រាជធានីភ្នំពេញ ៖ ថ្លែងជាសាធារណន សម្តេចនាយករដ្ឋមន្ត្រី ហ៊ុន សែន បានបញ្ជាក់ថា ប្រទេសនៅអឺរ៉ុបគឺគ្មានប្រទេសណាមួយដែលគ្មានទំនាក់ទំនងល្អជាមួយកម្ពុជានោះទេ ហើយគេកំពុងធ្វើការជាមួយរាជរដ្ឋាភិបាលកម្ពុជាដែលមាននាយករដ្ឋមន្ត្រី ឈ្មោះ ហ៊ុន សែន។ ការថ្លែងរបស់សម្តេចធ្វើឡើងក្នុងឱកាសសម្តេចអញ្ជើញចូលរួមក្នុងពិធីចែកសញ្ញាប័ត្រ នៅសាកលវិទ្យាល័យបៀលប្រាយ នាព្រឹកថ្ងៃទី២២ ខែតុលា ឆ្នាំ២០១៩ នៅកោះពេជ្រ ។
សម្តេចនាយករដ្ឋមន្ត្រី ហ៊ុន សែន ក៏បានប្រកាសដកហូតក្រុមហ៊ុន ស៊ិនទ្រី ដែលជាក្រុមហ៊ុនប្រមូលសម្រាមដ៏ធំនៅកម្ពុជា ដើម្បីយកមកឲ្យរដ្ឋគ្រប់គ្រងបណ្តោះអាសន្នវិញ ដោយសារតែកន្លងមក ក្រុមហ៊ុនមួយនេះបានរងនូវការរិះគន់យ៉ាងខ្លាំងពីប្រជាពលរដ្ឋ ។
តាមសម្តេច ហ៊ុន សែន បញ្ជាក់ថា នឹងមានការរៀបចំឲ្យមានជាតំបន់ សម្រាប់ប្រមូលសម្រាម ហើយប្រកាសដេញថ្លៃដែលធ្វើយ៉ាងនេះ យើងនឹងអាចមានលទ្ធភាពក្នុងការប្រមូលសម្រាប ខណដែលបញ្ហាសម្រាមកាន់តែច្រើនឡើងៗ នាពេលបច្ចុប្បន្ននេះ។
សម្តេចក៏បានអះអាងថា ប្រាក់ខែនឹងបន្តកើនឡើងជារៀងរាល់ឆ្នាំក្នុងវិស័យអប់រំ សុខាភិបាល គ្រូបង្រៀន គ្រូពេទ្យ មន្ត្រីរាជការស៊ីវិល និងកងកម្លាំងប្រដាប់អាវុធគ្រប់ប្រភេទ។
ទន្ទឹមនោះ សម្តេចតេជោ ហ៊ុន សែន បានបញ្ជាក់នៅលើបណ្តាញសង្គមថា ៖ «ដោយក្តាប់បាននូវការលំបាករបស់បងប្អូនប្រជាពលរដ្ឋនៅរាជធានីភ្នំពេញ អំពីការដាក់ថ្លៃសេវាប្រមូលសំរាមក្រុមហ៊ុន ស៊ិនទ្រី ក្នុងវិក្កយបត្ររបស់អគ្គិសនីកម្ពុជា ល្ងាចថ្ងៃនេះ ខ្ញុំបានសម្រេចតាមសំណើរបស់អគ្គិសនីកម្ពុជា ដោយដកថ្លៃសេវាប្រមូលសំរាមចេញពីវិក្កយបត្រថ្មីរបស់អគ្គិសនីកម្ពុជាចាប់ពីថ្ងៃទី០១ ខែមករា ឆ្នាំ២០២០ តទៅ»។ សម្តេចបានបន្តថា «យន្តការយកថ្លៃសេវាប្រមូលសំរាមទៅថ្ងៃមុខនឹងត្រូវប្រើយន្តការផ្សេងជំនួសវិញ ដែលកិច្ចការនេះ ខ្ញុំបានប្រគល់ភារកិច្ចជូនឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ធ្វើការប្រជុំ និងដោះស្រាយ។ សូមបងប្អូនប្រជាពលរដ្ឋជាទីស្រឡាញ់មេត្តាជ្រាបជាព័ត៌មាន»។
ក្រុមហ៊ុនស៊ីនទ្រីបានចុះកិច្ចព្រមព្រៀងជាមួយរដ្ឋាភិបាលនៅអំឡុងឆ្នាំ១៩៩៦ឬ១៩៩៧ ដែលមកទល់ពេលនេះ គឺជាង២០ឆ្នាំហើយ។ ពេលនោះ ផ្ទៃដីទីក្រុងភ្នំពេញមានទំហំតែ ៣០០គមក្រឡា តែពេលនេះផ្ទៃដីក្រុងបានកើនឡើងរហូតដល់ ៦០០គមក្រឡា ដែលបានធ្វើអោយក្រុមហ៊ុនសំរាមស៊ីនទ្រីគ្មានសមត្ថភាពធ្វើ បានទុកសំរាមគរចោលដែលធ្វើអោយប៉ះពាល់ដល់បរិស្ថាននិងអនាម័យ សោភ័ណភាពទីក្រុង។
រដ្ឋនឹងកំណត់បែងចែកជា៤តំបន់ អោយក្រុមហ៊ុននីមួយៗគ្រប់គ្រងទៅតាមតំបន់របស់ខ្លួន។ ទន្ទឹមនឹងនេះ ក៏ហាមមិនអោយបញ្ចូលគ្នាជាសម្ព័ន្ធបានឡើយ។ ក្រោយពីការប្រមូលនិងគ្រប់គ្រងសំរាមបានហើយ សម្តេចតេជោក៏មានគម្រោងដើម្បីកែច្នៃសំរាមនេះអោយទៅជាអគ្គីសនីសម្រាប់យកមកប្រើប្រាស់ក្នុងរាជធានីភ្នំពេញ ទោះបីត្រូវចំណាយខ្ពស់បន្តិចក្តី គឺរាជរដ្ឋាភិបាលសុខចិត្តចូលរួមជាមួយក្រុមហ៊ុនអគ្គីសនីនេះផងដែរ។
សម្តេចក៏បានបញ្ជាឲ្យភាគីពាក់ព័ន្ធជាពិសេសរដ្ឋបាលរាជធានីភ្នំពេញ ពិភាក្សាបង្កើតចំណតរថយន្តក្រោមដី តាមរយៈក្រុមហ៊ុនឯកជនមួយចំនួន ដើម្បីកាត់បន្ថយការកក់ស្ទះចរាចរណ៍ ។ “ឥឡូវកំពុងឲ្យសិក្សាសួនច្បារមួយ ចំនួនដែលអាចធ្វើបាន ប្រគល់ឲ្យវិស័យឯកជន ជីករុងក្រោមដីធ្វើ៣ ឬ៤ជាន់ទៅក្រោមដី ហើយនាំគ្នាធ្វើកន្លែងដាក់ឡាន” ។ ចំពោះការសាងសង់វិញ ត្រូវធ្វើប្រកបដោយគុណភាព និងបច្ចេកទេសខ្ពស់ ជាមួយការទទួលខុសត្រូវ លើសុវត្ថិភាពជាចម្បង ព្រោះចំណតរថយន្តក្រោមដី មិនត្រឹមតែជួយសម្រួលដល់សណ្តាប់ធ្នាប់ចរាចរណ៍ទេ ប៉ុន្តែនឹងជួយលើកសោភ័ណភាពក្រុង ឲ្យកាន់តែស្រស់ស្អាត មួយកម្រិតថែមទៀត៕
