ខេត្តព្រះសីហនុ ៖ យោងតាមប្រភពពត័មានបានឲ្យដឹងថា នៅថ្ងៃទី១៤ ខែវិច្ឆិកា ឆ្នាំ២០១៩ កម្លាំងសមត្ថកិច្ចខេត្តព្រះសីហនុ បានបង្ក្រាបក្រុមអ្នកប្រើអំពើហឹង្សាក្នុងជម្លោះដីធ្លី នៅភូមិគគី ឃុំបិតត្រាំង ស្រុកព្រៃនប់ ដោយឃាត់ខ្លួនជនសង្ស័យបានចំនួន ១៦នាក់។
តាមសមត្ថកិច្ច បញ្ជាក់ថា មនុស្សទាំង១៦នាក់នេះ ជាប់សង្ស័យពាក់ព័ន្ធនឹងជម្លោះដីធ្លី រហូតដល់មានការបាញ់បោះផ្ទុះអាវុធ កាលពីថ្ងៃ១៣ ខែវិច្ឆិកា ឆ្នាំ២០១៩ ក្នុងនោះជាមួយនឹងការឃាត់ខ្លួន សមត្ថកិច្ចដកហូតបានវត្ថុតាងមួយចំនួនដូចជា កាំភ្លើងកែឆ្នៃ កាំបិត ពូថៅ ចបជីក និងឧបករណ៍មួយចំនួនទៀត ដែលអាចប្រើប្រាស់សម្រាប់ការតតាំងដោយជម្លោះហឹង្សា ព្រមទាំងឧបករណ៍ប្រើប្រាស់គ្រឿងញៀនខ្លះទៀតផង។
បច្ចុប្បន្ននេះ ជនសង្ស័យទាំង១៦នាក់ខាងលើ រួមជាមួយវត្ថុតាងមួយចំនួន ត្រូវបានកម្លាំងនគរបាលឃាត់ខ្លួន និងរក្សាទុកបណ្តោះអាសន្ននៅស្នងការដ្ឋាននគរបាលខេត្តព្រះសីហនុ រង់ចាំការដោះស្រាយតាមនីតិវិធីច្បាប់៕
