ខេត្តកំពង់ធំ ៖ រដ្ឋបាលខេត្តកំពង់ធំបានរៀបចំមហាសន្និបាតលើកទី ៣របស់សមាគមក្រុមប្រឹក្សាថ្នាក់មូលដ្ឋានខេត្តកំពង់ធំ ក្រោមអធិបតីភាពឯកឧត្តម ចាន់ តារា អភិបាលរងខេត្តកំពង់ធំ ដោយមានការអញ្ជើញចូលរួមពីក្រុមប្រឹក្សាស្រុក
ក្រុមប្រឹក្សាឃុំសង្កាត់ ប្រមាណជាង៣០០ នាក់ដោយមានការឧបត្ថម្ភគាំទ្រពីសហភាពអឺរ៉ុប សហការជាមួយរដ្ឋបាលខេត្តកំពង់ធំ នៅថ្ងៃទី ៣០ ខែតុលា ឆ្នាំ ២០១៩។
លោក គៀង សេងគី ប្រធានក្រុមប្រឹក្សាសមាគមក្រុមប្រឹក្សាក្រុងស្រុកឃុំសង្កាត់ខេត្តកំពង់ធំបានធ្វើរបាយការណ៍សង្ខេបរយៈពេល៥ឆ្នាំ និងបានលើកឡើងពីគោលបំណងក្នុងមហាសន្និបាតគឺ១ ការពង្រឹងស្ថាប័ន ២ ចីរភាពហិរញ្ញវត្ថុ ៣ អភិវឌ្ឍសមត្ថភាពសមាជិកក្រុមប្រឹក្សាថ្នាក់មូលដ្ឋាន ៤ ការតស៊ូមតិដើម្បីផលប្រយោជន៍សមាជិក ៥ ការផ្ដល់សេវាបន្ថែមដល់ក្រុមប្រឹក្សាថ្នាក់មូលដ្ឋានដើម្បីសម្រេចបានគោលដៅអភិវឌ្ឍន៍ប្រកបដោយនិរន្តរភាព ៦ ការលើកកម្ពស់ការអភិវឌ្ឍសេដ្ឋកិច្ចមូលដ្ឋានដោយយកចិត្តទុកដាក់លើការប្រែប្រួលអាកាសធាតុ ៧ ការលើកកម្ពស់ស្ត្រីក្នុងវិស័យនយោបាយនៅមូលដ្ឋាននិងបរិយាប័នសង្គម ។
ជាមួយគ្នានេះដែរលោកក៏បានលើកឡើងទៀតថាការលើកកម្ពស់ស្ថាប័ននិងការប្រតិបត្តិការរបស់សមាគមក្រុមប្រឹក្សាមូលដ្ឋានដើម្បីធានានូវការពេញចិត្តរបស់សមាជិកក្រុមប្រឹក្សានៅមូលដ្ឋានក្នុងការបំពេញមុខងារនិងការទទួលខុសត្រូវក៏ដូចជាការធ្វើឲ្យប្រជាពលរដ្ឋនៅតាមមូលដ្ឋានមានសេចក្តីពេញចិត្តចំពោះការបំពេញការងាររបស់អាជ្ញាធរមូលដ្ឋាននិងក្រុមប្រឹក្សាក្នុងការផ្ដល់សេវាសាធារណៈកាន់តែរហ័សមានប្រសិទ្ធភាពនិងកាន់តែគួរឲ្យទុកចិត្តនឹងឆ្លើយតបចំពោះតម្រូវការរបស់ពួកគាត់។
ជាមួយគ្នានោះដែរឯកឧត្តម ចាន់ តារា បានវាយតម្លៃខ្ពស់ចំពោះមហាសន្និបាតក្រុមប្រឹក្សាថ្នាក់មូលដ្ឋានអាណតិ្តទី៣ ដោយផ្អែកទៅលើការកែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដើម្បី បង្កើតឡើងនូវ វប្បធម៌ប្រជាធិតេយ្យនៅមូលដ្ឋាន ដោយមានការចូលរួមពីប្រជាពលរដ្ឋ ការលើកកម្ពស់គុណភាពសេវាសាធារណៈ និងការអភិវឌ្ឍសេដ្ឋកិច្ចមូលដ្ឋាន ដែលឆ្លើយតបនឹងតម្រូវការជាក់ស្តែងរបស់ប្រជាពលរដ្ឋ សំដៅលើកស្ទួយគុណភាពនៃជីវិតរបស់ប្រជាពលរដ្ឋ និងចូលរួមកាត់បន្ថយភាពក្រីក្រដោយប្រសិទ្ធភាព។
ឯកឧត្តមបានបន្តថានៅក្នុងអាណត្តិទី៥ នៃរដ្ឋសភា រាជរដ្ឋាភិបាលបានបន្តផ្តល់អាទិភាពដល់ការអនុវត្តកំណែទម្រង់នេះ កាន់តែ ស៊ីជម្រៅដោយផ្តោតលើកិច្ចការសំខាន់ៗចំនួន ៥ មាន៖
១. ពង្រឹងការគ្រប់គ្រងកិច្ចដំណើរការកំណែទម្រង់ ២. ពង្រឹងគណនេយ្យភាពតាមបែបប្រជាធិបតេយ្យ
៣. ពង្រឹងការគ្រប់គ្រង និងអភិវឌ្ឍធនធានមនុស្ស ៤. ពង្រឹងការផ្តល់សេវាសាធារណៈ និងផ្ទេរមុខងាររបស់រដ្ឋបាលថ្នាក់ក្រោមជាតិ និង ៥. ពង្រឹងវិមជ្ឈការហិរញ្ញវត្ថុ។
ជាការពិតណាស់ រដ្ឋបាលខេត្តកំពង់ធំ ទទួលស្គាល់និងគាំទ្រការបង្កើតសមាគមក្រុមប្រឹក្សាក្រុង ស្រុក ឃុំ សង្កាត់ ខេត្តកំពង់ធំ ជាតួអង្គសំខាន់គាំទ្រដល់ការអនុវត្តគោលនយោបាយកំណែទម្រង់ការ អភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ របស់រាជរដ្ឋាភិបាលកម្ពុជា និងការកសាងសមត្ថភាព ក្រុមប្រឹក្សាក្រុង ស្រុក ឃុំ សង្កាត់ នៅក្នុងខេត្តកំពង់ធំដើម្បីក្លាយជាស្ថាប័នតំណាងពិតប្រាកដរបស់ពលរដ្ឋ និងឆ្លើយតបចំពោះសេចក្តីត្រូវការនានារបស់ប្រជាពលរដ្ឋប្រកបដោយប្រសិទ្ធភាព។
ចុងក្រោយឯកឧត្តមបានផ្តាំផ្ញើដល់អង្គមហាសន្និបាត ត្រូវសាមគ្គីគ្នារវាងថ្នាក់ដឹកនាំសមាគមក្រុមប្រឹក្សាក្រុង ស្រុក ឃុំ សង្កាត់ ខេត្តកំពង់ធំ ដោយនាំមកនូវសមិទ្ធផលជាច្រើនជូនដល់សមាជិក ស្របគោលបំណង និងទិសដៅរបស់ សមាគម ក្នុងការលើកកម្ពស់ឋានៈ និងសមត្ថភាពរបស់ក្រុមប្រឹក្សាក្រុង ស្រុក ឃុំ សង្កាត់ ៕
