បន្ទាយមានជ័យ៖ នគរបាលការិយាល័យ ប្រឆាំងគ្រឿងញៀន នៃស្នង ការដ្ឋាននគរបាល ខេត្តបន្ទាយមានជ័យ បានបន្តធ្វើការ ស្រាវជ្រាវរហូត តាមចាប់ ជនសង្ស័យម្នាក់ទៀត ដែលជាប់ពាក់ព័ន្ធ សកម្មភាព ប្រើប្រាស់ និងចែកចាយ គ្រឿងញៀន នៅក្រុងសិរីសោភ័ណ កាលពីល្ងាចថ្ងៃទី២៨ ខែធ្នូ ឆ្នាំ២០១៤។
ក្រោយប្រតិបត្តិការ ចាប់ខ្លួនជនសង្ស័យរូបនេះ កម្លាំងសមត្ថកិច្ច បានដកហូតថ្នាំញៀន មួយចំនួន និងវត្ថុតាង ផ្សេងទៀតផងដែរ។
មន្ត្រីនគរបាលការិយាល័យ ប្រឆាំងបទល្មើស គ្រឿងញៀន ខេត្ត បន្ទាយមានជ័យ បានថ្លែងបញ្ជាក់ថា ក្រោយពីចាប់មុខសញ្ញា ប្រើប្រាស់ និងចែកចាយគ្រឿងញៀនម្នាក់ នៅក្រុងប៉ោយប៉ែតរួចមក កម្លាំងនគរបាល បានបន្តធ្វើការ ស្រាវជ្រាវ រហូតតាមចាប់ ជនសង្ស័យម្នាក់ទៀត នៅក្រុង សិរីសោភ័ណ ព្រមទាំងដកហូត វត្ថុតាងជាគ្រឿងញៀន និងសម្ភារះ មួយចំនួនផងដែរ។
មន្ត្រីនគរបាលរូបនេះ បានបន្តទៀតថា ក្រោយក្តាប់មុខ សញ្ញា បានហើយ ស្នងការនគរបាល ខេត្តបន្ទាយមានជ័យ លោកឧត្តមសេនីយ៍ អាត់ ខែម បានបញ្ជាមក ការិយាល័យដឹកនាំដោយ លោក ធិន ស៊ិនដេត ចុះទៅស៊ើបអង្កេត និងប្រើវិធានការណ៍ របស់ខ្លួន រហូតតាមចាប់ ជនសង្ស័យ រូបនេះតែម្តង។
បច្ចុប្បន្ន ជនសង្ស័យ ត្រូវបានបន្តសួរនាំ និងឃុំខ្លួន ជាបណ្តោះអាសន្ន នៅការិយាល័យ ប្រឆាំងបទល្មើសគ្រឿងញៀន ដើម្បីកសាង សំណុំរឿង បញ្ជូនទៅកាន់តុលាការ ចាត់ការតាមផ្លូវច្បាប់។
ជុំវិញប្រតិបត្តិការ លើការបង្ក្រាប បទល្មើសគ្រឿងញៀន នៅក្នុងខេត្ត បន្ទាយមានជ័យ លោកឧត្តមសេនីយ៍ អាត់ ខែម បានបញ្ជាក់ថា នេះ ជាកិច្ចការងារ មួយដែលយើងខិតខំ ប្រឹងប្រែងបន្តទៀត ដើម្បីធ្វើការស្រាវជ្រាវ ស៊ើបអង្កេត ធ្វើយ៉ាងណា រកឲ្យឃើញ ពីមុខសញ្ញា ដែលចែកចាយ ជួញដូរ គ្រឿងញៀន។ យើងត្រូវបន្តការចាប់ ទាំងអ្នកប្រើប្រាស់ និងចែកចាយ ជួញដូរ គ្រឿងញៀន ដែលខុសច្បាប់។
លោកឧត្តមសេនីយ៍ស្នងការ បានបន្តទៀតថា ជនសង្ស័យទាំងនេះ បន្តសកម្មភាពប្រើប្រាស់ផង ជួញដូរ ផងដែរ ដូច្នេះទេ យើងនឹងបន្តការធ្វើដូចភ្លៀងរលឹម និងធ្វើដល់ តំបន់ មួយចំនួន ដែលយើងគិតថា មានការស្មុគស្មាញ ទាក់ទងនឹងគ្រឿងញៀន តែស្ថានការណ៍ទូទៅ យើងឃើញថា មានការថយចុះច្រើន ដោយយើង បានបង្ក្រាបច្រើន និងរៀបចំសំណុំរឿង បញ្ជូនទៅកាន់តុលាការ ដើម្បីបន្តចាត់ការតាម នីតិវិធីតាមផ្លូវច្បាប់ ៕
ដោយចិន្តា
