ខេត្តព្រះវិហារ ៖ កាលពីព្រឹកថ្ងៃទី០៦ ខែតុលា ឆ្នាំ២០១៩ ក្នុងទីតាំងវរសេនាតូចលេខ៣៩២ ស្ថិតនៅភូមិរុងរឿង៥ ឃុំទឹកក្រហម ស្រុកជាំក្សាន្ត ខេត្តព្រះវិហារ លោកជំទាវ ហ៊ុន ម៉ាណា ប្រធានក្រុមវេជ្ជសាស្ត្រសម្តេចតេជោ បានដឹកនាំក្រុមគ្រូពេទ្យ ចុះពិនិត្យ ពិគ្រោះ និងព្យាបាលជំងឺជូនពុកម៉ែ បងប្អូន កងទ័ព គ្រួសារកងទ័ព សរុបចំនួន ១,៩២៧នាក់ដោយឥតគិតថ្លៃ ដោយមានការចូលរួមពីសំំណាក់ឯកឧត្តម ឧត្តមសេនីយ៍ឯក ស្រី ឌឹក មេបញ្ជាការរងកងទ័ពជើងគោក មេបញ្ជាការកងពលធំអន្តរាគមន៍លេខ៣ និងឯកឧត្តមមេបញ្ជាការ មេបញ្ជាការរង ព្រមទាំងក្រុមការងារ ប្រចាំទិសទី១ប្រាសាទព្រះវិហារ តាមបណ្តោយព្រំដែនកម្ពុជា.ថៃ និងឡាវ។
នាឱកាសនោះ លោកជំទាវ ហ៊ុន ម៉ាណា ប្រធានក្រុមវេជ្ជសាស្ត្រសម្តេចតេជោ បានមានប្រសាសន៍សំណេះសំណាល និងនាំយកនូវប្រសាសន៍ផ្តាំផ្ញើសាកសួរសុខទុក្ខ ពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចជាកាល សម្តេចទាំងទ្វេរតែងតែ បានគិតគូរអំពីសុខទុក្ខពុកម៉ែ បងប្អូនកងទ័ព គ្រួសារកងទ័ពគ្រប់ទីកន្លែង។
បន្ថែមពីនេះ លោកជំទាវប្រធាន ក៏បានផ្តល់នូវការអប់រំផ្នែកសុខភាពបន្ថែមជូនដល់ពុកម៉ែ បងប្អូនទាំងអស់ដែលបានអញ្ជើញមកទទួលយកសេវាពិនិត្យ ពិគ្រោះ និងព្យាបាលជំងឺសម្រាប់ថ្ងៃនេះ។ ប្រជាពលរដ្ឋប្រកបដោយអារម្មណ៍សប្បាយរីករាយយ៉ាងក្រៃលែង និងបានថ្លែងអំណរគុណចំពោះសម្តេចតេជោ និងសម្តេចកិត្តិព្រឹទ្ធបណ្ឌិត ដែលបានជួយផ្តល់សេវាថែទាំសុខភាពប្រចាំថ្ងៃ ឱ្យកាន់តែបង្ខិតជិតមកដល់មូលដ្ឋានរបស់ពួកគាត់៕
