អាជ្ញាធរកម្ពុជាបានយករូបថតទណ្ឌិត សម រង្ស៊ី រួមទាំងមនុស្សពាក់ព័ន្ធ៨នាក់ ទៅបិទតាមច្រកព្រំដែន ខណៈដែលរូបថតទណ្ឌិត សម រង្ស៊ី រួមទាំងមនុស្សស្និទនឹងទណ្ឌិតរូបនោះ៨នាក់ផ្សេងទៀត ត្រូវបានសមត្ថកិច្ចយកទៅបិទនៅច្រកអន្តរជាតិ ប៉ោយប៉ែត ហើយប្រកាសតាមចាប់ខ្លួនផងដែរ ។ ការស្វែងរកចាប់ខ្លួនអតីតមេដឹកនាំគណបក្សប្រឆាំងទាំងនោះ គឺបានធ្វើឡើងនៅគ្រាដែលសមត្ថកិច្ចរាប់ទាំងកងទ័ពផង កំពុងតែបង្កើនការរឹតបន្តឹងនៅតាមព្រំដែនទប់ស្កាត់មិនឲ្យក្រុមទណ្ឌិត សម រង្ស៊ី វិលចូលស្រុកនៅថ្ងៃ៩វិច្ឆិកាខាងមុខនេះ ។
អាជ្ញាធរថៃក៏បានយករូបថតទណ្ឌិត សម រង្ស៊ី រួមទាំងទណ្ឌិត៨នាក់ផ្សេងទៀតដែលជាអតីតមន្ត្រីជាន់ខ្ពស់អតីតបក្សប្រឆាំង បិទនៅតាមច្រកព្រំដែនសំខាន់ៗ ពិសេសព្រំដែនច្រកអានសេះជាប់ព្រំដែនខេត្តព្រះវិហារ និងខេត្តអ៊ូប៊ុន ប្រទេសថៃ ដើម្បីតាមចាប់ខ្លួនតាមដីកា របស់តុលាការកម្ពុជា ។
ប្រភពព័ត៌មានគួរឲ្យទុកចិត្តមួយបានឲ្យដឹងថា ទាហានឈុតខ្មៅថៃដែលប្រចាំការតាម ច្រកព្រំដែនកម្ពុជាថៃ បាននិយាយថា ថ្នាក់លើរបស់គេបានបញ្ជាថា បើឃើញមនុស្សក្នុងរូបថតនេះត្រូវចាប់ខ្លួនបញ្ជូនទៅថ្នាក់លើភ្លាម។
តាមព័ត៌មានទទួលបាន ខិតប័ណ្ណដែលប៉ូលិសដើរបិទនោះបានសរសេរអក្សរក្រហមធំៗថា ស្នងការនគរបាលខេត្តបន្ទាយមានជ័យ ប្រកាសតាមចាប់ខ្លួន «ក្រុមឧទ្ទាម ក្បត់ជាតិ» ហើយជាមួយគ្នានោះ សមត្ថកិច្ចបានអំពាវនាវដល់ប្រជាពលរដ្ឋឲ្យរាយការណ៍ទៅនគរបាល ប្រសិនបើឃើញក្រុមទណ្ឌិតទាំងនោះ។
សូមជម្រាបថា រូបថតទណ្ឌិតដែលទាំងអាជ្ញាធរថៃ និងអាជ្ញាធរកម្ពុជាយកទៅបិទតាមច្រកព្រំដែនរួមមាន រូបថតទណ្ឌិត សម រង្ស៊ី ទណ្ឌិត អេង ឆៃអ៊ាង ជូឡុង ស៊ូម៉ារ៉ា មូរ សុខហួរ តុ វ៉ានចាន់ ឡុង រី ហូ វ៉ាន់ នុត រំដួល និងសកម្មជនបក្សប្រឆាំងនៅប្រទេសជប៉ុន ទណ្ឌិត ហៃ វណ្ណា និងអ៊ុំ សំអាន ដែលធ្លាប់ជាប់ពន្ធនាគារទាក់ទងនឹងការរិះគន់បញ្ហាព្រំដែនកន្លងមក៕
