក្រុមប្រឹក្សាឃុំ ចុះដល់កន្លែងកើតហេតុ និងពិនិត្យសាកសព ដោយមានស្នាមភ្លើងឆេះមួយចំហៀងខ្លួន និងឆេះដៃ ជើងខ្លោចរួញ។
ក្រៅពីការពិនិត្យឃើញខាងលើ យើងពិនិត្យពុំឃើញមានអ្វីឡើយ។ តាមការស្រាវជ្រាវពិនិត្យវិភាគកន្លែងកើតហេតុ អាចឲ្យយើងសន្និដ្ឋានបានថា៖ ការស្លាប់នេះដោយសារជំងឺរ៉ាំរ៉ៃខ្លួនឯង ឡើងឈាមដួលទៅលើភ្នក់ភ្លឺងដែលកំពុងឆេះ បណ្ដាលអោយស្លាប់ .ដោយមិនពាក់ព័ន្ធបទល្មើសព្រហ្មទណ្ឌណាមួយឡើយ។
បន្ទាប់ពីពិនិត្យចប់សព្វគ្រប់ហើយ សាកសពបានប្រគល់ជូនក្រុមគ្រួសាររៀបចំធ្វើបុណ្យតាមប្រពៃណី៕
