បាត់ដំបង ៖ យ៉ាងហោចណាស់ មានមនុស្សស្លាប់ ៥ នាក់និងរបួស៨នាក់និងខូចខាតទ្រព្យសម្បត្តិមួយចំនួនដោយភ្លៀងព្យុះផ្គររន្ទះនៅស្រុកឯកភ្នំនិងក្រុងបាត់ដំបងកាលពីវេលាម៉ោង ៤និង៣០នាទីរសៀល ថ្ងៃទី២៤ ខែមេសា ឆ្នាំ២០១៤។
លោក យៀម ប៊ុនលឿប អធិការស្រុកឯកភ្នំ បានអោយដឹងថាមានភ្លៀងមួយមេយ៉ាងធំ ព្រមទាំងមានផ្គរន្ទះ និងខ្យល់កន្ត្រាក់បានវាយដើមឈើមកលើការិយាល័យព្រហ្មទ័ណ្ឌខ្លួន បណ្តាលអោយខូចខាតទាំងស្រុងហើយទឹកភ្លៀងបានបំផ្លាញឯកសារទាំងស្រុង និងបណ្តាលមនុស្ស២នាក់របួសធ្ងន់ទី១ឈ្មោះ ខៀវ មនោរម្យ ជាមន្ត្រីនគរបាល របួសបែកក្បាល និងទី២ ឈ្មោះ ថា ជាប្រជាពលរដ្ឋ របួសបាក់ឆ្អឹងខ្នង និងចង្កេះ ពេលកំពុងបំពេញការងារក្នុងការិយាល័យ ។
មានករណីរន្ទះបាញ់ស្លាប់មនុស្ស ចំនួន ២ នាក់ក្នុងពេលតែ ១ នៅចំណុចផ្សេងគ្នា ទី១ ឈ្មោះ រឹត ចាន់ណា ភេទប្រុសអាយុ ២៥ ឆ្នាំពេលដើរទៅមើលស្រះចិញ្ចឹមត្រីរបស់ខ្លួន នៅចំណុចទួលតាអូក ភូមិអូរកំបុត ឃុំព្រែកខ្ពប និងមានទីលំនៅភូមិ-ឃុំព្រែកខ្ពបស្រុកឯកភ្នំ ។ ទី២ ឈ្មោះ រ៉ាត់ ដារ៉ូ ភេទប្រុស អាយុ២២ឆ្នាំ រន្ទះបាញ់ស្លាប់ ពេលកំពុងភ្ជួរស្រែនៅចំណុចបឹងច្រាំង ភូមិអូរកំបុត ជាមួយប្អូនប្រុសឈ្មោះ រ៉ាត់ រើន អាយុ ១៨ ឆ្នាំ ។
ឈ្មោះ រ៉ាត់ រើន បានអោយដឹងថា ពេលកំពង់ភ្ជួរស្រែខ្លួន និងបងប្រុសឈរក្បែរគ្នា ប្រហែល៣ម៉ែត្រពេលនោះ នឹកស្មានភ្លៀងធ្លាក់តិច ទើបមិនឈប់ភ្ជួរ ។ ក្នុងស្រុកឯភ្នំ មានខ្យល់វាយប៉ើងដំបូលផ្ទះ នៅឃុំព្រែកហ្លួង ២ ខ្នង និងឃុំព្រែកនរិន្ទ ចំនួន ១០ ខ្នង ។
លោក ស៊ន កុសស នាយផ្នែកនគរបាល ក្រុងបាត់ដំបង បានឲ្យដឹងថា ជនរងគ្រោះ ដែលស្លាប់ ដោយសារការភ័យស្លុត ខ្យល់ព្យុះវាយដំបូលផ្ទះ និងសម្លេងផ្គររន្ទះ ទី១មានឈ្មោះ វ៉ាន់ លឿម ភេទប្រុសអាយុ ៥៣ ឆ្នាំកំពង់ដេកនៅក្នុងផ្ទះ ឋិតភូមិរំចេក ៤ សង្កាត់រតនៈ ក្រុងបាត់ដំបង ។ ទី ២ ឈ្មោះ សៀង សាវឿត ភេទប្រុស អាយុ ៤២ ឆ្នាំ មុខរបរលក់ទឹកអំពៅ ខ្យល់គរ ដួលផ្កាប់មុខស្លាប់នៅកន្លែងលក់ទឹកអំពៅ ផ្សារ១៣មករា សង្កាត់ព្រែកព្រះស្តេច ក្រុងបាត់ដំបង និងមានទីលំនៅ ភូមិឡឥដ្ឋ សង្កាត់ព្រែកព្រះ ស្តេច ក្រុងបាត់ដំបង។ ទី៣ឈ្មោះ រ៉ែន រ៉ានី ភេទស្រី អាយុ៣០ឆ្នាំ ស្លាប់ដោយសារដើមត្នោត បាក់សង្កត់ លើរោង ហូបចុក នៅហាងផឹកស៊ី យីហោ ចាន់ណាស្រែ១០០ ស្ថិតក្នុងសង្កាត់ចំការសំរោង ក្រុងបាត់ដំបង និងសាច់ញាតិរបួស៦នាក់មានប្រុស៤នាក់ស្រី២នាក់ ទាំង៦នាក់ស្នាក់ នៅភូមិព្រែកតាតន់សង្កាត់ព្រែកព្រះស្តេចក្រុងបាត់ដំបង។ដើមឈើតូចធំតាមដងផ្លូវ២០ដើមដំបូលផ្ទះ៦ខ្នងសាលារៀន១ខ្នងរោងលក់បង្អែមមាត់ស្ទឹងសួននាគបាញ់ទឹកនិងបាណូមួយចំនួនទៀតខូចខាតទាំងស្រុង និងព្រមទាំងមានការលិចលង់ ដងផ្លូវក្នុងក្រុងផងដែរ ។
នៅឆ្នាំ២០១៤ ភ្លៀងមានការធ្លាក់យឺតយ៉ាវ ជាងរាល់ឆ្នាំ ដោយឆ្នាំមុនៗភ្លៀងបានធ្លាក់តាំងពីចុងខែមីនាម្ល៉េះ ឆ្នាំនេះទើបតែមានភ្លៀងកក់ខែដំបូង ព្រមទាំងមានផ្គររន្ទះ និងខ្យល់ព្យុះ បណ្តាលឲ្យមនុស្សស្លាប់ និងរបួសយ៉ាងច្រើននាក់និងបំផ្លាញទ្រព្យសម្បត្តិសាធារណៈជាច្រើនកន្លែងទៀត ៕
