ខេត្តកណ្តាល ៖ សមត្ថកិច្ចបានឃាត់ខ្លួនជនសង្ស័យម្នាក់ដែលខឹងសង្សាសុំបែក បានយករូបអាក្រាតរបស់សង្សារខ្លួន ទៅចែកចាយក្នុងបណ្តាញហ្វេសប៊ុក កាលពីអំទ្បុងខែកញ្ញា ឆ្នាំ២០១៩ នៅចំណុចភូមិដើមពោធិ៍ ឃុំជ្រោយតាកែវ ស្រុកកោះធំ ខេត្តកណ្តាល ។
មន្ត្រីការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តកណ្តាល បានឱ្យដឹងនៅថ្ងៃទី៣ ខែវិច្ឆិកា ថាបន្ទាប់ពីទទួលបានពាក្យបណ្តឹងពីជនរងគ្រោះភ្លាម លោកដឹកនាំកម្លាំងចុះស្រាវជ្រាវប្រើរយៈពេល៣ថ្ងៃ រហូតកំណត់មុខសញ្ញាបាន និងសហការជាមួយនគរបាលខេត្តបន្ទាយមានជ័យ ចុះធ្វើការឃាត់ខ្លួនជនសង្ស័យ និងបញ្ជូនទៅសាលាដំបូងខេត្តកណ្តាលហើយ នៅព្រឹកថ្ងៃទី០៣ ខែវិច្ឆិកា នេះ។
ជនរងគ្រោះឈ្មោះ ជ.ល.ដ ភេទស្រី អាយុ២០ឆ្នាំ មានទីលំនៅភូមិ-ឃុំ កើតហេតុ មុខរបរ បុគ្គលិកកាស៊ីណូ ។ ចំណែកជនសង្ស័យឈ្មោះ លឹម សេងហៀង ភេទប្រុស អាយុ២៧ឆ្នាំ មានទីលំនៅភូមិឯកភាព ឃុំថ្មពួក ស្រុកថ្មពួក ខេត្ដបន្ទាយមានជ័យ។
គួររំលឹកថា កាលពីអំឡុងខែកញ្ញា ឆ្នាំ២០១៨ ជនសង្ស័យបានទំនាក់ទំនងស្រឡាញ់គ្នាជាមួយជនរងគ្រោះ និងរស់នៅជាមួយគ្នាបានរយៈពេលប្រហែល៣ខែ ។ រហូតដល់ខែមេសា ឆ្នាំ២០១៩ ជនរងគ្រោះសុំផ្តាច់ទំនាក់ទំនងស្នេហាជាមួយជនសង្ស័យ ព្រោះតែខ្លួនមានបំណងរៀបការជាមួយអ្នកផ្សេង ប៉ុន្ដែជនសង្ស័យមិនព្រមបែកគ្នា ហើយគំរាមកំហែងជនរងគ្រោះថា នឹងយករូបដែលខ្លួនថតទុកនោះបង្ហោះតាមហ្វេសប៊ុក ឲ្យគេឯងមើលទៀតផង ។
ប្រភពដដែលបន្តថា ក្រោយមកជនសង្ស័យក៏បានផ្ញើរូបអាក្រាតកាយរបស់ជនរងគ្រោះទៅឲ្យបងប្អូន និងមិត្តភ័ក្តរបស់នាងមើល រួមទាំងរូបរបស់អ្នកទាំងពីរធ្លាប់ដេកជាមួយគ្នាទៀត ហើយជនសង្ស័យនៅតែបន្ដចែកចាយរូបអាក្រាតកាយរបស់នារីរងគ្រោះទៅតាមឆាត ក្នុងគ្រុបផ្សេងៗជាច្រើនទៀត ។ ដោយសារជនរងគ្រោះព្យាយាមសុំបែកគ្នា ទើបខ្លួនសម្រេចចិត្ដផ្ញើរូបអាក្រាតកាយរបស់ជនរងគ្រោះ ទៅឲ្យបងប្អូន មិត្ដភក្តិនៅក្នុងគ្រុបផ្សេងៗទៀតបានមើល ដើម្បីឲ្យខូចកិត្ដិយស កេរ្ដិ៍ឈ្មោះ ក្នុងបំណងឲ្យជនរងគ្រោះមករស់នៅជាមួយខ្លួនវិញ ៕
