រាជធានីភ្នំពេញ ៖ កាលពីថ្ងៃទី៣០ ខែតុលា ឆ្នាំ២០១៩ ស្ថានទូតកម្ពុជា ប្រចាំប្រទេសថៃ បានចេញនូវសេចក្តីប្រកាសព័ត៌មានបន្ទាន់មួយ ដោយជម្រាបជូនដល់បងប្អូនពលករកម្ពុជា ដែលកំពុងស្នាក់នៅ និងធ្វើការ នៅក្នុងប្រទេសថៃថា កាលពីពេលថ្មីៗនេះ មានសារព័ត៌មានក្នុងស្រុក និងសារព័ត៌មាន តាមបណ្តាញសង្គមមួយចំនួន បានយករូបភាព និងឃ្លីបវីដេអូចាស់ៗ អំពីការចុះត្រួតពិនិត្យពលករបរទេស របស់អាជ្ញាធរថៃ និងការធ្វើដំណើរ ឆ្លងកាត់ព្រំដែន វិលត្រឡប់ទៅចូលរួមបុណ្យចូលឆ្នាំថ្មី ប្រពៃណីជាតិខ្មែរ របស់បងប្អូនពលករ នាពេលកន្លងមក មកធ្វើការផ្សព្វផ្សាយឡើងវិញ ក្នុងគោលបំណង បង្កការភ្ញាក់ផ្អើល និងអូសទាញឱ្យបងប្អូនពលករ ត្រឡប់ទៅប្រទេសកម្ពុជាវិញ ដើម្បីកេងចំណេញផ្នែកនយោបាយ។ នេះបើយោងតាមសេចក្តីប្រកាសព័ត៍មានរបស់ស្ថានទូតព្រះរាជាណាចក្រកម្ពុជាប្រចាំព្រះរាជាណាចក្រថៃឡងដ៍ ។
ស្ថានទូតកម្ពុជា ប្រចាំប្រទេសថៃ សូមបញ្ជាក់ថា បច្ចុប្បន្ននេះ បងប្អូនពលករខ្មែរ នៅក្នុងប្រទេសថៃ កំពុងបម្រើការងារតាមធម្មតា ពុំមានការធ្វើដំណើរវិលត្រឡប់ ទៅប្រទេសកម្ពុជា ជាគំហុក ដូចដែលសារព័ត៌មានមួយចំនួនបានធ្វើការចុះផ្សាយនោះទេ។ ជាងនេះទៅទៀត ភាគីថៃ ក៏កំពុងតែដំណើរការបន្តទិដ្ឋាការស្នាក់នៅ និងប័ណ្ណអនុញ្ញាតការងារ ជូនដល់បងប្អូនពលករ អាចស្នាក់នៅ និងធ្វើការនៅក្នុងប្រទេសថៃ បន្តទៀត បានរហូតដល់ឆ្នាំ២០២២។
ដូចនេះ សូមបងប្អូនពលករទាំងអស់ រក្សាភាពស្ងៀមស្ងាត់ និងបន្តអនុវត្តការងារ ជាធម្មតា កុំជឿតាមការផ្សព្វផ្សាយ និងការញុះញង់ របស់សារព័ត៌មានមួយចំនួន ដែលជាហេតុបង្កឱ្យបងប្អូនខាតបង់ថវិកា ពេលវេលា និងអាចត្រូវនិយោជក បញ្ឈប់ពីការងារទៀតផង៕
