ខេត្តព្រះវិហារ ៖ អធិការស្រុកត្បែងមានជ័យ បានឲ្យដឹងថា នៅចំណុចភូមិសាស្ត្រ ភូមិអូរកក់ ឃុំពោធិ៍ ស្រុកត្បែងមានជ័យ ខេត្តព្រះវិហារ មានការប្រគល់អាវុធកែច្នៃ ប្រភេទ កាប៊ីន របស់ប្រជាពលរដ្ឋ ចំនួន ១៨ដើម ជូនដល់កម្លាំងអធិការដ្ឋាននគរបាលស្រុកត្បែងមានជ័យ ដើម្បីរក្សាទុក ។
លោកវរសេនីយ៍ទោ រឹទ្ធ សូណា អធិការស្រុកត្បែងមានជ័យថា ការប្រគល់អាវុធកែច្នៃនេះ គឺជាលើកទី០២ ហើយ បន្ទាប់ពីមានការប្រគល់លើកទី០១ នៅភូមិពោធិ៍ខឿន ឃុំពោធិ៍ ស្រុកត្បែងមានជ័យ កន្លងទៅ ដែលវាជាស្មារតីភ្ញាក់រលឹករបស់ប្រជាពលរដ្ឋ ក្រោយពីមានការចង្អុលបង្ហាញ និងការដាក់បទបញ្ជាយ៉ាងម៉ឺងម៉ាត់ ពីសំណាក់លោកឧត្តមសេនីយ៍ទោ សួស សុខដារ៉ា ស្នងការនគរបាលខេត្ត ប្រជុំផ្សព្វផ្សាយស្តីពីគោលនយោបាយ ភូមិ ឃុំ មានសុវត្ថិភាព ជូនដល់ប្រជាពលរដ្ឋ និងផ្ដោតសំខាន់លើការប្រើប្រាស់អាវុធកែច្នៃខុសច្បាប់ ។
សមត្ថកិច្ចនគរបាលស្រុកត្បែងមានជ័យ ក៏បានធ្វើពិធីសំណេះសំណាលជាមួយប្រជាពលរដ្ឋ ដោយបានធ្វើការអប់រំណែរនាំ និងធ្វើកិច្ចសន្យា ឲ្យពួកគាត់បញ្ឈប់ប្រើប្រាស់អាវុធកែច្នៃ ក៏ដូចជាអាវុធស្វ័យប្រវត្តិតទៅទៀត ពីព្រោះកាលណាប្រើប្រាស់របស់ទាំងនេះគឺជាការខុសច្បាប់ផងដែរ៕