ខេត្តបាត់ដំបង ៖ បុរសម្នាក់ព្យាយាមលោតពីលើរថយន្តប៉ូលិសដើម្បីគេចខ្លួន បន្ទាប់ពីសមត្ថកិច្ចចុះបង្រ្កាបការលេងល្បែងសីសង់អាប៉ោង ឃាត់ខ្លួនបញ្ជូនទៅអធិការស្រុកភ្នុំព្រឹក បណ្តាលអោយរបួសក្បាល់ស្លាប់ក្រោយបញ្ជូនទៅកាន់មន្ទីរពេទ្យ។
លោក សារ៉េត ពិសេដ្ឋ អធិការនគរបាលស្រុកភ្នំព្រឹកបានអោយដឹងថា កាលពីវេលាម៉ោង២១និង៣០នាទី ថ្ងៃទី០៩ ខែតុលា ឆ្នាំ២០១៩ កម្លាំងជំនាញផ្នែកព្រហ្មទណ្ឌនៃអធិការដ្ឋាននគរបាលស្រុកភ្នំព្រឹក បានចុះធ្វើការបង្រ្កាបល្បែងស៊ីសង( អាប៉ោង )មួយកន្លែងនៅចំណុចភូមិភ្នំព្រឹក ឃុំភ្នំព្រឹក ស្រុកភ្នំព្រឹក ខេត្តបាត់ដំបង។ ក្នុងកិច្ចប្រតិបត្តិការខាងលើនេះដែរ សមត្ថកិច្ចបានធ្វើការឃាត់ខ្លួនអ្នកលេងល្បែងចំនួន០១នាក់ ឈ្មោះ ជ័យ ភារិន (ហៅពៅ) ភេទប្រុស អាយុ៣៦ឆ្នាំ មានទីលំនៅ ភូមិភ្នំព្រឹក ឃុំភ្នំព្រឹក ស្រុកភ្នំព្រឹក ចំណែកក្រុមអ្នកលេងផ្សេងទៀតបានរត់គេចខ្លួនរួចអស់ និងចាប់យកវត្ថុតាងម៉ូតូចំនួន០៣គ្រឿង ព្រមទាំងសម្ភារ:ពាក់ព័ន្ធសម្រាប់លេងល្បែងមួយចំនួនទៀត ។
ក្រោយធ្វើការបង្រ្កាប សមត្ថកិច្ចបានដឹកវត្ថុតាងម៉ូតូចំនួន០២គ្រឿងយកមករក្សាទុកនៅអធិការដ្ឋាននគរបាលស្រុកភ្នំព្រឹកដោយនាំខ្លួនឈ្មោះ ហុង ភារិន ជិះរថយន្តមកជាមួយនិងកម្លាំងនគរបាលម្នាក់ផងដែរ អោយជួយទប់ម៉ូតូពីក្រោយរថយន្ត ។លុះចេញដំណើរបានប្រហែល ១.៥០០ ម៉ែត្រដល់ចំណុចភូមិថ្នល់បត់ ឃុំអូររំដួល ស្រុកភ្នំព្រឹក ស្រាប់តែឈ្មោះ ហុង ភារិន (ហៅពៅ) បានលោតទម្លាក់ខ្លួនពីលើរថយន្តរបស់សមត្ថកិច្ច ក៏បណ្តាលអោយរងរបួសក្បាលនិងបានស្លាប់ក្រោយពេលបញ្ជូនទៅសម្រាកព្យាបាលនៅមន្ទីរពេទ្យបង្អែកស្រុកសំពៅលូន។
បច្ចុប្បន្ន សពត្រូវបានរៀបចំឯកសារប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕
