ខេត្តព្រះសីហនុ ៖ នៅថ្ងៃទី៤តុលា លោក គួច ចំរើន អភិបាលខេត្តព្រះសីហនុ បានជូនរង្វាន់លើកទឹកចិត្តដល់កងកម្លាំងនគរបាលខេត្តព្រះសីហនុ ដែលបានខិតខំប្រឹងប្រែងស្រាវជ្រាវចាប់បានឧក្រិដ្ឋជន ជនជាតិចិនដែលបានសម្លាប់ជនជាតិចិនដូចគ្នា កាត់បីកំណាត់យកទៅបោះចោល ប្លន់យកលុយ ៧០០០០ ម៉ឺនដុល្លារ។
ប្រជាពលរដ្ឋបានប្រទះឃើញសាកសពជនជាតិចិនម្នាក់ស្លាប់ក្នុងថ្លុកឈាម ដោយដាច់ខ្លួនជាពីកំណាត់ ដេកស្លាប់នៅក្នុងដីឡូត៍មួយកន្លែង ស្ថិតក្នុងក្រុម ៦ ភូមិ ៦ សង្កាត់ ៤ ក្រុងព្រះសីហនុ កាលពី ព្រឹកថ្ងៃទី ១ ខែតុលា ឆ្នាំ២០១៩ ។
បន្ទាប់មក សមត្ថកិច្ចខេត្តព្រះសីហនុ បានបំបែកសំណុំរឿងឃាតកម្មសម្លាប់កាត់សាកសពជា ៣ កំណាត់ ធ្វើឱ្យមានការភ្ញាក់ផ្អើល និងភ័យខ្លាចពេញក្រុងព្រះសីហនុនោះបានហើយ កាលពីថ្ងៃទី ២ ខែតុលា ប៉ុន្តែសមត្ថកិច្ច ទើបតែយកមកបង្ហាញខ្លួននៅថ្ងៃទី៤ ខែតុលា ឆ្នាំ២០១៩នេះ ។
តាមចម្លើយសារភាពពីជនសង្ស័យជាឃាតក គឺប្លន់សម្លាប់យកលុយចំនួន ៧០ ០០០ ដុល្លារ ។ជនសង្ស័យឈ្មោះ ZHOU YA YUN ភេទប្រុស អាយុ ២៩ ឆ្នាំ ជនជាតិចិន មុខរបរប្តូរប្រាក់ លិខិតឆ្លងដែនលេខៈ E05801588 ស្នាក់នៅហាងប្តូរប្រាក់ ជាំងស៊ូ ស្ថិតនៅក្រុម ១៤ ភូមិ ៤ សង្កាត់ ៤ ក្រុង-ខេត្តព្រះសីហនុ ។
ជនសង្ស័យបានសារភាពពីរឿងហេតុនោះថា៖ ជនរងគ្រោះបានទំនាក់ទំនងជនសង្ស័យដើម្បីប្តូរប្រាក់ចិន ជាប្រាក់ដុល្លារអាមេរិក ចំនួន ៧០,០០០$ (ប្រាំពីម៉ឺនដុល្លារអាមេរិក) លុះនៅថ្ងៃទី ៣០ ខែកញ្ញា ឆ្នាំ២០១៩ វេលាម៉ោង ១៧ ជនរងគ្រោះបានទៅហាងប្តូប្រាក់របស់ជនសង្ស័យ ដែលមានស្លាកយីហោប្តូរប្រាក់ ជាំងស៊ូ ស្ថិតនៅក្រុមទី ១៤ ភូមិ៤ សង្កាត់៤ ក្រុង-ខេត្ត ព្រះសីហនុ ។ បន្ទាប់ពីជនរងគ្រោះបានទូទាត់ប្រាក់ទៅឱ្យជនសង្ស័យរួចរាល់ហើយ ក៏ត្រូវជនសង្ស័យប្រើកាំបិត កាប់ និង ចាក់សម្លាប់ជនរងគ្រោះតែម្តងដោយសារតែខឹងរឿងខុសហាងឆេង ។
ជនរងគ្រោះមានឈ្មោះ WU CHENGHUI ភេទប្រុស ជនជាតិចិន កើតនៅថ្ងៃទី ៣១ ខែធ្នូ ឆ្នាំ ១៩៩៥ មុខរបរ ប្តូរប្រាក់ លិខិតឆ្លងដែនលេខៈ ED7591553 ។
បន្ទាប់ពីសម្លាប់ជនរងគ្រោះរួចហើយ ជនសង្ស័យបានកាត់សាកសពរបស់ជនរងគ្រោះជា ៣កំណាត់ រួចយកសាកសពវេចខ្ចប់ជាមួយភួយ និង អាវដែលធ្វើសកម្មភាព និងស្បោងពណ៌ខ្មៅ រហូតដល់ម៉ោង ១ រំលងអាធ្រាត្រ ឈានចូលថ្ងៃទី ១ ខែតុលា ឆ្នាំ ២០១៩ ជនសង្ស័យបានទៅជួលរថយន្ត ១ គ្រឿង ម៉ាក LEXUS 470 ពណ៌ស ស្លាកលេខៈ ភ្នំពេញ 2AH-1611 ដើម្បីដឹកសាកសពរបស់ជនរងគ្រោះយកទៅប្លុងចោលនៅកន្លែងផ្សេងៗពីគ្នា ដោយកំណាត់ទី ១ ពីក្បាលដល់ចង្កេះយកទៅប្លុងចោលនៅដីឡូត៍មួយកន្លែង ស្ថិតនៅអូរត្រេះ ២ ភូមិ ៦ សង្កាត់ ៤ ក្រុង-ខេត្ត ព្រះសីហនុ ,កំណាត់ទី ២ ពីចង្កេះដល់ ជង្គង់ យកទៅប្លុងចោលនៅដីឡូត៍មួយកន្លែង ស្ថិតនៅភ្នំ ៩៦ ភូមិ ៥ សង្កាត់ ៤ ក្រុង-ខេត្ត ព្រះសីហនុ ,កំណាត់ទី ៣ ពីជង្គង់ដល់បាតជើង យកទៅប្លុងចោលនៅក្នុងព្រៃ ភូមិមើលស្វា អូតែល ៧ ជាន់ ស្ថិត នៅ ភូមិ ១ សង្កាត់ ៣ ក្រុង-ខេត្ត ព្រះសីហនុ ៕
